Makapabang-ar a Musika
1 Napateg a paset ti pudno a panagdayaw ti panagkanta ken musika. Iti nagkauna nga Israel, inkanta ni Asaf ken dagiti kakabsatna: “Agyamankayo ken Jehova. . . . Kantaanyo, mangipaaykayo kenkuana iti samiweng, ibiangyo ti bagbagiyo iti amin a nakaskasdaaw nga ar-aramidna.” (1 Cron. 16:8, 9) Iti kaaldawantayo, kankantaantayo ni Jehova kadagiti linawas a gimongtayo iti kongregasion. (Efe. 5:19) Anian a nagsayaat daytoy a gundaway a panangidayaw iti naganna!—Sal. 69:30.
2 Ti panagdengngeg kadagiti Kingdom Melodies, dagiti kanta ti Pagarian a tinokar ti orkestra, punnuenna ti isiptayo kadagiti naespirituan a pampanunot. “No madama a matoktokar dagiti Kingdom Melodies, kas man la mangmangngegko dagiti sasao iti panunotko,” kinuna ti maysa a kabsat a babai. “Anian a nagsayaat a pamay-an a pananglaglagipko a kanayon ken ni Jehova bayat a tagtagiragsakek ti dumngeg iti musika!”—Fil. 4:8.
3 Dagiti Gundaway a Panangtagiragsak Kadagitoy: Ti panangpatokar kadagiti Kingdom Melodies iti pagtaengan ket mangparnuay iti nabara ken naespirituan a kasasaad a makatulong iti kinatalinaay ti pamilia. “Kanayon a patokarenmi daytoy [a musika] iti pagtaenganmi ken no addakami iti lugan ket pulos a saankami a mauma iti makaay-ayo nga ayugna,” insurat ti maysa a pamilia. “Dagiti Kingdom Melodies masansan nga ikondisionna ti panunotmi bayat nga agrubrubbuatkami a mapan makigimong wenno no agbibiahekami a mapan makiasamblea.” Kinuna ti maysa a kabsat a babai: “Mabangbang-aranak a dumngek kadagita bayat nga ar-aramidek dagiti trabahok iti balay—siasino ti mangipagarup a naragsakak bayat nga agkupkupinak kadagiti linabaak? Patokarek daytoy a musika no madukotanak. Makapagin-awa dayta a musika! . . . Makaparagsak ti tunggal kanta.” Adda kadi dagiti gundaway a makagunggona kadakayo ti kasta a makapabang-ar a musika?
4 Kaaduan kadagiti kanta ita iyanninawda ti espiritu ti lubong. Dagiti nagannak matulonganda dagiti annakda a manggusto iti makaay-ayo a musika babaen ti panagdengngegda kadagiti nairekord a Kingdom Melodies. Adu dagiti mayad-adalan iti Biblia ken interesado a tattao a maragsakan met a makasursuro kadagitoy nga agkakaimnas a naespirituan a kanta a mangidayaw ken ni Jehova ken makapabang-ar.—Sal. 47:1, 2, 6, 7.