Ti Kombension Distrito Gutugotennatayo a Makipagna iti Dios

Iti “Makipagnakayo iti Dios” a Kombension Distrito, nagallangogan ti nalawag a bilin ni Jehova: “Daytoy ti dalan. Magnakayo iti dayta”! (Isa. 30:21) Ti panangyaplikar kadagiti instruksion nga inawattayo tulongannatayo nga ‘agtultuloy nga agaluad a siiinget iti pannagnatayo.’ (Efe. 5:15) No utobentayo dagiti nasursurotayo, ‘makapagtultuloytayo a magna iti kinapudno.’—3 Juan 3.

Usarenyo dagiti sumaganad a saludsod agraman dagiti personal a notayo no agsagana ken makipasetkayo iti panangrepaso iti programa ti kombension iti daytoy a tawen. Maaramid ti repaso iti Gimong ti Serbisio iti lawas ti Pebrero 21.

1. Kasano a nabaelan ni Enoc ti makipagna iti Dios iti laksid ti panagbiagna iti nariribuk a tiempo? (Heb. 11:1, 5, 6; Jud. 14, 15; “Makipagnakayo iti Dios Kadagitoy Nariribuk a Tiempo”)

2. Kadagiti ania a benneg ti biag a mabalin nga iyaplikar ti Lucas 16:10? (“‘Matalekkayo Kadi iti Kabassitan’?”)

3. (a) Mangtedkayo iti uppat a praktikal a leksion a masarakan iti Oseas kapitulo 6 agingga iti 9 a makatulong kadatayo a makipagna iti Dios. (Os. 6:6, 7; 7:14; 8:7) (b) Aniada a kanayonan a punto manipud iti Oseas kapitulo 10 agingga iti 14 ti makatulong kadatayo a makipagna iti Dios? (“Ti Padto ni Oseas Tulongannatayo a Makipagna iti Dios”—Simposium)

4. Ania dagiti praktikal a banag a mabalin nga aramiden dagiti Kristiano nga agassawa tapno agtalinaed a natibker ti relasionda? (Prov. 12:4; Efe. 5:29; “Saanyo a Pagsinaen ti ‘Pinagtipon ti Dios’”)

5. Kasanotayo a maipakita ti panagraem kadagiti sagrado a taripnongtayo? (Ecl. 5:1; Isa. 66:23; “Panagraem Kadagiti Sagrado a Taripnongtayo”)

6. (a) Ania ti tallo a napateg nga aspeto ti trabahotayo a panangasaba a masapul nga amirisentayo tapno sigurado a makagunggona ti pannakiramantayo iti dayta? (Isa. 52:7; Zac. 8:23; Mar. 6:34) (b) Ania dagiti paset ti publikasion a Good News for People of All Nations ti nakitayo a nangnangruna a makatulong? (“Naimbag a Damag Para Kadagiti Tattao iti Amin a Nasion”; “Panangtulong Kadagidiay Sabali ti Pagsasaoda”)

7. Kasanotayo a matulongan dagiti kabbaro a maaddaan iti tured a mangipakaammo iti mensahe maipapan iti Pagarian? (Uk. 7:17; “Panangtulong iti Umariwekwek a Makiraman Kadatayo iti Ministerio”)

8. Kasanotayo a maiparangarang ti pammatitayo a “ti dakkel nga aldaw ni Jehova asidegen”? (Sof. 1:14; “Pannagna Babaen ti Pammati, Saan a Babaen ti Panagkita”)

9. (a) Kasano kadagsen ti panangitibkol kadagiti sabsabali? (Mar. 9:42-48) (b) Kasanotayo a maliklikan ti maitibkol? (Sal. 119:165) (c) Kasanotayo a maliklikan ti mangitibkol kadagiti dadduma? (1 Cor. 10:24; “Liklikanyo ti ‘Aniaman a Pakaigapuan ti Pannakaitibkol’”)

10. Kasanotayo a mataginayon ti kinabalansetayo no maipapan iti panangbirok iti pakiasawaan, panangaywan iti salun-at, ken panangasikaso iti negosio? (Sal. 26:4; Mat. 6:25; 1 Tim. 6:9; “Sipupuotkayo a Naan-anay”)

11. (a) Ania ti inaramid ni Jesus kadagiti gundaway a tinagiragsakna ti kinamanagpadagus dagiti dadduma? (Luc. 10:42; 24:32) (b) Kasanotayo a makapaglinglingay iti wagas a makapabang-ar kadatayo ken kadagiti dadduma? (1 Cor. 10:31-33; “Dagiti Makaay-ayo nga Aktibidad a Makapabang-ar”)

12. Sigun iti maika-23 a Salmo, ania dagiti bendision nga aw-awatentayo kas karnero ni Jehova, ken ania dagiti responsabilidadtayo? (1 Cor. 10:21; “Ni Jehova ti Pastortayo”)

13. Kasano nga ipangag dagiti Kristiano ti naipaltiing a balakad a ‘gatangen ti nainggundawayan a tiempo’? (Efe. 5:16; “Gatangenyo ti Nainggundawayan a Tiempo”)

14. (a) Ania ti ramanen ti ‘oras ti panangukom’ a nadakamat iti Apocalipsis 14:7? (b) Kasanotayo a maipaneknek a pudno a naisinatayo iti Babilonia a Dakkel? (“‘Agtultuloykayo nga Agbantay’—Dimtengen ti Oras ti Panangukom”) (c) Iti broshur nga Agtultuloyka nga Agbantay!, ania dagiti punto a tinagiragsakmo?

15. Ania dagiti tallo a kualidad a kasapulan tapno saantayo a ‘mabaybay-an ti nalinteg a dana’? (2 Ped. 2:15; “Agannadkayo a Dikay ‘Baybay-an ti Nalinteg a Dana’”)

16. Kasano a maliklikan dagiti agtutubo ti “dana dagidiay nadangkes”? (Prov. 4:14; “Agtutubo—Magnakayo iti Dana ti Kinalinteg”)

17. (a) Kadagiti ania a pamay-an a ni Pablo ket nagsayaat nga ulidan iti panagibtur? (Ara. 14:19, 20; 16:25-33) (b) Apay a saantayo a kabuteng dagidiay bumusbusor iti pudno a panagdayaw? (Drama ken ti palawag a “Naan-anay a Panangsaksi iti Kaaldawantayo iti Laksid ti Ibubusor”)

18. Ania dagiti bendision a dumteng kadagidiay makipagna iti Dios? (“Ti Pannakipagna iti Dios Mangyeg Kadagiti Gunggona Ita ken iti Agnanayon”)

Sapay koma ta determinadotayo a mangipangag iti ‘sao iti likudantayo’ tapno mabalinantayo ti makipagna iti Dios iti agnanayon.—Isa. 30:21; Juan 3:36.