Panangikondukta Kadagiti Progresibo a Panagadal iti Biblia
Paset 3: Epektibo a Panangusar iti Kasuratan
1. Apay a masapul nga ipaganetgettayo ti Kasuratan no mangikonduktatayo kadagiti panagadal iti Biblia?
1 Ti panggeptayo a mangikondukta kadagiti panagadal iti Biblia ket tapno ‘mangaramid iti ad-adalan’ babaen ti panangtulong kadagiti tattao a mangtarus ken mangawat iti sursuro ti Sao ti Dios ken mangipakat kadagita iti panagbiagda. (Mat. 28:19, 20; 1 Tes. 2:13) Gapuna, ti panagadal ket naisentro koma iti Kasuratan. Iti damo, mabalin a makatulong no ipakitatayo kadagiti iyad-adalantayo no kasano a biroken dagiti espesipiko a teksto iti bukodda a kopia ti Biblia. Ngem kasanotayo a mausar ti Kasuratan tapno matulongantayo ida a rumang-ay iti naespirituan?
2. Kasanotayo a maikeddeng no ania a teksto iti Biblia ti basaen ken ilawlawagtayo?
2 Mangpili Kadagiti Teksto a Basaen. Iti panagsaganam, usigem no kasano nga agaplikar ti tunggal naisitar a teksto iti punto a mapagsasaritaan ken ikeddengmo no ania a teksto ti basaen ken ilawlawagmo bayat ti panagadalyo. Kaaduanna, nasaysayaat no basaenyo dagiti teksto a mangipakita iti Nainkasuratan a pangibatayan kadagiti patpatientayo. Mabalin a saanen a nasken a basaen dagiti teksto a mangipaay kadagiti kanayonan nga impormasion. Usigem dagiti kasapulan ken kasasaad ti tunggal iyad-adalam.
3. Ania ti pagimbagan ti panagusar kadagiti saludsod, ken kasanotayo a maaramid daytoy?
3 Agusar Kadagiti Saludsod. Imbes nga ilawlawagmo iti iyad-adalam dagiti teksto iti Biblia, pailawlawagmo dagita kenkuana. Matignaymo ti iyad-adalam a mangaramid iti daytoy babaen ti nasigo a panagusar kadagiti saludsod. No nabatad ti aplikasion ti teksto, mabalin a saludsodem laeng no kasano a suportaran ti teksto ti punto a nadakamat iti parapo. Iti dadduma a kaso, mabalin a kasapulan ti mas espesipiko a saludsod wenno salsaludsod tapno maiturong ti estudiante iti umiso a konklusion. Mabalinmo ti mangted kadagiti kanayonan a panangilawlawag no kasapulan, kalpasan a sumungbat ti iyad-adalam.
4. Kasano kaadu ti ilawlawagtayo maipapan kadagiti teksto a basaentayo?
4 Pagtalinaedem a Simple. Ti nasigo a pumapana masansan a maysa laeng a pana ti kasapulanna tapno mapuntaanna ti puntiriana. Umasping iti dayta, ti nasigo a mannursuro ket saan a nasken nga agusar iti adu a sasao tapno maipaganetgetna ti punto. Mabalinna nga ilawlawag ti impormasion iti pamay-an a simple, nalawag, ken umiso. No dadduma, mabalin a kasapulam ti agsukimat kadagiti Nakristianuan a publikasion tapno maawatam ti teksto ken mailawlawagmo a siuumiso. (2 Tim. 2:15) Ngem saanmo nga ilawlawag ti amin nga aspeto ti tunggal teksto iti panagadalyo. Dakamatem laeng daydiay kasapulan tapno mailawlawag ti punto nga ad-adalenyo.
5, 6. Kasanotayo a matulongan dagiti iyad-adalantayo nga agbiag a mayannurot iti Sao ti Dios, ngem ania ti saantayo nga aramiden?
5 Mangted iti Praktikal nga Aplikasion. No maitutop, tulongam ti iyad-adalam a mangkita no kasano nga agaplikar kenkuana dagiti teksto iti Biblia. Kas pagarigan, no ilawlawagmo ti Hebreo 10:24, 25 iti iyad-adalam a saan pay a tumabtabuno kadagiti Nakristianuan a gimong, mabalinmo nga ilawlawag kenkuana ti maysa kadagiti gimong ken awisem a tabunuanna dayta. Ngem saanmo a pilpiliten. Palubosam a ti Sao ti Dios ti manggutugot kenkuana a mangaramid iti kasapulan nga addang tapno maay-ayona ni Jehova.—Heb. 4:12.
6 Bayat nga itungtungpaltayo ti annongen a mangaramid iti ad-adalan, sapay koma ta babaen ti epektibo a panangusartayo iti Kasuratan, ‘itandudotayo ti kinatulnog babaen ti pammati.’—Roma 16:26.