Eskediul ti Pamilia—Panagserbi iti Tay-ak kas Pamilia
1 Maragsakan ni Jehova a makakita kadagiti agtutubo a mangidaydayaw iti naganna. (Sal. 148:12, 13) Idi kaaldawan ni Jesus, uray ‘dagiti ubbing ken agsussuso nangipaayda iti dayaw’ iti Dios. (Mat. 21:15, 16) Kasta met laeng ti mapaspasamak ita. Nagannak, kasano a matulonganyo dagiti annakyo nga agbalin a naregta a mangidaydayaw ken ni Jehova iti Nakristianuan a ministerio? Manen, kas naipaganetget iti artikulo nga adda iti ngato maipapan kadagiti gimong ti kongregasion, napateg ti ulidan nga ipakpakitayo. Inyebkas ti maysa nga ama ti karirikna ti kaaduan a nagannak idi kinunana: “Saan a ti ibagbagam ti aramiden dagiti ubbing no di ket ti ar-aramidem!”
2 Kinuna ti maysa a kabsat a babai a pinadakkel dagiti managbuteng iti Dios a nagannak: “No makariingkami iti agsapa ti Sabado, saanen a nasken a damagenmi pay no mapankami mangasaba. Ammomi lattan a rummuarkami.” Umasping iti dayta, maitukityo kadagiti annakyo ti kinapateg ti panangasaba babaen ti linawas a panagserbiyo iti tay-ak kas pamilia. Malaksid a makasursuro dagiti annakyo iti panangpaliiwda kadakayo, maaddaankayo pay iti gundaway a mangpaliiw iti tigtignay, kababalin, ken abilidadda.
3 Progresibo a Panangsanay: Tapno kaay-ayo dagiti ubbing ti ministerio, nasken a nakasaganada a makipaset a sieepektibo. Kinuna pay ti kabsat a babai a nadakamat itay: “Saankami a basta sumursurot laeng kadagiti dadakkelmi iti trabahoda. Ammomi nga adda met pasetmi, uray no paratimbre laeng ken parayawat iti polieto. Babaen ti panagsagana a naimbag sakbay a rummuarkami iti kada ngudo ti lawas, ammomin no ania ti ibagami.” Mabalinyo a sanayen dagiti annakyo babaen ti panangbusbos iti sumagmamano a kanito a mangisagana kadakuada para iti ministerio, bayat man ti panagadal ti pamiliayo wenno iti sabali a gundaway.
4 Ti panangasaba kas pamilia ikkannakayo iti kanayonan a gundaway a mangitukit iti kinapudno kadagiti annakyo. Ugali idi ti maysa a Kristiano nga ama nga ikuyog ti anakna a babai a magna iti 10 a kilometro nga agturong iti sumaruno a tanap tapno agiwarasda iti polieto kadagiti agindeg sadiay. Maay-ayatan ti anakna no kasta a malagipna dayta. Kinunana: “Bayat dagidi a pannagnami, ginundawayan ni Tatang nga intukit ti kinapudno iti pusok.” (Deut. 6:7) Sapay koma ta magunggonaankayo met iti kaadda ti linawas nga eskediulyo a mangasaba kas pamilia.