Baro a Programa ti Asamblea Sirkito

Bayat ti maudi nga al-aldaw daytoy daanen a nalulok a lubong, napateg a taginayonentayo ti naespirituan a kawestayo ken saluadantayo ti pakabigbigantayo kas Kristiano. (Apoc. 16:15) Maitutop ngarud a ti tema ti programa ti asamblea sirkito iti 2006 ket “Kawesanyo ti Bagbagiyo iti Baro a Personalidad.”—Col. 3:10.

Umuna nga Aldaw: Itampok ti umuna a simposium a “Panangiparangarang Kadagiti Aspeto ti Baro a Personalidad,” no kasano a makagunggona iti amin a benneg ti biagtayo ti panangpatanor iti baro a personalidad. Kasanotayo a patanoren ti baro a personalidad? Mausigto dayta iti dua a maudi a palawag iti umuna nga aldaw a natemaan iti “Disiplinaem ti Bagim nga Agmennamenna iti Umiso a Pamay-an” ken “Ti Edukasion a Mangsukog iti Baro a Personalidad.”

Maikadua nga Aldaw: Ti maikadua a simposium a, “Panangpatanor iti Dila Dagidiay Masirib” ibinsabinsana no kasano a ti baro a personalidad impluensiaanna ti panangusartayo iti dilatayo. Ti tema ti palawag publiko ket, “Parparmekenyo Kadi Daydiay Nadangkes?” Itampok daytoy ti pateg ti panagtalinaed a nasiput kadagiti taktika ni Satanas. Dagiti dua a maudi a palawag ti asamblea a, “Pagtalinaedenyo ti Bagiyo nga Awanan Mulit Manipud iti Lubong” ken “Inaldaw a Pabaruentayo ti Makin-uneg a Kinataotayo,” tulongannatayo a mangliklik kadagiti kababalin ken kondukta a di maitunos kadagiti nalinteg a dana ti Dios ken mangtaginayon iti naganetget a panagdayawtayo ken ni Jehova.

Anian a panangseggatayo iti daytoy a pammaregta a mangikawes ken mangtaginayon iti baro a personalidad!