Ipakaammoyo ti Dayag ni Jehova
1 Inwaragawag ti salmista: “Kantaanyo ni Jehova, dakayo amin a tattao iti daga. . . . Ti dayagna ideklarayo kadagiti nasion, kadagiti amin nga ili ti nakaskasdaaw nga ar-aramidna.” Bayat nga ut-utobentayo dagiti inaramid, ar-aramiden, ken aramidento pay ni Jehova nga agpaay kadatayo, matignay ti pusotayo a mangipakaammo iti dayagna!—Sal. 96:1, 3.
2 Iti Ministeriotayo: Pribilehio dagiti Saksi ni Jehova nga awiten ti nagan ti Dios ken idayaw dayta iti publiko iti intero a daga. (Mal. 1:11) Anian a naisupadi iti klero ti Kakristianuan, a sidudursok a nangikkat iti nagan ti Dios kadagiti patarus ti Bibliada! Naganat ti trabaho a panangipakaammo iti nagan ti Dios, gapu ta nasken a maaddaan iti pammati dagiti tattao nga umawag iti dayta a nagan tapno maisalakanda iti umad-adanin a dakkel a rigat. (Roma 10:13-15) Maysa pay, ti sapasap a talna, a mangsaklaw iti amin nga agnanaed iti daga, ket agpannuray iti pannakasantipikar ti nagan ti Dios. Kinapudnona, amin nga aramid ti Dios ket nainaig iti naganna.
3 “Ni Jehova naindaklan ken maidaydayaw iti kasta unay.” Ngem tapno dagiti tattao ‘maipaayda ken Jehova ti dayag a kukua ti naganna,’ nasken a maammuanda ti kinapudno maipapan kenkuana. (Sal. 96:4, 8) Ngem kuna dagiti dadduma nga awan ti Dios. (Sal. 14:1) Padpadaksen dagiti dadduma nga awan kano ti pannakabalinna, wenno ibagada a saan kano a maseknan kadagiti pasamak iti sangatauan. Maidaydayawtayo ni Jehova no tulongantayo dagiti naimbag-panagpuspusona a tattao a maaddaan iti umiso a pannakaammo maipapan iti Namarsua, dagiti panggepna, ken ti makaay-ayo a personalidadna.
4 Babaen ti Kababalintayo: Pakaidayawan ni Jehova ti panagbiag a maitunos kadagiti nalinteg a pagalagadanna. Saan a mailemmeng dagiti nasayaat a kababalintayo. (1 Ped. 2:12) Kas pagarigan, mabalin a raemen dagiti sabsabali ti nadalus ken nadalimanek a langatayo. Ipaayannatayo dayta iti gundaway a mangisarita kadagiti pagsayaatan ti panagbiag a maitunos kadagiti prinsipio a masarakan iti Sao ti Dios. (1 Tim. 2:9, 10) Anian a ragsaktayo no dagiti sabsabali ‘makitada dagiti nasayaat nga aramidtayo ket idayawda ti Amatayo nga adda iti langlangit’!—Mat. 5:16.
5 Babaen ti sao ken aramid, ipadayagtayo ti natan-ok a Diostayo iti inaldaw, kas panangipangag iti makaparag-o nga awis a: “Kantaanyo ni Jehova, bendituenyo ti naganna. Iti inaldaw-aldaw ibagayo ti naimbag a damag ti panangisalakanna.”—Sal. 96:2.