Ti Eskuelaan a Tumulong Kadatayo a Mangaramid iti Praktikal nga Aplikasion
1 Bayat nga usigentayo ti material a nailista iti Eskediul iti Teokratiko nga Eskuelaan ti Panagministro para iti 2006, ikagumaantayo ti magunggonaan kadagiti Nainkasuratan a pannursuro babaen ti panangyaplikartayo kadagita iti sagrado a panagserbi ken iti inaldaw a panagbiagtayo. Siguraduentayo nga ipakat dagiti banag a maadaltayo.—Juan 13:17; Fil. 4:9.
2 Panagkomento: Iti eskediul iti daytoy a tawen, adda nailatang a kanayonan a minuto para iti panagkomento ti tallaong kadagiti tampok iti Biblia. Kaipapanan daytoy a ti kabsat a mangiparang kadagiti tampok iti Biblia masapul nga iringpasna ti pasetna iti lima a minuto imbes nga innem. Dagidiay agkomento nasken met a sipapanunotda iti oras. Buyogen ti naannad ken nasakbay a panagpanunot, ti agkomento mabalin nga iyebkasna ti makatulong nga impormasion iti 30 segundo wenno ab-ababa pay. Agarup sangapulo nga indibidual ti makaipaay kadagiti nabagas a komento bayat ti nailatang a lima a minuto a pannakipaset dagiti agdengdengngeg.
3 Dagiti Palawag a Makaisuro: Dagiti tampok iti Biblia ken ti makaisuro a palawag ket masapul a maipamaysa iti pateg ti material nga agaplikar iti ministeriotayo ken iti dadduma pay nga aspeto ti inaldaw a panagbiagtayo. Ti ispiker saanna laeng koma a gutugoten nga agtignay dagiti dumdumngeg kenkuana. Rumbeng nga espesipiko nga ibagana no ania ti masapul nga aramiden, ipakitana no kasano a maitungpal dayta, ken iturongna ti atension kadagiti pagimbagan ti panangaramid iti kasta a tignay. Mabalin a kunaenna, “Kastoy ti panangiwanwan kadatayo daytoy a teksto,” wenno “Kastoy ti mabalin a panangusartayo kadagitoy a teksto iti ministerio.” Dagiti panglakayen ken ministerial nga adipen a makaammo kadagiti lokal a kasasaad ikagumaanda koma a pagbalinen nga espesipiko aginggat’ mabalin ti praktikal nga aplikasion ti material.
4 Nangnangruna nga epektibo iti panangaramid iti praktikal nga aplikasion ti panangdakamat kadagiti ehemplo iti Biblia. Kalpasan a dakamaten ti maysa a Nainkasuratan nga ehemplo, mabalin a kunaen ti ispiker, “Mabalin a maipaspasangokayo met iti umasping a kasasaad.” Siguraduenna nga aniaman ti pangyaplikaranna iti ehemplo iti Biblia ket maitunos iti konteksto, iti intero a Biblia, ken iti impablaak ti “matalek ken masirib nga adipen.”—Mat. 24:45.
5 Ti sirib isu ti abilidad a mangusar a sibaballigi iti pannakaammo ken pannakaawat. “Ti sirib isu ti kangrunaan a banag.” (Prov. 4:7) Bayat nga itultuloytayo ti gumun-od iti praktikal a sirib babaen ti panagadaltayo iti Teokratiko nga Eskuelaan ti Panagministro, parang-ayentayo met ti abilidadtayo a mangiranud iti dayta kadagiti sabsabali.