Mangipakita iti Personal nga Interes—Babaen ti Panagbalin a Nakonsiderasion
1 Nupay ni Jehova ti Soberano iti Uniberso, isu ket naasi, nakonsiderasion, ken naimbag iti pannakilangenna kadagiti imperpekto a tattao. (Gen. 13:14; 19:18-21, 29) Sumayaat ti panangidatagtayo iti naimbag a damag no tuladentayo ti nakonsiderasion a Diostayo. (Col. 4:6) Saan laeng a basta panagbalin a nadayaw wenno managraem no iti panagsasaotayo ti ramanen daytoy.
2 Iti Binalaybalay: Kasano no saan a kombeniente wenno okupado unay ti bumalay iti tiempo nga isasarungkartayo? Masapul nga ikabilangantayo dagiti kasta a kasasaad babaen ti panangyababa iti presentasiontayo wenno panangibaga nga agsublitayto laengen iti sabali a tiempo. Saantayo koma nga ipilit nga ipaima dagiti literaturatayo no saan a kayat nga awaten dagiti tattao. Ti panangipakita iti konsiderasion kadagiti sabsabali tignayennatayo met a mangikabilangan kadagiti sanikuada, kas iti panangiserra iti ruangan ken ridawda, ken panangsanay kadagiti annaktayo a mangaramid met iti kasta. Masapul a siguraduentayo nga aniaman a literatura nga ibatitayo kadagiti pagtaengan nga awan dagiti bumalayna ket saan a makitkita dagiti aglabas. Wen, ti panagbalin a nakonsiderasion tignayennatayo a mangtrato kadagiti sabsabali iti wagas a kayattayo a panangtratoda kadatayo.—Luc. 6:31.
3 Iti Panangasaba iti Lansangan: Bayat a mangaskasabatayo iti lansangan, maipakitatayo ti konsiderasion no ditay serraan dagiti pagnaan ken ditay aguummong iti sanguanan dagiti lugar ti negosio. Siputantayo a naimbag ti kasasaad dagiti sabsabali. Dagidiay laeng makaiwaya iti sumagmamano a minuto ti kasaritatayo saan a dagidiay agdardaras. No dadduma, gapu iti arimbangaw iti lansangan, nalabit nasken nga ipigpigsatayo ti agsao tapno mangngegda ti ibagbagatayo. Ngem kontrolado koma ti panangaramidtayo iti kasta, saan a tapno mangalatayo iti atension.—Mat. 12:19.
4 Iti Panangasaba Babaen ti Telepono: Ti panangipakita iti konsiderasion kadagiti sabsabali tignayennatayo a mangasaba babaen ti telepono iti naulimek a lugar. Maipakitatayo ti nasayaat a kababalin no dagus nga iyam-ammotayo ti bagbagitayo ken ilawlawagtayo no apay nga immawagtayo. No direkta nga agsaotayo iti auditibo ken taginayonen ti naalumamay a tono, maguyugoy dagiti sabsabali a makiraman iti makapabileg a saritaan maipapan kadagiti Nainkasuratan a banag. (1 Cor. 14:8, 9) Babaen ti panagbalin a naasi, nakonsiderasion, ken nadayaw kadagitoy a nagduduma a wagas, matuladtayo ti nakonsiderasion a Diostayo, ni Jehova.