Ipatpategtayo Dagiti Pribilehiotayo!
1 Iti intero a pakasaritaan ti tao, nadumaduma a pribilehio ti impaay ni Jehova kadagiti adipenna. Inikkanna ida kadagiti pribilehio, lalakida man wenno babai, aniaman ti edadda, wenno kasasaadda iti biag. (Luc. 1:41, 42; Ara. 7:46; Fil. 1:29) Ania dagiti pribilehio nga ipapaayna kadatayo ita?
2 Ti Dadduma Kadagiti Pribilehiotayo: Pribilehiotayo ti agpaisuro ken Jehova. (Mat. 13:11, 15) Tagtagiragsakentayo met ti pribilehio a mangidaydayaw ken Jehova babaen kadagiti komentotayo kadagiti gimong. (Sal. 35:18) Sigagagartayo nga agkomento no adda gundawaytayo. Kasta met, no ibilangtayo a pribilehio ti tunggal annongentayo iti kongregasion, aramidentayo ti amin a kabaelantayo a mangitungpal iti dayta. Regular kadi a makiramramantayo iti pribilehio a panangdalus ken panangmantener iti Kingdom Hall?
3 Nupay riniwriw ti agduadua no ipangpangag met laeng ti Dios dagiti kararagda, ibilangtayo a pribilehio ti panangipangag ti katan-okan a Persona iti uniberso kadagiti kararagtayo. (Prov. 15:29) Ni Jehova a mismo ti umim-imdeng kadagiti kararag dagiti adipenna. (1 Ped. 3:12) Saanna a kedngan ti kasansan ti iyaadanitayo kenkuana. Anian a nagpateg a sagut daytoy, a mabalintay ti agkararag iti “amin a gundaway”!—Efe. 6:18.
4 ‘Katrabahuan ti Dios’: Maysa kadagiti kasayaatan a pribilehiotayo ti panagbalin a ‘katrabahuan ti Dios’ iti panangiwaragawag iti naimbag a damag maipapan iti Pagarian ti Dios. (1 Cor. 3:9) Makapnek ken makapabang-ar a trabaho daytoy. (Juan 4:34) Saan a kasapulan a tattao ti usaren ni Jehova a mangitungpal iti trabahona, ngem intedna kadatayo daytoy nga annongen kas ebkas ti ayatna. (Luc. 19:39, 40) Gapu ta kasta, saan nga inted ni Jehova daytoy a pribilehio iti uray asino lattan. Dagidiay makiraman iti trabaho a panangasaba masapul a maragpat ken mataginayonda dagiti kualipikasion a nailanad iti Biblia. (Isa. 52:11) Ipakpakitatayo kadi ti panangipategtayo iti pribilehio a panangasaba babaen ti panamagbalintayo iti dayta a napateg a paset ti linawas a rutinatayo?
5 Dagiti pribilehio a naggapu ken Jehova pagbalinenda a makapnek ti biagtayo. (Prov. 10:22) Saantay koma a tagtagibassiten dagita! No ipakitatayo a pudpudno nga ipatpategtayo dagiti pribilehiotayo, maay-ayo ti nailangitan nga Amatayo, ti Gubuayan ti “tunggal naimbag a sagut ken tunggal naan-anay a rangkap.”—Sant. 1:17.