Baro a Programa ti Aldaw ti Espesial nga Asamblea
Ti tema ti programa ti aldaw ti espesial nga asamblea para iti 2008 ket ‘Datayo ti Pila—Ni Jehova ti Agdamdamili,’ a naibatay iti Isaias 64:8. Ti Nainkasuratan a pammagbaga a magun-odantayo iti daytoy a programa parayrayenna ti panangapresiartayo iti kinasirib, kinahustisia, pannakabalin, ken ayat ti Naindaklan nga Agdamdamili.
Ti palawag ti manangaywan iti sirkito a napauluan iti “Panagserbi iti Ministerio kas Nadayaw a Basehas” ipakitana no kasano a dagiti umad-adu nga agdaydayaw ken Jehova tagtagiragsakenda ti nabaknang a bendision nga itden ti pannakaammo iti kinapudno ken ti panangiranud iti dayta kadagiti sabsabali. Ti palawag a “Ti Panagmennamenna Saluadannakayo” ipakitana no kasano a salaknibannatayo ti napasnek a panangutob kadagiti nalinteg a prinsipio ni Jehova. Ti bumisbisita nga ispiker ipalawagna dagiti tema a “Dikay ‘Agpasukog iti Daytoy a Sistema ti Bambanag’” ken “Agpasukogkayo iti Naindaklan nga Agdamdamili.” Sigurado a makaparegta kadagiti nagannak ken agtutubo dagiti paset a “Dagiti Agtutubo nga Us-usaren ni Jehova” ken “Ti Napateg nga Akem Dagiti Nagannak iti Panangsukog.” Babaen kadagiti demostrasion ken interbiu, maragsakantay la ketdi a dumngeg ken mangammo iti magapgapuanan dagiti kakabsat iti ministerio. Dagidiay agtarigagay a mangisimbolo iti dedikasionda iti Dios babaen ti panagpabautisar masapul a pakaammuanda ti mamangulo a manangaywan iti kabiitan a panawen. Diyo liplipatan nga itugot Ti Pagwanawanan a maadal iti aldaw ti espesial nga asamblea.
Ti Naindaklan nga Agdamdamili tungpalenna ti aniaman a pinanggepna. Ngem adda iti tunggal maysa kadatayo no kayattayo ti agpasukog kenkuana. Kas iti pila nga adda iti bibilan, wenno pagsukogan, agbalin a naserbi a basehas dagidiay situtulok nga agpasukog ken agpapulido kenni Jehova. No makikooperartayo ken Jehova, maitandudotayo ti kinasoberanona ken umawattayo iti adu a bendision.