Saludsod

◼ Maiparbeng kadi iti maysa a Saksi ni Jehova ti agpaagas wenno agpaaywan iti maysa nga ospital wenno pagaywanan kadagiti lallakay ken babbaket nga imatmatonan ti maysa a narelihiosuan nga organisasion?

Adda dagiti nagduduma a narelihiosuan nga organisasion nga addaan kadagiti ospital wenno pagaywanan kadagiti lallakay ken babbaket a mangipapaay iti serbisio mainaig iti pannakaaywan ti salun-at wenno pannakaasikaso dagiti addaan iti nakaro a sakit. Kaaduanna, saan a nairanta dagita a mangitandudo iti Babilonia a Dakkel. (Apoc. 18:2, 4) Nalabit kas panguartaan laeng ti damo a panggep ti narelihiosuan nga organisasion a nangipasdek iti dayta. Adda dagiti ospital ita a narelihiosuan ti naganda gapu ta narelihiosuan nga organisasion ti nangipasdek idi kadagita, idinto ta dagiti dadduma ket mabalin nga addaan pay laeng kadagiti empleado a miembro ti klero.

No ti maysa a Saksi ni Jehova ket masapul a mayospital wenno maipan iti pagaywanan, nasken nga isu ti mangikeddeng no mapan iti pasilidad a nalabit adda pakainaiganna iti maysa a narelihiosuan nga organisasion. Ti ipalubos ti konsiensia ti maysa a tao ket mabalin a saan nga awaten ti konsiensia ti sabali. (1 Tim. 1:5) Adda dagiti kasasaad a mabalin a mangapektar iti desision ti maysa, ket makatulong ti panangusig kadagitoy.

Kas pagarigan, mabalin a ti ospital wenno pagaywanan nga addaan iti narelihiosuan a nagan ti kakaisuna nga adda iti asideg. Ket no adda sabali pay a pasilidad, nalabit a nasaysayaat ti serbisio nga ipapaay daydiay addaan iti pakainaigan iti narelihiosuan nga organisasion. Baka dayta nga ospital ti kakaisuna nga addaan iti kompleto nga alikamen a mausar iti panangagas iti maysa a sakit wenno dita ti ayan ti doktor wenno siruhano a mangopera kenka. No dadduma, dagiti ospital nga adda pakainaiganna iti narelihiosuan nga organisasion ket mabalin met a raemenda ti takdermo kas Kristiano no maipapan iti dara, idinto ta ti dadduma a pribado wenno lokal nga ospital ket saan. Sumagmamano laeng dagitoy kadagiti rumbeng nga usigem no agdesisionka mainaig iti papanam nga ospital.

No ikeddengmo ti mapan iti ospital wenno pagaywanan nga addaan iti pakainaigan iti narelihiosuan nga organisasion, mabalin a matmatam dayta a baybayadam laeng ti serbisio a naipaay kenka. Mabalinmo nga ibilang a ti narelihiosuan nga organisasion ket addaan iti maysa a negosio. Ti panangbayad iti serbisio nga ipapaay ti kasta a negosio ket saan a direkta a panangsuporta iti palso a relihion. Baybayadam laeng ti maysa a produkto wenno serbisio.

Siempre, kas maysa a Kristiano, siguraduem a saanka a makiraman iti aniaman nga aramid a mainaig iti palso a panagdayaw no addaka kadagiti kasta a kasasaad. Saan met a rumbeng nga awagam iti narelihiosuan a titulo, kas iti “Father” wenno “Sister,” dagidiay empleado wenno ti asinoman a bumisbisita iti dayta a pasilidad. (Mat. 23:9) Dimo liplipatan nga awanen ti sabali a rason ti kaaddam sadiay no di laeng ti panagpaospitalmo wenno gapu iti serbisio a kasapulam.

Apaman a maadmitirka iti ospital, ibagam a maysaka a Saksi ni Jehova ken kayatmo a bisitaendaka dagiti panglakayenyo. Ti rason ket tapno masigurado a maipaayanka iti naespirituan a pannaranay bayat ti kaaddam iti ospital.—1 Tes. 5:14.

Siguraduen koma dagiti Saksi a miembro ti pamilia, dagiti panglakayen, ken dagiti dadduma pay iti kongregasion a maasikaso a naimbag dagiti naespirituan a kasapulan dagiti lallakay ken babbaket a kakabsat nga adda kadagiti pagaywanan nga imatmatonan ti narelihiosuan nga organisasion. Ti napinget a panagregget iti daytoy a banag ket makaparegta unay kadagiti lallakay ken babbaket, ken dayta ti mangiliklik kadakuada a mailaw-an a makipaset kadagiti narelihiosuan a serbisio, selebrasion, wenno dadduma pay nga umasping nga aktibidad kadagita a pasilidad.

Ti panangpampanunot kadagitoy a punto tulonganna ti tunggal maysa a mangusig iti amin a kasasaad a nairaman sa kalpasanna, mangikeddeng no ania nga ospital wenno pagaywanan ti papananna.—Gal. 6:5.