Laglagipenyo Dagiti Adda Kadagiti Nursing Home
1. Apay a masapul a maidanon ti naimbag a damag kadagiti adda iti nursing home?
1 Adu dagiti tattao nga agsagsagaba iti epekto ti panaglakay ken panagbaket. (Ecl. 12:1-7) Ti dadduma a lallakay ken babbaket ket agnanaed kadagiti nursing home, isu a posible a saantayo a makasabaan ida iti binalaybalay. Pudno daytoy uray kadagiti lugar a gagangay a makipagnaed dagiti nataengan a nagannak kadagiti annakda wenno kadagiti kabagianda. Nupay mabalin a saanen a makagawgaway wenno nakapuyen ti memoriada, kabaelan latta dagiti nataengan ken ti dadduma pay nga agnanaed kadagiti nursing home ti agsursuro, mangapresiar, ken mangayat ken ni Jehova. Kasanotayo a maidanon kadakuada ti naimbag a damag ti “naragsak a namnama”?—Tito 2:13.
2. Kasanotayo a makaala iti listaan dagiti sarungkarantayo a nursing-care facility?
2 Umuna nga Addang: Mabalin ti mangala iti listaan dagiti nursing-care facility iti Internet wenno iti telephone directory. Kitaenyo laeng ti kategoria a mabalin a nakailistaan dagiti nursing home. Mabalin a ti manangaywan iti serbisio ti mangyurnos kadagiti kualipikado nga agibumbunannag a mangsarungkar iti tunggal pasilidad. No agplanotayo a naimbag ken agpannuraytayo ken ni Jehova, posible a makairugitayo iti grupo ti panangyadal iti Biblia.—Prov. 21:5; 1 Juan 5:14, 15.
3, 4. (a) Siasino ti asitgantayo no iruangantayo ti grupo a panagadal? (b) Kasanotayo nga ilawlawag ti urnos a panagadal?
3 Ti wagas a panangiruangan iti panagadal ket agdepende iti kita ti pasilidad. Kadagiti dadakkel a pasilidad nga aduan iti residente ken empleado, nasaysayaat a saludsodenyo iti receptionist no mabalin a kasarita ti direktor. Kadagiti babassit a nursing home para kadagiti nataengan—a manmano ti residente ken dua wenno tallo laeng ti caregiver—mabalin a nasaysayaat no kasaritayo a mismo ti makinkukua iti dayta a pasilidad.
4 Dakkel man wenno bassit ti pasilidad, ilawlawagyo a kayatyo a tulongan nga awan bayadna dagiti mayat nga agbasa ken agadal iti Biblia. Saludsodenyo no adda residente a mayat a makiraman iti grupo a panagadal iti Biblia iti agarup 30 a minuto iti kada lawas. Adu a publikasion ti mabalin nga usaren ngem natakuatan ti adu nga epektibo Ti Librok Dagiti Estoria ti Biblia ken Ti Katan-okan a Tao a Nagbiag Pay Laeng. Nalabit kayatyo nga ipakita dagiti publikasion iti direktor. Pagtungtonganyo ti aldaw, oras, ken pakaangayan ti panagadal ken gagangay a mairaman dayta iti eskediul dagiti aktibidad iti nursing home. Saankayo nga agbain a mangyam-ammo iti bagiyo kas Saksi ni Jehova. Ilawlawagyo met iti direktor a saankayo a mangikondukta iti narelihiosuan a serbisio, no di ket isuroyo laeng ti maipapan iti Biblia.
5. Ania dagiti praktikal a singasing a mamagbalin iti panagadal a makaparagsak ken makagunggona?
5 Pannakaikondukta ti Panagadal: Ti pannakaikondukta ti panagadal ket agdepende iti kasasaad ti pasilidad, isu nga usarenyo ti pannakaawatyo ken ibagayyo ti pamay-anyo a mangyadal. Masapul a mangitugot ti mangyadal iti sumagmamano a kopia ti publikasion a mausig ken kolektaenna dagita kalpasan ti panagadal. Mabalin a nasayaat ti mangitugot kadagiti kopia a dadakkel ti letrana para iti dadduma. Mabasa dagiti parapo ken adda maibangon a saludsod a masungbatan, kas iti gagangay nga ar-aramidentayo. Mabalin nga ipabasa dagiti parapo wenno teksto iti Biblia kadagiti makabael ken mayat nga agbasa. Naganaygay koma ti panangyadalyo, agbalinkayo a positibo, ken mannakigayyem. No ipalubos ti direktor, mabalinyo nga ipabuya sagpaminsan dagiti video ti organisasiontayo a mangpatanor iti pammati iti Biblia wenno mangitampok kadagiti leksion iti maysa a salaysay iti Biblia. Nalabit posible a maluktan ken maserraan ti panagadal iti ababa a kararag. Adda pay ketdi dagiti agibumbunannag a nangiraman kadagiti kanta ti Pagarian.
6. Ania ti aramidenyo no adda saan nga umanamong iti ad-adalenyo?
6 Kasano no adda residente a saan nga umanamong iti naibasa wenno naibaga bayat ti panagadal? Agbalinkayo a nataktika no sumungbatkayo. (Col. 4:6) Nalabit mangibagakayo iti teksto iti Biblia a mangilawlawag iti dayta. Ngem no saan a praktikal, mabalin a nasayaat no apresiarenyo ti opinionna sa ibagayo a pagsaritaanyo dayta kalpasan ti panagadal.
7. Ania ti mabalinyo nga aramiden no adda personal a saludsod ti residente wenno no interesado unay?
7 No dadduma, mabalin nga agsaludsod ti residente wenno ibagana a kayatna a maammuan ti ad-adu pay. Kastoy ti ar-aramiden ti maysa a kabsat a babai: “Nagsayaat ti saludsodyo. Ngem gapu ta personal a saludsodyo dayta, pagsaritaantanto kalpasan ti panagadal.” Masansan a posible ti mangyurnos iti personal a panangyadal iti Biblia kadagiti interesado a tattao iti sabali nga oras ken lugar.
8. Kasano ti pannakaireport dagiti panagadal a maikondukta kas grupo ken kas indibidual?
8 Gagangay a nasaysayaat no saan a masukansukat dagiti Saksi a mangikondukta iti grupo a panangyadal iti pasilidad. Ti siasinoman nga agibumbunannag a makiraman mabalinda nga ireport dayta kas oras. Apaman a maipasdek ti panagadal, ti agibumbunannag a mangidadaulo mabalinna nga ireport kas panagsarungkar ti tunggal panangikonduktana ken maysa a panangyadal iti Biblia iti tunggal bulan. Dagiti panangyadal a maikondukta iti tunggal residente a makabael a mangtarus ken agsursuro ket maireport a kas iti gagangay.
9, 10. Ania dagiti kualidad a kasapulan iti daytoy a trabaho? Ilawlawagyo.
9 Panangitultuloy iti Panagadal: Nasaysayaat no adda naikeddeng nga aldaw ken oras ti grupo a panagadal. Ekspektaren dagiti residente ken empleado a maangay dayta a regular ken mangrugi ken maileppas iti umiso nga oras. (Mat. 5:37) Gapuna, napateg ti panangtungpal iti kari, kinapinget, ken panagbalin nga organisado. Ipakita dagiti kapadasan a nasayaat no dua a kualipikado nga agibumbunannag ti agtinnulong a mangikondukta iti grupo a panagadal. (Ecl. 4:9, 10) Kadagiti dadakkel a pasilidad, mabalin a kasapulan ti ad-adu nga agibumbunannag.
10 Napateg met ti personal nga interes ken panagbalin a mannakigayyem. (Fil. 2:4) Iti damo nga ibibisita, ikagumaanyo nga am-ammuen ti amin a tumabuno. Isurat ken ikagumaanyo nga ikabesa ti naganda sakbay ti sumaruno a panagadal. Komportable ti amin ken mariknada a maap-apresiarda no naanus ken naasikayo.
11. Kasano a maipakita dagiti mangikonkondukta iti grupo a panagadal ti panagraemda kadagiti empleado ken kapamilia dagiti residente?
11 Napateg met a raemen ken agbalintayo a nasingpet kadagiti empleado ti pasilidad ken kapamilia dagiti residente. Apaman a maipasdek ti panagadal, nasayaat no saanyo a baliwan ti oras wenno pormat ti panagadal no saanyo pay a nakasarita ti direktor. Sagpaminsan a saludsodenyo iti direktor no ania ti makunana iti panagadal. No bumisita dagiti kapamilia dagiti residente bayat ti panagadal, dakayo koma ti umuna a makiam-ammo kadakuada. Ilawlawagyo ti panggep ti panagadalyo. Ibagayo a maseknankayo iti miembro ti pamiliada ken awisenyo ida nga agtugaw ken dumngeg iti panagadal.
12, 13. Mangisalaysaykayo kadagiti kapadasan a mangipakita iti pagsayaatan ti panangipaay iti panangsaksi kadagiti nursing home.
12 Resulta: Nagsayaat ti report dagiti agdaldaliasat a manangaywan ken kongregasion maipapan iti resulta daytoy a pamay-an ti panagserbi. Iti maysa a nursing home, agarup 20 a residente ti timmabuno iti umuna a panagadal. Nagresulta daytoy iti innem nga indibidual a panagadal. Ti maysa kadakuada ket nabautisaran idi agangay. Iti sabali pay a nursing home a pakaang-angayan ti panagadal, adda baket nga agtawen iti 85 a natignay a makitimpuyog iti kongregasion ken imbagana a kayatna ti mabautisaran. Idi inkeddeng ti maysa a pasilidad a pagkaykaysaen ti amin nga aktibidadna ket pinasardengna ti grupo a panagadal nga ikonkondukta dagiti Saksi ni Jehova, nagreklamo dagiti residente iti direktor ti pasilidad! Idi agangay, nairugi manen ti panagadal ket 25 agingga iti 30 ti timmabuno.
13 Saan laeng a dagiti residente kadagiti nursing home ti mangap-apresiar iti ayat a maipakpakita kadakuada. Kas pagarigan, gagangay nga adda dagiti empleado a makiramraman iti panagadal. Ti panangikagumaantayo a mangipakita iti personal nga interes kadagiti residente iti nursing home ket mangipaay met iti nasayaat a panangsaksi iti komunidad. (1 Ped. 2:12) Kalpasan a naammuanna ti panggep ti panagadal, kinuna ti maysa nga administrador: “Apay nga ita laeng nga immaykayo? Kaanokayo a mangrugi?” Insurat ti sabali pay a direktor: “Irekomendak daytoy a grupo a panagadal iti aniaman a nursing home iti daytoy a lugar. Ipapaay dagiti Saksi ni Jehova daytoy a serbisio nga awan bayadna kas paset ti panagdaydayawda.” Ti maysa a nursing home iti Hawaii inikkanda dagiti Saksi ni Jehova iti Volunteer Service Award a mangdesdeskribir kadagiti boluntario kas “di magatadan a gameng” para kadagiti residente iti dayta a pasilidad.
14. Apay a kayattayo a tulongan dagiti adda kadagiti nursing home?
14 Aw-awisen ni Jehova dagiti nataengan nga agdayaw kenkuana. (Sal. 148:12, 13) Dayta nga awis ramanenna dagiti adda kadagiti nursing home. Adda kadi nursing home iti teritoriayo nga ayan dagiti nataengan a mabalinyo a pangidanonan iti naimbag a damag? Babaen ti tulong dagiti panglakayen ken direktor kadagiti nursing home, makaipaaytayo iti nasayaat a panangsaksi kadagiti adda iti nursing home. Tultuladentayo ni Jehova no laglagipentayo dagiti lallakay ken babbaket.—Sal. 71:9, 18.