No Sabali ti Lenguahe ti Bumalay
1. Apay nga ad-adda a nasken ti panagtitinnulong no iti panangwanas iti teritoria?
1 Dagiti agibumbunannag iti Pagarian iti intero a lubong umad-adu ti mabirbirokanda nga interesado a tattao a sabali ti lenguahena. Tapno matulongan dagita iti naespirituan, adu a sanga nga opisina ti nangikeddeng a mangbuangay kadagiti grupo ken kongregasion a mausar ti pagsasao dagiti interesado a tattao. Yantangay sumagmamano a lenguahe ti nalabit maus-usar iti maysa a lugar, mabalin a mangasaba iti dayta met laeng a teritoria ti sumagmamano a kongregasion a nagduduma ti lenguahena. Kasano a makapagtitinnulong dagiti kongregasion tapno masigurado a naurnos ti pannakaaramid ti trabaho a panangasaba?—1 Cor. 14:33.
2. No mangaskasabatayo iti binalaybalay, kasanotayo a makikooperar kadagiti kabangibangtayo a grupo wenno kongregasion a sabali ti lenguahena?
2 Nasayaat a Panagtitinnulong: Bayat ti panangasaba iti lansangan wenno iti di pormal, masapul a saan a bumdeng ti agibumbunannag a makisarita iti siasinoman, a pakairamanan dagidiay sabali ti lenguahena, ken mangitukon iti literatura iti lenguahe a kayat a basaen ti makasabaanna. Ngem no mangasabatayo iti binalaybalay iti teritoria a wanwanasen met dagiti grupo wenno kongregasion a sabali ti lenguahena, ti agibumbunannag ket masapul a mapan laeng kadagiti pagtaengan nga agsasao iti lenguahe nga us-usaren ti kongregasionna. No nagduduma a kongregasion ti mangaskasaba iti isu met laeng a teritoria, nagpateg no adda urnos maipapan iti panangwanas iti dayta. Masapul nga adda komunikasion dagiti manangaywan iti serbisio ken organisarenda dagiti bambanag iti wagas a makagunggona iti amin. (Prov. 11:14) Nupay kasta, no ti agibumbunannag ket adda makasabaanna a bumalay a sabali ti lenguahena ken awan ti kongregasion iti asideg nga agus-usar iti kasta a lenguahe, masapul a kasabaan ken surnadanna ti interes dayta a tao.
3. No mangasabatayo iti maysa a teritoria, ania ti rumbeng a reaksiontayo no maranaantayo a mangaskasaba met sadiay dagiti agibumbunannag iti grupo wenno kongregasion a sabali ti lenguahena?
3 Isu met Laeng a Trabaho: Kasanon no dagiti agibumbunannag iti nagduduma a kongregasion ket nagrarana a mangasaba iti isu met laeng a teritoria? Siempre, ti Nakristianuan nga ayat ti manglab-aw iti aniaman a nagdudumaan iti lenguahe ken agpapada koma a maseknanda amin kadagiti tattao iti teritoria. (Juan 13:34, 35) Gapuna, dagidiay mangidadaulo iparangarangda koma ti kinanainkalintegan ken ayat iti panangikeddengda no ania a grupo ti umakar pay laeng iti sabali a teritoria.—Sant. 3:17, 18.
4. Ania a padto ti matungtungpal ita?
4 Impadto ti Biblia a dagiti tattao a nagduduma ti lenguahena dumngegdanto iti naimbag a damag. (Apoc. 14:6, 7) No adda kooperasion dagiti amin nga agibumbunannag, maliklikan ti pannakaulit ti ipapan kadagiti isu met la nga isu a pagtaengan, iti kasta ad-adu pay a kabbaro ti pakaidanonan ti naimbag a damag, a pakairamanan dagidiay sabali ti lenguahena.—Efe. 4:16.