PANAGBIAG KAS KRISTIANO
Agtitinnulong a Mangasaba iti Teritoria a Nagduduma ti Lengguahena
Masansan nga ad-adda nga awaten dagiti tattao ti mensahe ti Pagarian no mangngegda iti bukodda a lengguahe. Mabalin a dayta ti makagapu nga idi Pentecostes 33 C.E., inyurnos ni Jehova a dagiti nadayaw a ‘Judio manipud iti tunggal nasion iti baba ti langit’ mangngegda ti naimbag a damag iti ‘bukodda a pagsasao,’ nupay mabalin a makasaoda iti lengguahe a maawatan ti kaaduan, kas iti Hebreo wenno Griego. (Ara 2:5, 8) Kadagiti lugar nga agduduma ti maus-usar a lengguahe, mabalin a maymaysa a teritoria ti as-asaken dagiti kongregasion nga agduduma ti lengguahena. Kasano a makapagtitinnulong dagiti agibumbunannag kadagita a kongregasion tapno makasabaanda ti amin ken saan a maulit-ulit a makasabaan dagiti bumalay a mabalin a pakasuronanda?
Agsasarita (Pr 15:22): Masapul a pagsasaritaan dagiti manangaywan iti serbisio no ania ti kasayaatan a pamay-an a maikasaba ti naimbag a damag. No bassit ti teritoria ti kongregasionda, mabalin a kayat dagiti kongregasion a sabali ti lengguahena a labsanyo dagiti balay a sakup ti teritoriada. Ngem no saanda a regular a mawanas ti amin a teritoriada gapu ta agaaddayo, mabalin a kiddawenda nga awan ti labsanyo a balay ngem ipakaammoyo kadakuada no adda interesado a masarakanyo iti teritoriada. (od 93 ¶37) Wenno mabalin a kiddawenda iti kongregasionyo a tulonganyo ida nga agbirok kadagiti agsasao iti lengguahe ti kongregasionda ken no ania nga adres dagita a tattao ti mayakar iti teritoriada. (km 7/12 5, kahon) Laglagipenyo nga iti dadduma a kasasaad, saan la a maymaysa a lengguahe ti maus-usar iti maysa a balay. Dagiti urnos iti panangwanas iti teritoria ket rumbeng a maitunos kadagiti linteg a manglimitar iti panangusaryo kadagiti impormasion maipapan kadagiti umili, no adda man dagita.
Agtitinnulong (Efe 4:16): Siaannad a surotenyo dagiti instruksion ti manangaywan iti serbisio. Adda kadi iyad-adalam iti Biblia a kaykayatna nga usaren ti lengguahena imbes a ti lengguahe ti kongregasionyo? Mabalin a naparpartak a rumang-ay ti mayad-adalan no itedmo iti asideg a kongregasion wenno grupo nga agus-usar iti lengguahena.
Agsagana (Pr 15:28; 16:1): No sabali ti lengguahe ti makasaritam iti teritoriayo, ikagumaam nga iranud ti naimbag a damag. Makapagsaganaka no ammuem dagiti lengguahe a maus-usar iti teritoriayo ken nasaksakbay nga i-download-mo dagiti video ken agduduma a patarus ti Biblia iti gadyetmo. Mabalinmo met nga usaren ti JW Language app tapno masursurom dagiti pangkablaaw iti dadduma a lengguahe.