Baro a Programa ti Aldaw ti Espesial nga Asamblea
Ti tema ti programa ti aldaw ti espesial nga asamblea iti tawen 2009 ket “Itultuloymo nga Aluadan ti Ministerio . . , a Tungpalem Dayta,” a naibatay iti Colosas 4:17. Kas Kristiano, ipappapusotayo dayta a balakad. Panggeptayo nga itungpal a simamatalek ti ministeriotayo kas iti inaramid ni Jesus. (Juan 17:4) Nagsayaat met ti ulidan nga imbati ni apostol Pablo maipapan iti daytoy a banag. Isu ket determinado a mangiringpas iti ministeriona.—Ara. 20:24.
Ti paset ti manangaywan iti sirkito ipakitana no ania ti ar-aramiden dagiti agibumbunannag tapno mapagballigianda dagiti karit iti ministerioda. Kalpasanna, ti palawag a napauluan iti “Sukayenyo ti Immulayo” itampokna no kasanotayo a matulongan dagidiay “siuumiso nga agannayas iti agnanayon a biag.” (Ara. 13:48) Ti umuna a palawag ti bumisbisita nga ispiker ket napauluan iti “No Kasano ti Panangirekomendatayo iti Bagbagitayo kas Ministro.” Bersikulo por bersikulo daytoy a panangilawlawag iti 2 Corinto 6:1-10. Iti malem, ipalawagna ti tema nga “Ipategyo ti Ministerioyo.” Awan duadua a maparegtakayo kadagiti palawag a “Dagiti Ubbing ken Nataengan Tagtagiragsakenda ti Ministerio” ken “Dagiti Agtutubo a Mangitungtungpal iti Ministerio.” Dagidiay agtarigagay a mangisimbolo iti dedikasionda babaen ti panagpabautisar iti danum inton asamblea sirkito wenno aldaw ti espesial nga asamblea masapul a pakaammuanda ti mamangulo a manangaywan iti kabiitan a panawen. Ti panagadal iti Pagwanawanan ket napateg a paset dagiti amin nga asamblea ken kombensiontayo. Itugotyo ti kopiayo a maadal iti lawas ti aldaw ti espesial nga asamblea.
Tapno maaluadan ken maitungpaltayo ti ministeriotayo, siguraduentayo a dagiti dadduma a paginteresan ken aktibidad saanda nga agawen ti tiempo a nailatang iti ministerio nga intalek ni Jehova kadatayo. Ti Nainkasuratan a pammaregta a maipaay iti programa ti aldaw ti espesial nga asamblea tulongannatay amin a mangtarus no ania ti nasken nga aramidentayo tapno maipangpangrunatayo dagiti napatpateg a bambanag ken tulongannatay a mangamiris no ania ti ar-aramidentayo tapno naan-anay a maitungpaltayo ti ministeriotayo.