No Ania ti Ibaga No Itukon Dagiti Magasin

Ti Pagwanawanan Pebrero 1

“Iti panagkunayo, imdengan ngata ti Dios ti amin a kararag? [Palubosanyo a sumungbat.] Imutektekanyo ti kinuna ni Jesus maipapan iti dayta a banag. [Basaenyo ti Mateo 6:7.] Daytoy nga artikulo ipaayna ti sungbat ti Biblia kadagiti uppat a saludsod a masansan a mayimtuod mainaig iti kararag.” Itampokyo ti artikulo a mangrugi iti panid 16.

Agriingkayo! Pebrero

“Adu ti mamati a naikeddengen ti pagbanagantayo. Ania ti makunayo? [Palubosanyo a sumungbat.] Sigun iti daytoy a bersikulo, adda pagpiliantayo. [Basaenyo ti Deuteronomio 30:19.] Salaysayen daytoy nga artikulo no ania ti kuna ti Biblia maipapan iti predestinasion.” Itampokyo ti artikulo a mangrugi iti panid 12.

Ti Pagwanawanan Marso 1

“Iti panagkunayo, naikeddeng ngatan a nasaksakbay ti aniaman a mapasamak iti biag? [Palubosanyo a sumungbat.] Imutektekanyo no ania ti kuna ti Biblia maipapan iti daytoy. [Basaenyo ti Eclesiastes 9:11.] Ilawlawag daytoy a magasin a nupay impakpakauna ti Dios nga adda naraniag a masakbayan ti daga, impalubosna nga agpili ti tunggal maysa kadatayo iti bukodna a wagas ti panagbiag.”

Agriingkayo! Marso

“Kuarta ti parikut ti adu ita, nangruna ta rumigrigat ti kasasaad ti ekonomia. Umanamongkayo kadi iti dayta? [Palubosanyo a sumungbat.] Imutektekanyo daytoy natimbeng a balakad. [Basaenyo ti 1 Timoteo 6:8, 10.] Ilawlawag daytoy a magasin ti sumagmamano a prinsipio ti Biblia a tumulong kadatayo mangibadyet iti kuartatayo iti wagas a mangyeg iti talna ti panunot.”