Sisisigo nga Usarenyo ti Biblia
1. Apay a nakapatpateg ti Biblia?
1 Ti nasigo a panangusar iti naipaltiing a Sao ti Dios tulongannatayo a mangibunannag ken mangisuro a silalawag iti kinapudno ken mangibutaktak kadagiti palso a sursuro ken tradision ti tao.—2 Tim. 2:15; 1 Ped. 3:15.
2. Ania ti makatulong kadatayo nga agbalin a nasigo a mangbirok kadagiti teksto?
2 Kabesaduenyo ti Biblia: Makuna a nasigokayo a mangusar iti maysa a remienta no ammoyo nga usaren dayta. Umasping iti dayta, no basaenyo nga interamente ti Biblia, maalayo ti pakabuklanna. Tulongannakayo met daytoy a manglagip kadagiti teksto ken nalaklakayo la a mabirokan dagita. Bayat a makabkabesadoyo ti Kasuratan, rumayray ti regta ken kompiansayo a mangasaba iti di pormal ken iti pormal a pamay-an.—1 Tes. 1:5.
3, 4. (a) Ania ti sumagmamano a pamay-an a makatulong tapno ad-adda a makabesadotayo ti Biblia? (b) Adda kadi napadasanyo a sabali pay a pamay-an tapno ad-adda a makabesadoyo ti Kasuratan?
3 Iruamyo nga ukagen ti Bibliayo ken surotenyo ti pannakaibasa dayta kabayatan dagiti gimong ti kongregasion. Bayat ti personal a panagadal ken panagsaganayo kadagiti gimong, basaenyo dagiti naisitar a teksto sa utobenyo no ania ti aplikasionda. Napaneknekan ti adu a no basaenda dagiti teksto manipud iti mismo a Bibliada imbes nga iti monitor ti kompiuter wenno iti inyimprentada, nalaklakadanto a biroken dagita inton kasapulanda iti panangasabada.—Juan 14:26.
4 Adda dagiti pamilia a nangyurnos iti panawen a panagikabesada kadagiti teksto ti Biblia. Mabalin nga aramiden daytoy babaen ti panangusar kadagiti babassit a kard a ti maysa a bangirna ket nasuratan iti maysa a teksto sa iti likudanna ket ti linaon dayta a teksto. Agsisinnublatda a mangusar kadagita a kard tapno kitaenda no malagipda ti linaon dagita a teksto wenno no ania a teksto ti pakasarakan kadagita. No ensayuentayo dagiti presentasiontayo iti tay-ak ken dagiti isungbattayo no adda agkedked wenno agsaludsod, ad-adda a maasa ti kinasigotayo a mangusar iti Biblia.
5. Apay a masapul a nasigotayo a mangusar iti Biblia?
5 Awanen ti sabali a libro a kas kapateg ti Biblia. Daytoy laeng ti naglaon kadagiti surat a “mamagsirib [kadagiti tattao] maipaay iti pannakaisalakan.” (2 Tim. 3:15) Yantangay ti kaaduan a tattao iti teritoriatayo ket saan a pamiliar kadagiti napateg a gameng a linaon ti Biblia, nasken ngarud nga agbalintayo a nasigo iti panangisuro kadakuada iti linaon ti Biblia.—Prov. 2:1-5.