Ti Video a The Bible—Its Power in Your Life

Riniwriw a tattao ti natulonganen ti Biblia a mangpasayaat iti biagda. Ania dagiti sumagmamano a prinsipio iti Biblia, a no masurot, ket tulongannatayo a mangrisut kadagiti problematayo iti moderno a panawen? Sigurado a kayatyo a maammuan ti sungbat daytoy a saludsod babaen ti panangusigtayo iti video a The Bible—Its Power in Your Life, ti maikadua kadagiti tallo a video iti DVD a The Bible—A Book of Fact and Prophecy. Kalpasan ti panangbuyayo iti daytoy a video, masungbatanyo kadi dagitoy a saludsod?

(1) Apay a ti Biblia ket saan laeng a basta obramaestra iti literatura? (Heb. 4:12) (2) No ti Biblia matulonganna dagiti tattao a mangpasayaat iti biagda, apay ngarud a nagadu ti parikut ti sangatauan? (3) Ania ti kangrunaan a tema ti Biblia? (4) Ania dagiti teksto iti Biblia a makatulong kadagiti agassawa a (a) mangpasayaat iti komunikasionda ken (b) mangteppel iti pungtotda? (5) Kasano a ti Nakristianuan a panangmatmat iti panagasawa pasayaatenna ti biag ti pamilia? (Efe. 5:28, 29) (6) Kasano a nangipasdek ni Jehova iti perpekto nga ulidan para kadagiti nagannak? (Mar. 1:9-11) (7) Kasano a mapagbalin dagiti nagannak a makapainteres ti panagadal ti pamilia? (8) Malaksid iti panangyadal iti Biblia, ania pay ti iparparegta ti Sao ti Dios nga ipaay dagiti nagannak kadagiti annakda? (9) Kasano a ti balakad ti Biblia matulonganna dagiti pamilia a makalung-aw iti rigat ti biag? (10) Ania dagiti Nainkasuratan a prinsipio mainaig iti kinadalus, droga ken nalabes a panaginum iti arak, kasta met iti stress, a no mayaplikar ket maksayan dagiti parikut iti salun-at? (11) Ania dagiti kari iti Biblia a mangpabileg kadatayo? (Job 33:25; Sal. 145:16) (12) Kasano a dagiti pannursuro iti Sao ti Dios pinasayaatna ti kabibiagyo? (13) Kasanoyo nga usaren daytoy a video a tumulong kadagiti sabsabali?