Kitaenyo ti Bileg ti Biblia!

Kasano? Babaen ti panangbuyayo iti video a The Bible​—Its Power in Your Life. Dayta ti maikatlo a tomo kadagiti serye ti videocassette a napauluan iti The Bible​—A Book of Fact and Prophecy.

Kayatyo kadi ti naballigi a panagasawa? Kasapulanyo kadi ti tulong tapno malasatyo dagiti narikut a tiempo? Kasano a dumakkel dagiti agtutubo nga agbalin a responsable nga adulto? Makatulong ti Biblia, kas ipakita daytoy a video. Imdenganyo dagiti tattao a mangibaga iti nagsayaat a maaramidan ti bileg ti Biblia iti biagda. Imdenganyo ida a mangilawlawag no kasano a nakatulong kadakuada dagiti prinsipiona a nangsaranget kadagiti parikut ti moderno-aldaw a biag.

Daytoy a video ket nagpateg nga alikamen a pangtulong kadagiti kabbaro nga interesado tapno makitada dagiti pagimbagan ti panangusar iti Sao ti Dios kas giya iti biagda. Adda abasto iti Sosiedad a The Bible—Its Power in Your Life. Mabalinyo ti agkiddaw iti kopia babaen ti manangaywan iti literatura ti kongregasion.