Makairugikayo Kadi iti Panangyadal iti Biblia Kabayatan ti Oktubre?

1. Ania ti tukontayo iti Oktubre?

¹ Ti tukon iti Oktubre ket dagiti magasin a Pagwanawanan ken Agriingkayo! Iti panangsarungkar kadagiti interesado, maiparegta kadatayo nga usarentayo ti tract a Kayatmo Kadi a Maammuan ti Kinapudno? ken ikagumaantayo ti mangirugi iti panangyadal iti Biblia. Kasanotayo a maaramid daytoy no agsarungkartayo?

2. Kasanotayo nga usaren ti tract a Kayatmo Kadi a Maammuan ti Kinapudno? a mangirugi iti panangyadal iti Biblia no sarungkarantayo dagidiay immawat kadagiti magasin?

² No Kasano nga Usaren ti Tract: Mabalintayo a kunaen: “Dagiti magasin nga imbatik kadakayo paregtaenna dagiti amin a tattao a mangsukimat iti Biblia, aniaman ti kasasaad ken relihionda. [Ikkanyo ti bumalay iti tract a Kayatmo Kadi a Maammuan ti Kinapudno? sa ipakitayo dagiti saludsod iti umuna a panid.] Dagitoy ti sumagmamano kadagiti makapainteres a saludsod a ti laeng Biblia ti makaipaay kadagiti makapnek a sungbat. Naisalsaludsodyo kadin ti aniaman kadagitoy?” Kalpasan a sumungbat ti bumalay, usigenyo a dua ti sungbat ti tract iti maysa kadagiti saludsodna, ken basaenyo ti maysa kadagiti naisitar a teksto. Ilawlawagyo a maysa laeng daytoy kadagiti isursuro ti Biblia, sa ikkanyo iti libro nga Isursuro ti Biblia. Mabalintayo nga ilawlawag dagiti panglukat a parapo iti kapitulo a pinili ti bumalay manipud iti listaan dagiti linaon ti libro. Wenno mabalintayo a lukiben ti kapitulo a mangipaay iti kanayonan nga impormasion maipapan iti topiko a nailawlawag iti tract. Adtoy ti sumagmamano a reperensia a mabalintayo nga usaren:

● Maseknan kadi a talaga ti Dios kadatayo? (p. 9-11, par. 6-10)

● Agpatingganto pay ngata ti gubat ken panagsagaba? (p. 12, par. 12-13)

● Ania ti mapasamak kadatayo no mataytayo? (p. 59-60, par. 7-8)

● Adda ngata pay namnama agpaay kadagiti natay? (p. 71, par. 13-15)

● Kasano ti panagkararagko tapno ipangagnak ti Dios? (p. 166-167, par. 5-8)

● Kasano a masagrapko ti pudpudno a kinaragsak? (p. 9, par. 4-5)

3. Kasanotayo a mabaliwbaliwan ti pamay-antayo a mangiruangan iti panangyadal depende iti kasasaad?

³ No saan nga ipalubos ti kasasaad a mangirugi ken mangidemostratayo iti panangyadal iti Biblia babaen ti libro nga Isursuro ti Biblia iti damo nga isasarungkar, mabalintayo nga iyurnos ti sumarungkar manen tapno ituloytayo ti saritaan. Ken depende iti interes ti bumalay, mabalintayo ti mangilawlawag iti dua wenno ad-adu pay a saludsod iti tract iti sumagmamano nga isasarungkar sakbay nga iruangantayo ti libro. Sapay koma ta kabayatan ti Oktubre, usarentayo a naimbag daytoy a napateg a tract iti panangirugi iti panangyadal iti Biblia ken iti panangtulong kadagiti napudno ti panagpuspusona a tattao a ‘mangammo iti kinapudno.’—Juan 8:31, 32.