Ti Video a Jehovah’s Witnesses—Faith in Action, Part 1: Out of Darkness
Iti Biblia, ti lawag ket nainaig iti kinapudno, idinto ta ti sipnget ket nainaig iti kinaulbod. (Sal. 43:3; Isa. 5:20) Inyeg ni Satanas ti kinasipnget iti sangatauan idi inallilawna ni Eva, ket idi agangay, insaknapna ti kinasipnget iti intero a lubong. (Apoc. 12:9) Ti video a Jehovah’s Witnesses—Faith in Action, Part 1: Out of Darkness ipakitana no kasano a nagsilnag ti naespirituan a lawag manipud iti kinasipnget. (Isa. 60:1, 2) Kalpasan a mabuyayo ti video, masungbatanyo kadi dagitoy a saludsod?
(1) Kasano a timmaud ti nakaro a kinasipnget kalpasan ti ipapatay dagiti apostol? (2) Nangrugi kadagiti tawen iti 1100, ania dagiti pasamak a nakatulong kadagiti tattao a nakabigbig a saan nga isursuro ti simbaan ti kinapudno? (3) Siasino da Henry Grew ken George Storrs? (4) Ania dagiti pasamak iti biag ni Charles Russell nga addaan iti dakkel nga epekto kenkuana? (5) Kasano nga inkondukta da Kabsat Russell, ti tatangna, ken ti sumagmamano nga am-ammona ti panagadalda iti Biblia, ken ania ti naaramidda a Nainkasuratan a konklusion? (6) Apay a daytoy a grupo nga agad-adal iti Biblia ket naikadua iti grupo ni Nelson Barbour, ngem apay a simmina ni Kabsat Russell? (7) Ania ti napasamak idi Hulio 1879 a nangrugian ti panagraniag ti naespirituan a lawag? (8) Kalpasan dayta, ania ti inaramid dagiti Estudiante ti Biblia tapno maisaknap ti naimbag a damag? (9) Adu a tawen sakbayna, ania ti namnamaen dagiti Estudiante ti Biblia a mapasamak iti 1914? (10) Ania dagiti karit a nakaipasanguan dagiti Estudiante ti Biblia idi natayen ni Kabsat Russell? (11) Ania ti inaramid dagiti Estudiante ti Biblia idi nawayawayaan manipud iti pagbaludan da Kabsat Rutherford ken dagiti kakaduana? (12) Kasano a ti panangbuyam iti daytoy a video pinarayrayna ti panangapresiarmo iti organisasion ni Jehova? (13) Kasano a pinatibker daytoy a video ti determinasionmo nga agtultuloy a naregta a mangasaba iti laksid dagiti lapped? (14) Kasanotayo nga usaren daytoy a video a mangtulong kadagiti kabagiantayo, iyad-adalantayo, ken kadagiti dadduma?
Anian a nagpateg a naespirituan a tawid ti imbati kadatayo dagidiay a nagkauna nga Estudiante ti Biblia! Iti lubong a nasipnget iti naespirituan, natured ken naregtada kas managawit iti lawag. Sapay koma ta tuladentayo ti ulidanda ken ‘itultuloytayo ti magna kas annak ti lawag.’—Efe. 5:8.