Ti Video a Jehovah’s Witnesses—Faith in Action, Part 2: Let the Light Shine
Kalpasan a nawayawayaan iti pagbaludan da Kabsat Rutherford ken dagiti kakaduana idi 1919, adda dakkel a trabaho a rinugian dagiti Estudiante ti Biblia. Kas mabuya iti video a Jehovah’s Witnesses—Faith in Action, Part 2: Let the Light Shine, adu dagiti bimmusor kadagiti Estudiante ti Biblia, ngem nagtultuloy latta nga immuneg ti pannakatarusda iti Kasuratan, ken bimmileg ti pammatida. (Prov. 4:18; Mal. 3:1-3; Juan 15:20) Kalpasan a mabuyam daytoy a video, masungbatam kadi dagitoy a saludsod?
(1) Ania dagiti pamay-an nga inusar dagiti Estudiante ti Biblia a mangisaknap iti naimbag a damag? (2) Ania ti napasamak iti nakallalagip a kombension idi 1931 ken 1935? (3) Ania ti naisangsangayan iti Nobiembre 1, 1939 a ruar Ti Pagwanawanan? (4) Deskribirem ti napasamak iti Madison Square Garden kabayatan nga iparparang ni Kabsat Rutherford ti palawagna a “Government and Peace.” (5) Ania ti makapainteres iti palawag ni Kabsat Knorr a natemaan iti “Peace—Can It Last?” (6) Idi 1942, ania dagiti plano nga insayangkat dagiti Saksi ni Jehova tapno mapalawada ti trabaho a panangasaba? (7) Ilawlawagyo dagiti sumagmamano a kaso a naiyuli iti korte idiay Estados Unidos, Canada, ken Greece. (8) Ania ti naitulong ti eskuelaan ti Gilead iti irarang-ay ti trabaho a panangasaba? (9) Ania a nagpateg a trabaho ti nairugi idi 1946, ken apay? (10) Ania dagiti addang nga inaramid dagiti Saksi ni Jehova tapno masiguradoda a ti konduktada ket maitunos iti pagalagadan iti Biblia? (11) Ilawlawagyo dagiti sumagmamano a panagbalbaliw a naaramid kadagiti tawen ti dekada 1970 tapno masurot ti organisasion ti padron nga adda iti Biblia. (12) Kasano a ti panangbuyam iti daytoy a video pinaunegna ti pannakaammom a ni Jehova ti mangiturturong ken makinkukua iti daytoy nga organisasion? (13) Kasano a pinatibker daytoy a video ti determinasionmo nga agtultuloy a mangasaba a sireregta uray no adu dagiti lapped? (14) Kasanotayo nga usaren daytoy a video a tumulong kadagiti kakabagian ken iyad-adalantayo, ken kadagiti dadduma?
Bayat ti panaglabas ti tunggal aldaw, manaynayonan ti pakasaritaan dagiti Saksi ni Jehova. Mailanad ngata iti dayta a pakasaritaan dagiti panangikagumaantayo iti ministerio? Kas iti inaramid dagiti nagkauna a kakabsattayo, sapay koma ta sireregta nga itultuloytayo nga ‘isilnag ti silaw’!—2 Cor. 4:6.