Saludsod
◼ Ania ti laglagipentayo no kayattayo nga ited iti organisasion ni Jehova ti sumagmamano wenno ti amin a sanikuatayo apaman a mataytayo?
No matay ti tao, awanen ti maaramidanna kadagiti material a sanikuana. (Ecl. 9:5, 6) Gapuna, adu ti mangar-aramid iti legal a dokumento a nakailanadan dagiti kayatda a maaramid kadagiti sanikuada inton matayda. (2 Ar. 20:1) Kaaduanna a nailanad met iti daytoy a legal a dokumento no siasino ti kayat ti maysa a tao a pangitalkan kadagiti sanikuana (trustee) wenno mangipatungpal iti pagayatanna (executor). Iti adu a pagilian, no matay ti maysa a tao ket awan ti inaramidna a kastoy a dokumento, dagiti agtuturay ti mangikeddeng no kasano ti pannakabingaybingay dagiti sanikuana. Gapuna, no adda kayattayo a maaramid kadagiti sanikuatayo, kas koma no kayattayo nga ited iti organisasion ni Jehova ti sumagmamano wenno ti amin a sanikuatayo, napateg a mangaramidtayo iti legal a dokumento a nakailanadan daytoy ken pilientayo a naimbag no siasino ti pangitalkantayo kadagiti sanikuatayo wenno mangipatungpal iti pagayatantayo.
Nadagsen ti responsabilidad ti pakaitalkan dagiti sanikuatayo wenno ti mangipatungpal kadagiti pagayatantayo. Depende iti kadakkel ti kuarta wenno sanikua, ti panangurnos ken panangiwarasna kadagita ket mabalin nga agkasapulan iti adu a detalye ken panawen. Maysa pay, masansan nga adda dagiti pagannurotan dagiti sekular nga autoridad a masapul a suroten. Saan nga amin a miembro ti kongregasion ket mabalin a pusgan nga agserbi a pakaitalkan dagiti sanikuatayo wenno mangipatungpal kadagiti pagayatantayo. Ti tao a pilientayo ket daydiay ammotayo a makabael, mapagtalkan, ken sidadaan a mangsurot kadagiti kalikagumtayo.—Kitaenyo ti artikulo a “Ti Kinasirib ken Dagiti Pagimbagan ti Panangiplano iti Ipatawid a Sanikua,” iti Disiembre 8, 1998, a ruar ti Agriingkayo!
No Mapilika nga Agserbi kas Pakaitalkan ti Sanikua Wenno Mangipatungpal iti Pagayatan ti Maysa a Tao: No saludsoden ti maysa a tao no kayatmo a sika ti pangitalkanna iti sanikuana wenno mangipatungpal kadagiti pagayatanna kalpasan ti ipapatayna, ammuem pay nga umuna no ania dagiti ramanen dayta ken nainkararagan a tingitingem no kabaelam nga itungpal dayta a responsabilidad. (Luc. 14:28-32) No matay dayta a tao, sika ti mangipakaammo no siasino dagiti nainaganan nga agtawid kadagiti sanikuana. Kalpasanna, no naautorisarankan a mangaramid iti dayta, sika ti mangbingaybingay kadagiti sanikuana maitunos iti linteg ken iti kalikagum a nailanad iti legal a dokumento. Dakkel man wenno bassit ti sanikua ti maysa a tao, ti pakaitalkan ti sanikuana wenno ti mangipatungpal iti pagayatanna ket awan ti karbenganna a mangbalbaliw iti nailanad iti dokumento. Ti aniaman a sanikua a maipatawid iti legal a korporasion nga us-usaren dagiti Saksi ni Jehova ket agserbi kas pondo nga usaren laeng ti organisasion ni Jehova.—Luc. 16:10; 21:1-4.