Saganaan ti Memorial Buyogen ti Naragsak a Puso
1. Ti panawen ti Memorial ket nagsayaat a panawen tapno aramidentayo ti ania?
1 Ti Memorial inton Martes, Marso 26, ket mangipaay kadatayo iti nagsayaat a gundaway nga agrag-o gapu iti inaramid ti Dios tapno maisalakantayo. (Isa. 61:10) Uray sakbay pay daytoy nga okasion, makatulong kadatayo dayta a rag-o tapno makapagsaganatayo a naimbag. Kasano?
2. Ania ti mangtignay kadatayo nga agsagana para iti Memorial?
2 Panagsagana Para iti Memorial: Ti Pangrabii ti Apo ket nakapatpateg ngem simple laeng nga okasion. Kaskasdi, agkasapulan daytoy iti nasaksakbay a panagplano tapno awan ti malipatan a napateg a detalye. (Prov. 21:5) Masapul nga adda maikeddeng nga oras ken maitutop a lugar a pakaangayanna. Nasken a maisagana dagiti maitutop nga emblema. Masapul a madalusan ken maisagana ti pagtataripnongan. Rumbeng nga agsagana a naimbag ti natudingan nga agpalawag, ken masapul nga ammo dagiti paraiwaras iti emblema ken dagiti attendants ti aramidenda. Sigurado a naaramidyon ti kaaduan kadagitoy. Ar-aramidentayo ti kasta a panagsagana gapu iti panangapresiartayo iti subbot.—1 Ped. 1:8, 9.
3. Kasano a maisaganatayo ti pusotayo para iti Pangrabii ti Apo?
3 Panangisagana iti Puso: Napateg met nga isaganatayo ti pusotayo tapno maapresiartayo ti naan-anay a pateg ti Memorial. (Esd. 7:10) Tapno maaramid dayta, masapul a mangilatangtayo iti panawen a mangusig kadagiti teksto iti Biblia a nayeskediul a mabasa iti panawen ti Memorial sa utobentayo ti maudi nga al-aldaw ni Jesus ditoy daga. Magutugottayo a mangtulad ken ni Jesus no mennamennaentayo ti kinamanagsakripisiona.—Gal. 2:20.
4. Ania ti pagsayaatan nga itden ti subbot a mangyeg kenka iti kasta unay a rag-o?
4 Ti ipapatay ni Kristo alangonenna ti kinasoberano ni Jehova. Daytoy ti mangruk-at kadatayo iti basol ken ipapatay. (1 Juan 2:2) Luktanna ti gundaway para iti natalna a relasiontayo iti Dios ken iturongnatayo iti biag nga agnanayon. (Col. 1:21, 22) Tulongannatayo pay daytoy a mangpatibker iti determinasiontayo a mangtungpal iti dedikasiontayo ken Jehova ken agtalinaed a natibker kas adalan ni Kristo. (Mat. 16:24) Sapay koma ta rumayray ti rag-oyo bayat nga agsagsaganakayo a tumabuno iti Memorial!