Saludsod
◼ Ania dagiti prinsipio iti Biblia nga agaplikar iti panagusar kadagiti selpon bayat ti itatabuno kadagiti Nakristianuan a gimong ken pannakiraman iti ministerio?
“Tunggal Banag Adda Naituding a Tiempo.” (Ecl. 3:1): Maus-usar dagiti selpon tapno mateksan wenno matawagantayo dagiti dadduma iti aniaman nga oras. Nupay kasta, adda dagiti gundaway a saan a kayat dagiti Kristiano ti maisturbo gapu kadagiti selponda. Kas pagarigan, dagiti gimong ket panawen tapno agdaydayawtayo ken ni Jehova, umawat iti naespirituan a pannursuro, ken agpipinnaregta. (Deut. 31:12; Sal. 22:22; Roma 1:11, 12) Mabalin kadi nga iddepentayo dagiti selpontayo apaman a makasangpettayo iti Kingdom Hall ken basaentayo dagiti tekstayo no agawidtayon? No saan a mabalin nga iddepen dagiti selpontayo gapu ta adda ur-urayentayo a napateg a tawag wenno teks, ikabiltayo dayta iti setting a saan a makaisturbo kadagiti dadduma.
‘Aramidentayo ti Amin a Bambanag Maipagapu iti Naimbag a Damag.’ (1 Cor. 9:23): No dadduma, adda dagiti nainkalintegan a rason nga agusartayo iti selpon iti ministerio. Kas pagarigan, mabalin nga usaren dayta ti kabsat a mangidadaulo a makikomunikar kadagiti kakabsat a mangaskasaba iti sabali a paset ti teritoria. No dadduma, us-usaren dagiti agibumbunannag ti selponda a mangtawag iti interesado wenno iti iyad-adalanda sakbay a sumarungkarda, nangnangruna no adayo ti pagnanaedan dayta a tao. (2 Cor. 6:3) Bayat nga ur-urayentayo dagiti dadduma nga agibumbunannag, imbes a teksan wenno tawagantayo ti maysa a gayyem, saan kadi a nasaysayaat no ipamaysatayo ti atensiontayo iti ministerio ken iti kaduatayo a mangaskasaba?
Ipakita ti Konsiderasion. (1 Cor. 10:24; Fil. 2:4): Pulos a saantayo a kayat a tagtagilag-anen ti isasangpet iti umiso nga oras para kadagiti taripnong sakbay ti panangasaba gapu ta pampanunotentayo a mabalintayo met ti agteks wenno tumawag tapno damagen no sadino ti teritoriatayo. No naladawtayo a sumangpet, masapul a maorganisar manen ti grupo. Siempre, adda dagiti kasasaad a saantayo a maliklikan ti maladaw. Ngem no iruamtayo ti sumangpet iti naikeddeng nga oras, ipakpakitatayo ti konsiderasion iti urnos ni Jehova, iti kabsat a mangidadaulo, ken kadagiti padatayo nga agibumbunannag.