Ania ti Panangmatmat ni Jehova Kaniak?

1. Apay a mayarig ti Biblia iti sarming?

¹ Mamin-anoka nga agsarming? Inaldaw nga agsarmingtayo tapno makitatayo no adda masapul nga urnosentayo iti langatayo. Ti Biblia ket mayarig iti sarming. No basaentayo ti Sao ti Dios, makitatayo ti makin-uneg a kinataotayo, nga isu ti kitkitaen ni Jehova. (1 Sam. 16:7; Sant. 1:22-24) Ti Biblia kabaelanna a “lasinen dagiti panunot ken dagiti panagem ti puso.” (Heb. 4:12) Kasano a makatulong ti inaldaw a panagbasa iti Biblia ken panagmennamenna tapno makitatayo dagiti masapul a parang-ayentayo, iti kasta, ad-adda nga agballigitayo kas ebanghelisador?—Sal. 1:1-3.

2. Kasano a makatulong ti Biblia iti panangusigtayo iti bagitayo?

² Agsarmingkayo iti Biblia: Maammuantayo no ania dagiti kualidad a makaay-ayo ken Jehova babaen kadagiti nairekord iti Biblia a pakasaritaan dagiti matalek nga adipenna. Kas pagarigan, naregta ni David maipaay iti nagan ni Jehova. (1 Sam. 17:45, 46) Nagboluntario ni Isaias a nangasaba kadagiti narigat a teritoria. (Isa. 6:8, 9) Gapu iti dakkel a panagayatna iti nailangitan nga Amana, imbilang ni Jesus a makapabang-ar ken makapnek ti ministeriona imbes a makapadagsen. (Juan 4:34) Dagiti Kristiano idi umuna a siglo ket sireregta a nangasaba, nagtalek ken Jehova, ken determinadoda a saan a sumuko. (Ara. 5:41, 42; 2 Cor. 4:1; 2 Tim. 4:17) Makatulong kadatayo ti panangutob kadagita nga ulidan tapno mausigtayo ti bagitayo no ania pay dagiti masapul a parang-ayentayo iti panagserbi iti Dios.

3. Apay a saantayo nga itantan ti panangilinteg kadagiti kasapulan a balbaliwan?

³ Ilinteg Dagiti Kasapulan a Balbaliwan: Siempre, awan ti serserbina a nagsarmingtayo no baybay-antayo met laeng a saan a naurnos ti langatayo. Mabalintayo a kiddawen ken Jehova a tulongannatayo a mangilasin iti pudpudno a kinataotayo ken mangilinteg kadagiti kasapulan a balbaliwantayo. (Sal. 139:23, 24; Luc. 11:13) Gapu ta ababan ti nabatbati a panawen ken biag ti nakataya, masapul a saantay nga itantan ti panangaramid kadagiti kasapulan a panagbalbaliw.—1 Cor. 7:29; 1 Tim. 4:16.

4. Ania ti mapasamak iti maysa a tao no adalenna ti Biblia ken iyaplikarna ti naadalna?

⁴ Ti makin-uneg a kinatao—nga isu ti kitkitaen ni Jehova—ket napatpateg nga amang ngem iti makinruar a langatayo. (1 Ped. 3:3, 4) Ania ti mapasamak iti maysa a tao no adalenna ti Biblia ken iyaplikarna ti naadalna? Dayta a tao ket “saan a maysa a manglipat a managdengngeg, no di ket maysa a managaramid iti trabaho, [ket] naragsakto iti panangaramidna iti dayta.” (Sant. 1:25) Wen, agbalintayo a naragsak ken epektibo a ministro gapu ta ‘iyan-anninawtayo ti dayag ni Jehova a kasla kadagiti sarming.’—2 Cor. 3:18.