Usarem a Naimbag ti Sarming

Inkompara ni adalan a Santiago ti Biblia iti sarming a makatulong kadatayo a mangkita iti makin-uneg a kinataotayo. (Sant. 1:​22-25) Kasanotayo a mausar a naimbag ti Biblia kas sarming?

Basaem dayta a naimbag. No taldiapantayo laeng ti itsuratayo iti sarming, baka saantayo a makita ti dadduma a masapul nga urnosen wenno suktantayo. Kasta met, no agdardarastayo nga agbasa iti Biblia, saantayo a makita dagiti masapul a balbaliwantayo. Isu a masapul a basaentayo a naimbag ti Biblia.

Ti bagim ti kitaem, saan a ti dadduma. No dadduma, no agsarmingtayo, mabalin a makitatayo met uray ti sabsabali nga adda iti asidegtayo. Baka dagiti laengen pakauyawanda ti makitatayo. Kasta met no agbasbasatayo iti Biblia. Baka ti pampanunotentayo ket no kasano nga agaplikar ti balakadna iti dadduma. Ngem saan a makatulong dayta tapno mailintegtayo dagiti masapul a balbaliwantayo iti bagitayo.

Agbalin a rasonable. No ti kitkitaentayo laeng no agsarsarmingtayo ket dagiti saantayo a magustuan iti itsuratayo, baka maupaytayo. Masapul nga agbalintayo a rasonable no agbasbasatayo iti Sao ti Dios. Kasano? Saan koma a sobra ti namnamaentayo iti bagitayo ngem iti namnamaen ni Jehova kadatayo.—Sant. 3:17.