PAGSARMINGAN

Dagiti kadaanan nga iiggaman a pagsarmingan (Isa 3:23) no dadduma naaramid iti napasileng a bato, nupay kaaduanna ket metal, kas iti bronse wenno gambang, ken idi agangay lata, pirak, ken uray pay balitok. Nalabit idi laeng umuna a siglo K.P. a napataud dagiti pagsarmingan a naaramid iti sarming. Yantangay ti kaaduan a kadaanan a pagsarmingan ket nasukog a metal, kasapulan a pasilengenda a nalaing dagita tapno nalawag ti iyanninawda. Ti namekmek a bagiing a bato ket mabalin a mausar a pagpasileng, a sagpaminsan a mayis-is manen babaen iti espongha a gagangay a nakabitin iti mismo a pagsarmingan. Nupay kasta, dagiti kadaanan a metal a pagsarmingan ket saan a kas iti kinasileng unay dagiti pagsarmingan ita a naaramid iti sarming. Gapuna mayanatup ti insurat ni apostol Pablo: “Iti agdama kumitkitatayo iti nakudrep a ladawan babaen ti pagsarmingan a metal.”​—1Co 13:12.

Piguratibo nga Usar. No dadduma, piguratibo wenno mangiladawan ti panangaramat ti Kasuratan kadagiti pagsarmingan. Iti Job 37:18 ti tangatang nayasping iti pagsarmingan a metal, a ti nasilap a sangona mangyanninaw iti naraniag a silnag. Ti adalan a ni Santiago inaramatna ti pagsarmingan a mangiladawan iti sao ti Dios idi indagadagna kadagiti tattao nga agbalinda a managtungpal iti sao imbes a managdengngeg laeng iti dayta. (San 1:22-25) Ket impamatmat ni apostol Pablo nga “iyanninaw [dagiti Kristiano] ti dayag ni Jehova a kasla kadagiti sarming” iti ministerioda.​—2Co 3:18; 4:1.