No Kasano nga Usaren Dagiti Audio Recording
1. Malaksid kadagiti mabasa a publikasion, ania pay dagiti makagunggona a probision nga adda kadatayo?
1 Magusgustuan ti adu ti agbasa kadagiti makaparagsak ken umiso a sasao ti kinapudno nga adda iti jw.org. (Ecl. 12:10) Ngem napadasanyo kadin nga inusar dagiti audio recording? Babaen kadagitoy, mangngegantayo ti adu nga impormasion iti website-tayo. Kasanotayo a mabenepisiaran kadagiti audio recording?
2. Kasanotayo nga usaren dagiti audio recording para iti personal a panagadal wenno iti panagdaydayaw ti pamilia?
2 Para iti Personal a Panagadal Wenno Panagdaydayaw ti Pamilia: Ti panagdengngeg kadagiti audio recording ti Biblia, dagiti magasin, wenno ti maysa a publikasion no agbibiahe ken no adda ar-aramidentayo ket makatulong tapno mausartayo a nainsiriban ti tiempotayo. (Efe. 5:15, 16) Mabalin nga inayon iti panagdaydayaw ti pamiliatayo ti panangdengngeg iti pannakaibasa ti maysa a material bayat nga isurottayo ti bukodtayo a kopia. Makatulong met dagiti audio recording iti personal a panagadal nangruna no kayattayo a parang-ayen ti panagbasatayo wenno no agsursurotayo iti lengguahe.
3. Siasino iti teritoriatayo ti mabalin a magunggonaan kadagiti audio recording?
3 Para iti Ministerio: Adda dagiti tattao iti teritoriatayo a mangibaga a saanda a masango ti agbasa ngem mabalin a kayatda ti dumngeg kadagiti audio recording. Wenno mabalin nga adda makasabaantayo a sabali ti lengguahena ken nalabit ad-adda nga aginteres no mangngegna ti mensahe ti Pagarian iti “bukodna a pagsasao.” (Ara. 2:6-8) Iti dadduma a lugar, ti panagdengngeg ket napateg a paset ti kulturada. Kas pagarigan, gagangay iti kultura dagiti Hmong a maipasa ti pakasaritaanda kadagiti ub-ubbing babaen ti panagestoriada ken nalaklakada a malagip dagiti impormasion a mangngeganda. Iti adu a kultura ti Africa, magusgustuan dagiti tattao ti agsursuro babaen ti panagestoria.
4. Ania dagiti mabalintayo nga isaludsod iti bagitayo maipapan iti panangtulong kadagiti tattao iti teritoriatayo?
4 Iti teritoriayo, makatulong kadi iti bumalay no ipangngegyo kenkuana ti maysa kadagiti audio recording iti bukodna a lengguahe? Mabenepisiaran kadi ti maysa no patulodantayo iti audio recording babaen ti e-mail? Mabalintayo kadi nga i-download iti CD ti audio recording ti maysa a publikasion sa itedtayo iti interesado a bumalay, a nalabit kadua ti nayimprenta a kopia dayta? Aniaman a kompleto nga elektroniko a libro, broshur, magasin, wenno tract nga ipaimatayo iti ministerio ket mabalin nga ireport. Nadisenio dagiti audio recording para iti personal a panagadaltayo ken iti panangimula iti bukel ti kinapudno maipapan iti Pagarian.—1 Cor. 3:6.