Panangparang-ay iti Abilidadtayo iti Ministerio—Panagsarungkar

NO APAY A NAPATEG: Adu kadagiti mangipakpakita iti interes iti mensahe ti Pagarian ti mangbirbirok iti kinapudno maipapan iti Dios. (Isa 55:6) Tapno in-inut ken agtultuloy a maisurotayo ida, masapul a regular nga agsarungkartayo. Agduduma ti pakaipaspasanguan dagiti tattao isu nga agduduma met ti pamay-antayo a mangsukay iti interesda. Ngem agbalintayo a mas epektibo no agsaganatayo a naimbag ken adda kalattayo iti tunggal isasarungkar, ken sipapanunottayo a ti kangrunaan a panggeptayo ket mairugi ti panagadal iti Biblia.

NO KASANO NGA ARAMIDEN:

• Ikagumaam ti sumarungkar a dagus, nalabit kalpasan ti sumagmamano nga aldaw.—Mt 13:19

• Agbalinka a mannakigayyem ken nadayaw. Kalmadoka koma

• Irugim babaen iti nainggayyeman a kablaaw. Usarem ti nagan ti bumalay. Ipalagipmo kenkuana no apay a nagsublika—nalabit tapno sungbatam ti maysa a saludsod, ited ti kabaruan a magasin, ipakita ti website-tayo, ipabuya ti maysa a video, wenno idemostra ti panagadal iti Biblia. Baliwam ti ibagam no adda sabali a paginteresanna a topiko.—Fil 2:4

• Sibugam ti bukel ti kinapudno a naimula iti pusona babaen ti panangibaga iti maysa a naibatay iti Biblia a kapanunotan ken nalabit babaen ti panangibati iti maysa a publikasion. (1Co 3:6) Ikagumaam a pagbalinen a nalag-an ti riknana kenka

• Mangibati iti pagsaritaan iti sumaganad a panagsarungkar