AGBALIN A MAS EPEKTIBO ITI MINISTERIO | NAYONAM TI RAGSAKMO ITI MINISTERIO
lyilustrar Dagiti Kangrunaan a Punto
No agsarsarungkar wenno mangyad-adaltayo iti Biblia, masapul a maawatan dagiti sarsarungkaran wenno iyad-adalantayo dagiti kangrunaan a punto. No iyilustrartayo dagiti punto, madanontayo ti pusoda ken nalaklaka a matandaananda dagita.
No agsagsaganaka nga agsarungkar wenno mangyadal, mangpilika kadagiti kangrunaan a punto a kayatmo nga iyilustrar, saan a dagiti babassit a detalye. Agusarka kadagiti simple nga ilustrasion a naibatay iti inaldaw a panagbiag. (Mt 5:14-16; Mr 2:21; Lu 14:7-11) Ibagaymo ti ilustrasionmo iti kasasaad ken ar-aramiden ti kasarsaritam. (Lu 5:2-11; Jn 4:7-15) No makitam a naragsak ta naawatanna ti punto, maragsakanka met.
BUYAEN TI VIDEO A PADASEM TI RAGSAK NGA IYEG TI PANAGARAMID ITI ADALAN—PARANG-AYEM DAGITI ABILIDADMO—IYILUSTRAR DAGITI KANGRUNAAN A PUNTO, SA SUNGBATAN DAGITOY:
Apay a nasayaat a tulongantayo dagiti iyad-adalantayo tapno maawatanda dagiti bersikulo ti Biblia?
Ania nga ilustrasion ti inusar ni Neeta a mangilawlawag iti Roma 5:12?
Dagiti napintas nga ilustrasion danonenna ti puso
Ania ti maitulong dagiti napintas nga ilustrasion kadagiti kasarsaritatayo?
Iti ministerio, apay a nasayaat nga agusartayo kadagiti video ken dadduma pay nga alikamen a pangisuro nga impaay ti organisasion ni Jehova?