Natalna a Panunot Uray no Adda Gubat ken Panaglalaban
Kuna ni Gary a dati a soldado: “Idi saanak pay a nagadal iti Biblia, diak ammo no apay a nakaad-adu ti kinaranggas, kinaawan hustisia, ken no apay a nakagulgulo ti lubong. Ngem idi nagadalakon iti Biblia, naammuak a pagbalinento ni Apo Jehova a natalged ti lubong. Isu nga ita, natalnan ti panunotko.”
Saan la a ni Gary ti nakapadas iti dayta. Kitaem no kasano a nakatulong ti Biblia iti dadduma.
KUNA TI BIBLIA: “Naimbagka ken sisasaganaka a mangpakawan, O Jehova.”—Salmo 86:5.
NO KASANO A MAKATULONG: “Ipaspasigurado kaniak daytoy a bersikulo a naasi ni Jehova. Ammok a nakasagana isuna a mangpakawan kaniak iti amin a nagkamaliak idi soldadoak pay.”—Wilmar, Colombia.
KUNA TI BIBLIA: “Mangparsuaak iti baro a langit ken baro a daga; ket saanton a malagip dagiti immun-una a banag, ken saanton nga agtalinaed dagita iti puso.”—Isaias 65:17.
NO KASANO A MAKATULONG: “Naaddaanak iti post-traumatic stress disorder ken depression gapu kadagiti napadasak idi soldadoak pay. Ngem ipalagip kaniak daytoy a teksto nga asidegen nga ikkaten ni Jehova dagiti pakaburiborak ken dagiti dakes a tagtagainep a mangbangbangungot kaniak. Agnanayonton a malipatak dagita. Talaga a nagsayaat a panunoten!”—Zafirah, United States.
KUNA TI BIBLIA: “Bayat ti panagturayna, umadunto dagiti nalinteg, ken agsaknapto ti talna kas iti bulan nga awan inggana ti kaaddana.”—Salmo 72:7.
NO KASANO A MAKATULONG: “Kanayon a mapampanunotko dagita a sasao. Ammok nga asidegen a mapukaw ti gubat ken dagiti dakes nga epektona. Saantayto metten a madanagan a baka madangran dagiti ipatpategtayo iti biag.”—Oleksandra, Ukraine.
KUNA TI BIBLIA: “Agbiagto dagiti minataymo. . . . Agriingkayo ket agpukkawkayo a siraragsak, dakayo nga agnanaed iti tapok!”—Isaias 26:19.
NO KASANO A MAKATULONG: “Dandani natay ti amin a kapamiliak idi kayat nga ibusen ti sabali a tribu ti tribumi a Tutsi. Ngem ipasigurado kaniak daytoy a bersikulo a makitakto manen ida. Padpadaanak ti aldaw a mangngegkonto manen ti nararagsak a bosesda inton agungarda!”—Marie, Rwanda.
KUNA TI BIBLIA: “Iti saanen a mabayag, awanton dagiti managdakdakes. . . . Ngem dagiti naemma kukuadanto ti daga, ken maragragsakandanto unay iti naruay a talna.”—Salmo 37:10, 11.
NO KASANO A MAKATULONG: “Uray no nagpatinggan ti gubat, adda latta dagiti kinaawan hustisia ken dagiti dakes a tattao. Ngem pinabileg daytoy a teksto ti pakinakemko gapu ta ammok a makitkita ni Jehova ti amin ken maaw-awatanna ti marikriknak. Ken ikarkarina nga asidegen a pukawenna ti amin a panagrigrigat ken saanton a malagip dagita.”—Daler, Tajikistan.
Dagiti indibidual a nadakamat iti daytoy a magasin ket karaman kadagiti minilion a Saksi ni Jehova. Naaddaanda iti talna ti panunot gapu iti panagadalda iti Biblia. Nasursuroda met no kasano nga ikkaten ti gura iti pusoda iti sabali a tao, puli, tribu, wenno pagilian. (Efeso 4:31, 32) Dagiti Saksi ni Jehova ket neutral iti politika ken saanda a makiramraman iti aniaman a kinaranggas.—Juan 18:36.
Makasarak met dagiti Saksi ni Jehova iti suporta kadagiti naayat a kakabsatda iti intero a lubong. (Juan 13:35) Kas pagarigan, ni Oleksandra a nadakamat itay, pinanawanda ken manangna ti balayda sa napanda iti sabali a pagilian gapu iti gubat. Kunana: “Idi nakadanonkamin idiay border, nakitami a dagus dagiti Saksi a taga idiay a mangpaspasangbay kadakami. Gapu iti tulongda, nalaklakakami a nakibagay iti baro a pagilian nga ayanmi.”
Maragsakankami a mangawis kenka nga umatender kadagiti gimongmi tapno maammuam no kasanoka a maaddaan iti natalna a panunot ita. Maammuam met ti ikarkari ti Biblia a natalna a lubong iti masanguanan. Bisitaem ti jw.org tapno mabirokam ti lokasion nga asideg iti lugarmo. Mabalinmo met ti ag-request iti libre a panagadal iti Biblia nga adda Saksi ni Jehova a tumulong kenka ken usarenyo ti publikasion nga Agbiagka a Naragsak iti Agnanayon!