Makaay-ayo Koma ti Panagsasaom no Isurom ti Kinapudno

1. Ania ti masapul nga aramidentayo tapno agbalintayo a paset ti pamilia ni Jehova?

NO DAMOTAYO a maam-ammo ti maysa a kabsat, ti maysa a masansan nga isalsaludsodtayo ket, “Kasanom a naammuan ti kinapudno?” Mabalin nga ibaga ti dadduma, “Napadakkelak iti kinapudno.” Ibaga met ti dadduma, “Nabiitak pay iti kinapudno.” Kasta ti sungbattayo gapu ta dakkel ti epekto ti kinapudno iti biagtayo. Apay? Ammotay ngamin a posible laeng nga agbalintayo a paset ti pamilia ni Jehova no ipategtayo ti kinapudno ken agbiagtayo maitunos iti dayta. Karaman iti dayta ti panagbalintayo a napudno iti panagsasao ken ar-aramidtayo.—Sal. 15:1-3.

2. (a) Ania idi ti reputasion ni Jesus? (b) Ania ti epektona kadagiti tattao dagiti kinapudno nga insuro ni Jesus?

² Kanayon a kinapudno ti imbagbaga ni Jesus. Binigbig dagiti kabusor a napudno isuna uray no saanda a kayat ti amin nga ibagbagana. (Mat. 22:16) Imbaga ni Jesus kadagiti pasurotna ti epektona kadagiti tattao dagiti kinapudno nga isursurona: “Immayak a mangpataud iti panagsisina: ti anak a lalaki kontra iti amana, anak a babai kontra iti inana, ken manugang a babai kontra iti katuganganna a babai.” (Mat. 10:35) Siempre, saan a kayat ni Jesus a kontraen dagiti tattao ti ikaskasabana ken dagiti pasurotna. Ngem ammona a mapasamak dayta. (Mat. 23:37) Ammona a mangpataud iti panagsisina ti mensahe nga ikaskasabana. Addanto dagiti umawat iti kinapudno ken addanto met dagiti saan nga umawat.—2 Tes. 2:9-11.

3. Ania ti pagsasaritaantayo iti daytoy nga artikulo?

³ Kas ken Jesus, ikagkagumaantayo nga ibaga ti kinapudno iti amin a gundaway uray no saan a kayat dagiti tattao ti amin nga ibagatayo. Ikasaba ken isurotayo met latta dagiti kinapudno iti Biblia uray no kagura ti dadduma ti ibagatayo. Ngem kayatna kadi a sawen a saanen a napateg no kasano ken kaanotayo nga ibaga ti kinapudno? Siempre saan! Iti daytoy nga artikulo, pagsasaritaantayo nga umuna daytoy a saludsod: Pakasarakantayo iti kinapudno? Satayto sungbatan daytoy a saludsod: Apay, kasano, ken kaanotayo nga ibaga ti kinapudno? Makatulong ti sungbat dagita a saludsod tapno nasaysayaatton ti panangibagatayo iti kinapudno. Agbalin a makaay-ayo ken naannad ti panagsaotayo ken maibagatayo dayta iti umiso a tiempo.

PAKASARAKANTAYO ITI KINAPUDNO?

4. Apay a maibagatayo a ni Jehova ti Gubuayan ti kinapudno?

⁴ Ni Jehova ti Gubuayan ti kinapudno, isu a kinapudno ti amin nga ibagbagana. Kas pagarigan, husto dagiti pagalagadanna maipapan iti umiso ken di umiso. (Sal. 19:9; 119:142, 151) Pumayso met ti amin nga ibagana maipapan iti masanguanan. (Isa. 55:10, 11) No adda met ikarina, paypaysuenna dayta. (Num. 23:19) Kinaagpaysuanna, imposible nga agulbod ni Jehova! (Heb. 6:18) Isu met laeng nga ibagbaga ti Biblia a ni Jehova “ti Dios ti kinapudno.”—Sal. 31:5.

5. Apay a saan a narigat a biroken “ti Dios ti kinapudno”? Ilawlawag. (Aramid 17:27)

⁵ Ibagbaga ti dadduma a narigat kano a mabirokan ni Jehova, “ti Dios ti kinapudno.” Ngem saan nga agpayso dayta. Napalawlawantayo kadagiti ebidensia nga adda a talaga ni Jehova. (Roma 1:20) Idi kasarsarita ni apostol Pablo dagiti de adal a Griego idiay Atenas, imbagana a kayat ti Dios a ‘birokentayo’ isuna ta “saan nga adayo iti tunggal maysa kadatayo.” (Basaen ti Aramid 17:27.) Iyas-asideg pay ketdi ni Jehova kenkuana dagiti napakumbaba a tattao a mangbirbirok iti kinapudno.—Juan 6:44.

6. Ania ti dadduma a kinapudno nga adda iti Biblia, ken apay nga agyamyamanka ta naammuam dagita?

⁶ Mabirokantayo ni Jehova no adalentayo ti Biblia. Apay a maibagatayo dayta? Inusarna ngamin ti nasantuan nga espirituna a mangiwanwan kadagiti lallaki a nangisurat iti Saona. (2 Ped. 1:20, 21) Isu nga amin nga adda iti Biblia ket kinapudno ken mapagtalkantayo. Kas pagarigan, makapagtalektayo iti ibaga ti Biblia maipapan iti nangrugian ti uniberso ken ti biag ditoy daga. (Gen. 1:1, 26) Makapagtalektayo met iti ibagana no apay nga agbasol, agrigat, ken mataytayo. (Roma 5:12; 6:23) Kombinsidotayo met iti ibagbagana nga usarento ni Jehova ti Anakna a mangpukaw iti amin nga epekto ti inaramid ni Satanas, “ti ama ti kinaulbod.” (Juan 8:44; Roma 16:20) Patientayo met ti ikarkari ti Biblia a dadaelento ni Jesus dagiti managdakdakes, pagbiagenna dagiti natay, pagbalinenna a Paraiso ti daga, ken tulongannatayo nga agbalin a perpekto. (Juan 11:25, 26; 1 Juan 3:8) Agyamyamantayo ta insuro ni Jehova kadatayo ti kinapudno ken inikkannatayo met iti gundaway a mangisuro iti dayta iti dadduma. Nagdakkel a pribilehio dayta!—Mat. 28:19, 20.

NO APAY NGA IBAGATAYO TI KINAPUDNO

7-8. Apay a napateg ti motibotayo no ibagbagatayo ti kinapudno? Mangted iti pagarigan. (Marcos 3:11, 12) (Kitaen met dagiti ladawan.)

⁷ Naammuantayo a masapul nga ibagatayo ti kinapudno no kayattayo ti agbalin a paset ti pamilia ni Jehova. Ngem saan nga umanay dayta tapno maparagsaktayo isuna. Napateg ken Jehova no apay nga ibagatayo ti kinapudno. Kitaentayo ti napasamak idi adda ni Jesus ditoy daga. (Basaen ti Marcos 3:11, 12.) Bayat a mangaskasaba ni Jesus iti igid ti Baybay ti Galilea, inaribungbongan ti adu a tattao. Karaman kadagita dagiti linuganan ti demonio. Nagparintumengda iti sango ni Jesus sada inriaw: “Sika ti Anak ti Dios!” Apay nga imbaga dagiti demonio ti kinapudno maipapan ken Jesus? Gapu ta kayatda nga alaen ti talek dagiti tattao, sa inton agangay, pasardengenda ida nga agserbi ken Jehova. Pudno met ketdi ti imbaga dagita a demonio, ngem dakes ti motiboda. Ammo dayta ni Jesus ket nakapungtot kadakuada. Isu a pinawilanna dagiti demonio a mangikasaba iti maipapan kenkuana.

⁸ Ania ti masursurotayo? Napateg ken Jehova ti motibotayo no ibagbagatayo ti kinapudno. Isu a no isurotayo ti kinapudno, gapu koma ta ay-ayatentayo ni Jehova ken kayattayo a maidaydayaw isuna, saan a ti bagitayo!—Mat. 5:16; idilig ti Aramid 14:12-15.

9. Ania ti masapul a saantayo nga ar-aramiden, ken apay?

⁹ Kitaentayo ti sabali pay a situasion a maliklikantayo nga iturong ti dayaw iti bagitayo. Kas pagarigan, imbaga kenka ti maysa a panglakayen ti kompidensial a banag. Idi kuan, imbagam dayta iti sabsabali. No maammuanto dagiti nangibagaam a pimmayso ti imbagam, baka agbilibdanto kenka ta ammom ti maysa a banag a saanda nga ammo ken baka ipagarupda nga adu pay ti ammom a kompidensial a banag. Posible a ngumato ti panagkitada kenka, ngem saanto a pulos ngumato ti panagkita kenka ti Dios. (Prov. 11:13) Apay? Inwarasmo la ngaruden ti kompidensial a banag, saan pay nga umiso ti motibom a nangibaga iti dayta.

NO KASANOTAYO NGA IBAGA TI KINAPUDNO

10. Ania ti kayat a sawen ti “makaay-ayo” a panagsasao? (Colosas 4:6)

¹⁰ Basaen ti Colosas 4:6. Impalagip ni apostol Pablo kadagiti Kristiano a taga-Colosas a ‘kanayon koma a makaay-ayo ti panagsasaoda.’ Ania ti kayatna a sawen? Ti Griego a termino a nausar ditoy ipakitana a saan nga umanay a basta ibagatayo laeng ti pagsayaatan ti kasarsaritatayo. Masapul met a nasingpet ken nasayaat ti panangibagatayo.

11-12. Apay a masapul a naannad ti panangisurotayo iti kinapudno? Mangted iti pagarigan. (Kitaen met dagiti ladawan.)

¹¹ Kas imbalakad ni Pablo, masapul a makaay-ayo ti panangisurotayo iti kinapudno. Nayarig dagiti kinapudno iti Biblia iti natadem nga espada a kayana a pagsinaen ti kararua ken ti espiritu. Kayatna a sawen, kayana nga ipabigbig kadatayo ti talaga a marikrikna ken motibotayo. (Heb. 4:12) Ngem no saan a naannad ti panangisurotayo iti Biblia, baka masaktantayo dagiti tattao ken baka makipinnapilitda pay ketdi kadatayo. Kasano a mapasamak dayta?

¹² Panunotem daytoy. Adda lalaki a nakasaritam bayat a mangaskasabaka. Kanayon nga agkarkararag kadagiti rebulto, ken kaykayatna ken ti pamiliana ti agselebrar iti Krismas ken Easter. Ania ti aramidem? Baka usarem ti Biblia a mangipakita kenkuana nga awan serserbi ti panagkararag kadagiti rebulto. Baka ipakitam met a maikontra iti isursuro ti Biblia ti Krismas ken Easter. (Isa. 44:14-20; 2 Cor. 6:14-17) Ngem no kasta ti aramidem iti damo pay la a panagsaritayo, uray no husto met dagiti ibagam, saan a naannad dayta a panangisuro iti Sao ti Dios.

13. Kasanotayo a matemplaan iti asin ti panagsasaotayo?

¹³ Imbaga met ni Pablo a masapul a natemplaan iti asin ti panagsasaotayo. Saan nga ibagbaga ni Pablo a padasentayo a baliwan wenno ilimed ti kinapudno. No kasano a “naimas” ti raman ti maysa a makan no natemplaan iti asin, “makaay-ayo” met ti panangisurotayo iti kinapudno no natemplaan iti asin ti panagsasaotayo. (Job 12:11) Ngem saan a nalaka dayta. Apay? Kas iti literal a makan, baka ngamin panunotentayo a ti naimas a raman kadatayo ket naimas metten iti dadduma. Kasta met laeng iti panagsasaotayo. Baka ti panagkunatayo a makaay-ayo a panagsasao ket makaay-ayo metten iti dadduma. Ngem saan a kanayon a kasta. Kas pagarigan, adda dagiti kultura a prangka ti panangibagada iti opinionda uray no natataengan ti kasarsaritada. Ngem iti dadduma a kultura, saan a panangipakita iti respeto dayta ken makapasakit pay ketdi. Imbaga ni Pablo a masapul nga ammotayo no kasano ‘ti rumbeng a panangsungbattayo iti tunggal tao.’ Ipakita dayta a masapul a templaentayo ti panagsasaotayo sigun iti raman a makaay-ayo iti kasarsaritatayo, saan nga iti raman a kayattayo wenno sigun iti kulturatayo.

NO KAANOTAYO NGA IBAGA TI KINAPUDNO

14. Insuro kadi ni Jesus kadagiti adalanna ti amin nga ammona idi adda ditoy daga? Ilawlawag.

¹⁴ Kanayon a makaay-ayo ti pannakisarita ni Jesus kadagiti pasurotna. Nasingpet met ti panangisurona kadakuada maipapan iti adu a banag. (Mar. 6:34) Ngem adu pay ti masapul a maammuanda. Insuro kadi ni Jesus kadakuada ti amin nga ammona? Saan. Inkabilanganna dagiti limitasionda. Ammona a saan pay nga idi ti umiso a tiempo tapno maammuanda ti dadduma a kinapudno. Imbagana pay ketdi a saanda a matarusan dagita. (Juan 16:12) Ania ti masursurotayo?

15. Masapul kadi nga isurotayo kadagiti iyad-adalantayo ti amin nga ammotayo no mangrugrugida pay laeng nga agadal iti Biblia? Ilawlawag. (Proverbio 25:11) (Kitaen met ti ladawan.)

¹⁵ Kas ken Jesus, saan a gapu ta ammotayon ti kinapudno, masapul nga isurotayon ti amin nga ammotayo iti maysa laeng a tugawan. Kasanotayo a matulad ni Jesus? Masapul nga ikabilangantayo ti kasasaad dagiti tattao. Malagipyo pay ti lalaki a kaykayatna ken ti pamiliana ti agselebrar iti Krismas ken Easter? Ammotayo a naggapu dagita a selebrasion iti ulbod a panagdaydayaw ken saan a pakaragsakan ti Dios. Ngem ipapantayo a nangrugikayo a nagadal maysa wenno dua a lawas sakbay ti Krismas. Makaay-ayo ngata ti panagsasaotayo no ipakitatayo kenkuana ti ibagbaga ti Biblia maipapan kadagita a selebrasion sa ekspektarentayo a dagus nga isardengnan ti agselebrar iti Krismas? Agpayso nga adda dagiti mayad-adalan a dagus a mangyaplikar iti maad-adalda. Ngem nabaybayag ti dadduma a mangbalbaliw iti panagpampanunot ken ar-aramidda. Isu a no ibagatayo kadagiti iyad-adalantayo dagiti masapul a maammuanda iti umiso a tiempo, kayatna a sawen, iti tiempo a kayadan nga awaten dagita, matulongantayo ida nga agbalbaliw.—Basaen ti Proverbio 25:11.

16. Kasanotayo a matulongan dagiti iyad-adalantayo iti Biblia nga “agtultuloy . . . a magna iti dalan ti kinapudno”?

¹⁶ Ti maysa a mangparparagsak kadatayo ket no adda matulongantayo a mangam-ammo ken Jehova. Matulongantayo ida nga “agtultuloy . . . a magna iti dalan ti kinapudno” no aramidentayo dagitoy: Itultuloymo ti mangipakita iti nasayaat nga ulidan. (3 Juan 3, 4) Makita koma iti panagbiagmo a talaga a patiem dagiti kari ti Biblia. Umiso koma ti motibom a mangibaga iti kinapudno. No isursurom ti kinapudno, makaay-ayo koma ti panagsasaom. Kayatna a sawen, nasingpet ken naannadka. Ibagam met dayta iti umiso a tiempo. Ken iturongmo koma ti amin a dayaw ken Jehova. No aramidem dagita, ipakpakitam a pasetka ti pamilia ni Jehova, ti Dios ti kinapudno.