Nalasatak ti Panagrebelde Dagiti Komunista

ITI parbangon ti Oktubre 1, 1965, gapu iti planoda a kudeta, pinatay dagiti soldado a maipagarup nga adda koneksionna iti Indonesian Communist Party (PKI) ti innem a prominente a heneral. Dagus ken awanan asi a bimmales ti gobierno. Agarup 500,000 a maipagarup a komunista ti napapatay.

Sumagmamano a lawas kalpasan ti saan a nagballigi a kudeta, imbaga kaniak ti maysa a nangato a komander ti militar a numero uno ti naganko iti listaan dagiti lider ti relihion iti lugarmi a plano a papatayen dagiti komunista. Imbagana pay a no kayatko, ipakitana kaniak ti nakalin a pakaipumponak, ngem sidadayaw a nagkedkedak. Nabara ti situasion ti politika isu a diak kayat nga adda makakita nga agkadkaduakami, a mabalin a mangdadael iti neutral a reputasionko kas Kristiano.