Apay nga Itakayo Laeng?

NABIITAK pay a nabautisaran idi dinamag dagiti panglakayen no kayatko a palawaen ti ministeriok. Idi Mayo 4, 1992, immatenderak iti espesial a miting para kadagidiay mayat nga agserbi iti lugar a dakdakkel ti panagkasapulanna. Iti simmaruno nga aldaw, immakarak ken ti maysa a brother iti puerto ti Batumi iti rehion ti Ajaria.

Permi ti nerbiosko idi damok ti mangasaba iti siudad ti Batumi. Napanunotko, ‘Kasanok nga asitgan dagiti tattao?’ Nasdaawak idi imbaga ti umuna a babai a nakasaritak, “Apay nga itakayo laeng?” Magagaran unay a mangammo iti ad-adu pay maipapan kadagiti Saksi isu a dagus a nagpayadal iti simmaruno nga aldaw!

Sakbay nga immakarkami iti Batumi, nakaawatkami iti listaan ti adres dagiti interesado nga aggigian sadiay. Gapu ta saankami unay a pamiliar iti lugar, nagdamdamagkami kadagiti tattao nga adda iti dalan. Adu kadakuada ti saan a makaammo iti damdamagenmi ta nabiit pay a nasuktan ti nagan ti adu a kalye, ngem dimngegda iti ikaskasabami. Di nagbayag, mangikonkonduktakamin kadagiti grupo ti panagadal iti Biblia nga at-atenderan ti 10 agingga iti 15 a tattao.

Uppat laeng a bulan kalpasan nga immakarkami, nasuroken nga 40 ti regular a makigimgimong. Isu a pinanunotmi, ‘Asino ti mangaywan kadagitoy a kabbaro?’ Idi kuan, gapu ta aglalaban dagiti soldado ti Georgia ken dagiti rebelde idiay Abkhazia, immakar iti Batumi ti amin a dati a kakongregasionko. Iti maysa laeng nga aldaw, nabukel ti maysa a baro a kongregasion nga addaan kadagiti eksperiensiado a panglakayen ken payunir!