SALUDSOD DAGITI AGTUTUBO
Agsardengak Kadin nga Ageskuela?
“Makauma ti ageskuela!” No kasta ti marikriknam, baka kayatmon ti sumardeng nga ageskuela. Ngem maammuam iti daytoy nga artikulo dagiti nasaysayaat nga aramidem.
No apay nga agsardeng ti dadduma
Dagitoy ti naobserbaran dagiti eksperto no apay nga agsardeng ti dadduma:
Marigatan nga agadal. ‘Kanayon a nababa dagiti grades-ko.’
Kinaawan interes. ‘Kasla awan met serserbina dagiti ad-adalek.’
Kinarigat ti biag. ‘Masapul nga agtrabahoak tapno makatulongak iti pamiliak.’
Agkuentaka
Ibaga ti Biblia: “Panunoten ti masirib ti tunggal addangna.” (Proverbio 14:15) Ti leksion? No planom ti agsardeng nga ageskuela, panunotem a naimbag ti resultana.
Isaludsodmo iti bagim:
‘No agsardengak, makabirokakto ngata iti nasayaat a trabaho?’
“Panunotem a kasapulamto ti trabaho tapno masuportaram ti pamiliam. Ngem kasanom a maaramid dayta no awan man la ti high school diplomam a kaaduanna a sapsapulen dagiti employer?”—Julia.
‘No agsardengak, kayakto ngata dagiti problema a pakaipasanguak?’
“Makatulong ti panageskuela iti biagmo. Adda pagpadaan dagiti napadasam iti eskuelaan iti mapadasamto iti masanguanan, kas iti tattao a maam-ammom, sulisog a pakaipasanguam, ken trabaho nga aramidem.”—Daniel.
‘No agsardengak, addaanakto ngata kadagiti paglaingan a kasapulak inton adultoakon?’
“Kasla awan serserbi ita dagiti isursuroda iti eskuelaan, ngem inton 23-mon, ken ibadyetmon ti kuartam, mapanunotmonto, ‘Imbag la ketdin ta nagdengdengngegak idi iti math.’”—Anna.
Ti nasaysayaat nga aramidem
Agpatulongka. Ibaga ti Biblia: “Adda balligi no adu ti mamalbalakad.” (Proverbio 11:14) No nababa ti grades-mo, agpatulongka iti nagannakmo, iti titsermo, iti guidance counselor, wenno iti pagtaltalkam nga adulto tapno sumayaat ti grades-mo.
“Makisaritaka iti titsermo no marigrigatanka. No dadduma, baka mapanunotmo a basol ti titsermo a nababa ti grades-mo, ngem kaaduanna a sumayaat ti situasion no agpatulongka.”—Edward.
Panunotem ti masanguanam. Ibaga ti Biblia: “Nasaysayaat ti ngudo ngem ti rugi ti maysa a banag.” (Eclesiastes 7:8) Inton makagraduarka, saan la a dagiti naadalmo kadagiti subject-mo ti masursurom, uray met dagiti importante a kualidad ken paglaingan a mausarmo iti biag.
“Siempre, saankanton nga agsurat kadagiti essay wenno agrebiu para kadagiti eksam inton adultokan, ngem ti panangsangom iti stress iti eskuelaan ti mangisagana kenka para kadagiti sanguemto a problema inton nakagraduarkan.”—Vera.
Ti panagsardeng nga ageskuela ket kas iti panagbaba iti bangka sakbay a makasanglad; baka pagbabawyamto met laeng a bimmabaka!
Panunotem dagiti pagpiliam. Ibaga ti Biblia: “Sigurado a pumanglaw ti amin a nadarasudos.” (Proverbio 21:5) Saanmo koma a dagus a panunoten a ti panagsardeng ti kakaisuna a pagpiliam. Mabalin a maitultuloymo latta ti ageskuela iti online wenno babaen ti homeschool program.
“Isuronaka ti eskuelaan nga agbalin a nagaget, mangsolbar kadagiti problema, ken makitinnulong iti sabsabali. Agpaut ti pagsayaatan dayta. Sulit no ikagumaam a palpasen ti panageskuelam.”—Benjamin.
Laglagipem: No ileppasmo ti panageskuelam, nakasaganakanto a mangaramid kadagiti responsabilidad ti maysa nga adulto.