Gubat iti Middle East—Ania ti Ibaga ti Biblia?

Iti intero a lubong, madandanagan dagiti tattao no anianto ti mapasamak iti gubat a pakiramramanan ti United States, Israel, ken Iran. Kumaronto ngata dayta ken umadunto pay dagiti nasion a makiraman? Kaya ngata dagiti gobierno a pasardengen dagiti gubat ken pagbalinen a natalna ti lubong?

Mabalin a mapampanunot dagiti tattao a makaammo iti padto ti Biblia no daytoy a gubat iti Middle East ti posible a pangrugian ti gubat ti Armagedon nga ibagbaga ti libro nga Apocalipsis.

Ania ti ibaga ti Biblia?

Dagiti kadi gobierno ti mangpasardeng iti gubat iti Middle East?

Kuna ti Biblia: “Saankayo nga agtalek kadagiti prinsipe wenno uray iti tao ta saan a makaisalakan.”—Salmo 146:3.

Maammuanto iti masanguanan no kaya dagiti gobierno a pagbalinen a nataltalna ti situasion iti Middle East. Ngem nalawag nga ibaga ti Biblia nga awan ti agturay a tao, gobierno ti tao, wenno grupo dagiti tattao a makakaya a mangpasardeng iti gubat ken mangyeg iti manayon a talna. Ti laeng Dios ti makabael a ‘mangpasardeng kadagiti gubat iti intero a daga.’—Salmo 46:9.

• Tapno maammuam ti ad-adu pay, basaem ti magasin a Pagwanawanan a napauluan “Gubat—Kasano nga Agpatingga?”

Ti kadi gubat iti Middle East ket kaitungpalan ti padto?

Kuna ti Biblia: “Makadamagkayto kadagiti gubat iti nadumaduma a lugar. . . . Bumusorto ti nasion iti sabali a nasion ken ti pagarian iti sabali a pagarian.”—Mateo 24:6, 7.

Ti mapaspasamak a gubat iti Middle East ket maysa pay nga ebidensia nga agbibiagtayon iti “panungpalan daytoy a sistema ti bambanag,” nga aw-awagan met ti Biblia iti “maudi nga al-aldaw.” (Mateo 24:3; 2 Timoteo 3:1) Ipakita dagiti mapaspasamak a gubat ita a dandanin pagpatinggaen ti Dios ti gubat ken ti dadduma pay a problema a mangparparigat kadagiti tattao.

• Tapno maammuam ti ad-adu pay, basaem ti artikulo nga “Ania ti Pagilasinan ti ‘Maudi nga Al-aldaw,’ Wenno ‘Tiempo ti Panungpalan’?”

Mangrugi kadi ti Armagedon iti Middle East?

Kuna ti Biblia: “Inurnongda ida iti lugar a maaw-awagan iti Armagedon iti Hebreo.”—Apocalipsis 16:16.

Ti gubat ti Armagedon ket saan a panaggugubat dagiti gobierno ti tao a mangrugi iti Middle East. Sangalubongan a gubat dayta. Ti aggubat ket ti amin a gobierno ti tao kontra iti Dios.

• Tapno maammuam ti ad-adu pay, basaem ti artikulo nga “Ania ti Gubat ti Armagedon?”

Kasanotayo nga agbalin a kalmado no madandanagantayo kadagiti mapaspasamak ita?

Kuna ti Biblia: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman.”—Filipos 4:6.

Kayat ni Jehovaa a Dios nga agkararagtayo kenkuana. Gapu ta ipatpategnatayo ti Dios, denggenna dagiti kararagtayo ken tulongannatayo nga agbalin a kalmado no madandanagantayo. (1 Pedro 5:7) Ti maysa a pamay-an nga ar-aramidenna dayta ket tultulongannatayo tapno maawatantayo no apay nga agtultuloy dagiti gubat, no kasano nga agpatingga dagita, ken no anianto ti aramidenna tapno maisubli ti dati a kasasaad nga awan ti ut-ot ken panagrigrigat.—Apocalipsis 21:3, 4.

• Tapno maammuam ti ad-adu pay no kasano a tultulongannatayo ti Dios, basaem ti artikulo a “Makasarakak Kadi iti Makaliwliwa a Sasao iti Biblia?”