SALUDSOD DAGITI AGTUTUBO
Kasanon No Mabor-boring-ak?
Para iti dadduma, awanen ti kadaksan a mapasamak no di ti panagtalinaed iti balay iti agtudtudo a malem nga awan ti maaramid wenno pagpasiaran. Kuna ti agtutubo a ni Robert: “Kadagita a gundaway, nakatugawak laeng ket saanko nga ammo no ania ti aramidek.”
Nariknam met kadin ti kasta? No wen, makatulong kenka daytoy nga artikulo!
Ti masapul a maammuam
Baka saan a makatulong ti teknolohia.
Ti panag-Internet ket mabalin a pagpalabasan iti oras, ngem mabalin a gapu iti dayta, saanmon a mausar a naimbag ti imahinasionmo ket ad-adda payen a ma-boring-ka. “Maamirismonto laeng a nakamulagatka iti iskrin nga awan ti pampanunotem,” kuna ni Jeremy, nga agtawen iti 21.
Umanamong iti dayta ti balasang a ni Elena. Kunana: “Adda limitasion ti maaramidam iti teknolohia. Saanmo a madmadlaw ti mapaspasamak iti aglawlawmo isu nga inton ibabamon ti gadyetmo, ad-addan a ma-boring-ka!”
Dakkel ti maaramidan ti kababalin.
No kadi adu ti ar-aramidem, saanka a ma-boring? Agdepende dayta iti interesmo iti ar-aramidem. Kas pagarigan, malagip ti balasang a ni Karen: “Ma-boring-ak iti eskuelaan uray no adu ti ar-aramidek. Masapul nga interesadoka iti ar-aramidem tapno saanka a ma-boring.”
Ammom kadi? No awan ti maaramidmo, gundaway dayta, saan a lapped—kasla nadam-eg a daga a pagdakkelan ti imahinasion.
Ti iggemmo a tiempo ket kasla nadam-eg a daga a pagdakkelan ti imahinasionmo
Ti mabalinmo nga aramiden
Palawaem ti interesmo. Agbirokka iti baro a gagayyem. Sursuruem ti baro a paglaingan. Ag-research-ka maipapan kadagiti baro a topiko. Manmano a marikna dagiti tattao nga agmaymaysada no adu ti paginteresanda ken saanda a boring a kadua!
Prinsipio ti Biblia: “Isuamin a masarakan ta imam nga aramiden, aramidem buyogen ti mismo a bilegmo.”—Eclesiastes 9:10.
“Rinugiak ti agsursuro iti Mandarin Chinese, ket gapu ta inaldaw a prakpraktisek dayta, napanunotko a makapailiw gayam ti kasta a panagsursuro. Magusgustuak ti agaramid kadagiti proyekto. Makatulong dayta tapno mausarko a naimbag ti panunotko ken ti tiempok.”—Melinda.
Agpokuska iti panggepmo. No makitam nga adda panggep ti ar-aramidem, ad-adda nga agintereska iti dayta. Uray dagiti ar-aramidenyo iti eskuelaan ket agbalin a saan a maka-boring no ammom ti panggepna.
Prinsipio ti Biblia: “Awanen ti nasaysayaat iti maysa a tao no di ti . . . mangtagiragsak iti bunga ti napasnek a panagtrabahona.”—Eclesiastes 2:24, New World Translation.
“Idi dandaniakon agturpos, walo nga oras iti inaldaw nga agad-adalak ta adu dagiti saanko a naadal. Maka-boring? Saan, ta determinadoak a manggaw-at iti kalatko. Nakapokusak iti resulta dayta—ti panaggraduarko—ket dayta ti nangtignay kaniak.”—Hannah.
Akseptarem dagiti saanmo a mabalbaliwan. Uray dagiti makapagagar a plano ket adda maka-boring nga aspetona. Ken mabalin nga uray dagiti kasasayaatan a gayyem ket saan a matuloy iti planoyo no dadduma, isu nga awan ti sabali a mabalinmo nga aramiden. Imbes nga agbalinka a biktima iti kasasaadmo ket ipalubosmo a malidayanka iti dayta, padasem ti maaddaan iti positibo a kababalin.
Prinsipio ti Biblia: “Daydiay maay-ayatan ti pusona addaan padaya a patinayon.”—Proverbio 15:15.
“Insuro kaniak ti maysa a gayyem a tagiragsakek dagiti tiempo nga agmaymaysaak. Kinunana a masapul a sursuruen ti amin a balansien ti pannakikadua iti sabsabali ken ti panagmaymaysa.”—Ivy.