Piliten Kadi Dagiti Saksi ni Jehova nga Agbalin a Saksi Dagiti Annakda?

Saan, ta personal a desision ti panagdayaw iti Dios. (Roma 14:12) Isursuro dagiti Saksi ni Jehova dagiti prinsipio ti Biblia kadagiti annakda, ngem no dumakkelen dagiti annak, isuda ti mangikeddeng no agbalinda a Saksi ni Jehova wenno saan.—Roma 12:2; Galacia 6:5.

Kas iti adu a nagannak, kayat dagiti Saksi ni Jehova ti kasayaatan para kadagiti annakda. Isursuroda kadagiti annakda dagiti pagimbaganda: praktikal a paglaingan, kasta met dagiti moral a prinsipio ken narelihiosuan a patpatien. Mamati dagiti Saksi ni Jehova nga iparparegta ti Biblia ti kasayaatan a pamay-an ti panagbiag, isu nga ikagkagumaanda nga imula iti puso dagiti annakda dagiti prinsipio a linaon dayta babaen ti panangyadalda iti Biblia kadakuada ken ti panagkakaduada a makigimong. (Deuteronomio 6:6, 7) No dakkelen dagiti annak, makapagdesisiondan no agbalinda a Saksi a kas kadagiti nagannakda wenno saan.

• Bautisaran kadi dagiti Saksi ni Jehova dagiti maladaga?

• Ilaksid kadi dagiti Saksi ni Jehova dagiti annakda no saanda nga agpabautisar?

• Apay nga ikuykuyog dagiti Saksi ni Jehova dagiti annakda a mangasaba?

• Makiramraman kadi dagiti Saksi ni Jehova kadagiti piesta wenno dadduma pay a selebrasion?

• Ania ti makuna dagiti napadakkel kas Saksi ni Jehova?

Bautisaran kadi dagiti Saksi ni Jehova dagiti maladaga?

Saan nga isursuro ti Biblia ti panangbautisar kadagiti maladaga. Kas pagarigan, dagiti Kristiano idi umuna a siglo nangngegda nga umuna ti mensahe, ‘inawatda a siraragsak’ dayta, ken nagbabawida sakbay a nabautisaranda. (Aramid 2:14, 22, 38, 41) Sakbay ngarud a mabautisaran ti maysa, masapul nga addan iti edad a maawatanna dagiti pannursuro ti Biblia, patienna dagita, ken nakapagdesisionen nga iyaplikarna dagita iti biagna. Saan a maaramid daytoy ti maysa a maladaga.

Bayat a dumakdakkel dagiti annak, mabalin a kayatdanto ti agpabautisar. Ngem tapno maaramidda dayta, masapul a maawatanda a serioso ti panagpabautisar.

Ilaksid kadi dagiti Saksi ni Jehova dagiti annakda no saanda nga agpabautisar?

Saan. Nupay maladingitan dagiti Saksi a nagannak no saan nga agbalin a Saksi ti anakda, ay-ayatenda latta ti anakda ken saan a dayta ti mangputed iti relasionda gapu laeng ta saanna a kayat ti agbalin a Saksi.

Apay nga ikuykuyog dagiti Saksi ni Jehova dagiti annakda a mangasaba?

Adu ti rason nga ikuykuyogmi dagiti annakmi a mangasaba.a

• Ibilbilin ti Biblia kadagiti nagannak a suruanda dagiti annakda iti naespirituan ken sanayenda ida nga agdayaw iti Dios. (Efeso 6:4) Gapu ta ramanen ti panagdaydayaw ti panangipakaammo iti pammati iti publiko, ti panangasaba ket nagpateg a paset ti panangisuro iti anak iti maipapan iti Dios.—Roma 10:9, 10; Hebreo 13:15.

• Iparparegta ti Biblia kadagiti agtutubo nga “idaydayawda koma ti APO.” (Salmo 148:12, 13, Ti Baro a Naimbag a Damag Biblia) Ti maysa a napateg a pamay-an tapno maidaydayaw ti Dios ket ti panangisarsarita iti maipapan kenkuana.b

• Dakkel ti maitulongna kadagiti annak no kumuyogda kadagiti nagannakda a mangasaba. Kas pagarigan, masursuroda ti makisarita iti amin a kita ti tattao, ken maaddaanda kadagiti napateg a kualidad a kas iti kinaimbag, asi, panagraem, ken panagsakripisio. Agbalinda met a pamiliar iti Biblia, a nakaibatayan ti pammatida.

Makiramraman kadi dagiti Saksi ni Jehova kadagiti piesta wenno dadduma pay a selebrasion?

Saan a makiramraman dagiti Saksi ni Jehova kadagiti piesta wenno dadduma pay a selebrasion a kagura ti Dios.c (2 Corinto 6:14-17; Efeso 5:10) Kas pagarigan, saankami nga agselselebrar iti birthday wenno Krismas, a saan a nagtaud kadagiti Kristiano.

Nupay kasta, magustuanmi ti agkakadua kas pamilia ken ik-ikkanmi iti regalo dagiti annakmi. Mangor-organisarkami kadagiti panaglalangen ken mangmangtedkami kadagiti regalo saan laeng a kadagiti espesipiko nga aldaw iti tawen no di ket iti aniaman nga aldaw.