Ti Abilidad Dagiti Selula nga Agbalin a Nagduduma a Paset ti Bagi

Nangrugi ti biagmo iti maysa a nakabasbassit a selula a maawagan iti zygote, a mabalin a makita laeng babaen ti microscope. Ngem kalpasan ti sumagmamano a bulan, nagbalinka a maysa a baby. Dayta a selula a zygote ket immadu ken nagbalin a nasurok a 200 nga agduduma a klase ti selula ken agduduma ti itsura, kadakkel, ken usarda.

Panunotem: Mangaramid ti zygote iti kopia ti DNA-na sa agbalin a dua a selula. Ti tunggal selula ket magudua, ken maulit-ulit a magudua dagiti mapataud a selula. Iti damo, dandani agpapada ti amin a baro a selula. Adda iti DNA-da ti amin nga impormasion a kasapulan tapno agbalinda a klase ti selula a nakairantaanda.

Kalpasan ti makalawas, dagiti selula ket mangrugin nga agbalin a dua a klase. Ti dadduma ket agbalin nga embryo. Ti dadduma met ket agbalin a placenta ken tisyu a tumulong tapno dumakkel ti embryo.

Iti maikatlo a lawas, dagiti selula ti embryo ket agbalin a tallo a layer. Dagiti selula iti makinruar a layer ket agbalinto a nerve, utek, ngiwat, kudil, ken dadduma pay a selula. Dagiti selula iti makintengnga a layer ket agbalinto a dara, tulang, kidney, masel, ken dadduma pay a tisyu. Dagiti met selula iti makin-uneg a layer ket agbalinto nga internal organ, kas iti bara, bladder, ken kaaduan a paset ti digestive system.

Bayat ti panagsikog, saggaysa wenno kas grupo nga umakar ti dadduma a selula iti maysa a paset ti embryo ket mapanda iti sabali a paset. Agdidinnekket met ti dadduma a selula tapno agbalinda a sheet wenno naingpis ken nalapad a kasla papel. No dadduma, agpilkoda tapno agbalinda a cord, wenno agpilkoda tapno agdedekketda nga adda espasioda iti uneg. Masapul nga agtitinnulong dagiti selula tapno maaramid dagitoy a proseso. Kas pagarigan, adda tiempo a dagiti selula a nagbalin a sheet ket agpilko tapno agbalinda a babassit a tubo. Aggigiddan a mapasamak dagitoy iti nagduduma a paset ti embryo. Kalpasanna, dagiti tubo ket mangrugin nga umatiddog ken agsasanga tapno agkokonektardan.

No mayanaken ti maysa a nasalun-at a baby, dagiti ginasut a bilion a selula iti bagina ket nagbalinen iti klase ti selula a nakairantaanda, iti umiso a paset, ken iti umiso a tiempo.

Panagkunam? Ti kadi abilidad ti selula nga agbalin a nagduduma a paset ti bagi ket resulta ti ebolusion? Wenno adda nangdisenio iti dayta?