Naipangato iti Kasta Unay Manipud iti Nakababbaba a Kasasaad

Idi Agosto 1967, kalpasan ti gagangay nga aldawko kas nasalun-at a 18-bulan a maladaga, naggurigorak iti nakaro. Kabigatanna, nakariingak a nakapuy dagiti sakak. Ipakita dagiti test iti ospital iti Freetown, Sierra Leone, a paggigiananmi, a naakaranak iti polio. Maysa dayta a makaakar a sakit nga agresulta iti paralysis, a kaaduanna kadagiti awan pay lima ti tawenna nga ubbing. Saan a nakatulong ti physiotherapy tapno pumigsa dagiti sakak. In-inut a kimmuttong a permi dagiti sakak isu a saannan a maawit ti bagik. Sangkaibaga ni Tatang a “saanak a kompleto nga ubing” gapu iti sakitko. Gapu ta agkarkaradapak laeng ken awan kompiansak iti bagik, nariknak a saanakon a makapanaw iti daytoy nakababbaba a kasasaadko.

Dimmakkelak nga Agkarkaradap

Bayat a dumakdakkelak, nagyankami ken Nanang iti compound a kadua ti dadduma pay a marigrigat a pamilia. Uray no kaykayatdak dagiti tattao, il-iliwek ti ayat ni tatangko, ngem saanna nga impakita dayta kaniak. Patien ti dadduma a ti kondisionko ket saan a gapu iti sakit, no di ket ginamuddak. Imbaga ti dadduma ken Nanang nga ibatinak lattan iti ridaw ti balay a pagtaraknan kadagiti ubbing nga adda depektona tapno saan a mapadagsenan a mangaywan kaniak. Ngem saan a dimngeg ni Nanang kadakuada ket inkarigatannak nga inaywanan.

Gapu ta saanak a makatakder wenno makapagna, masapul nga agkaradapak. Ngem gapu ta maisagsagirad ti bagik iti daga ken iti dadduma pay a banag, masugsugatanak, isu a tapno maprotektarak ti bagik, agbadoak iti napuskol. Tapno maprotektarak dagiti imak, agusarak iti tsinelas a pannakaguantesko. Idi agangay, nagusarakon kadagiti bloke a kayo tapno mas maprotektaran dagiti imak. Tapno “makaaddangak,” idissok iti daga dagiti bloke nga ig-iggamak sa ibagkatko ti bagik nga agpasango ken isurotko dagiti sakak, isu nga agkiadak bassit. Kalpasanna, aramidek manen ti sumaruno a nagrigat a panagaddangko. Nasakit dayta iti takiag ken abagak. Nakarigrigat dayta isu a manmano laeng a pumanawak iti compound-mi. Saanak a makapan iti eskuelaan wenno makiay-ayam kadagiti padak nga ubbing. Pampanunotek no kasano ti biagko inton awanen ni Nanang.

Nagkarkararagak iti Dios. Indawatko a tulongannak ken saanak koma nga agpalama. Napanunotko a no sumingedak iti Dios ken agserbiak kenkuana iti umiso a pamay-an, ipaayna dagiti kasapulak. Isu a maysa nga aldaw idi 1981, inkarkarigatak ti rimmuar iti compound-mi tapno makapanak iti simbaan nga adda laeng iti kalye a paggigiananmi. Saanak a komportable iti panangkitkita kaniak dagiti tattao. Saannak nga inabrasa ti pastor ken inungtanna ni Nanang ta nagtugawak iti tugaw a binayadan ti sabali. Isu a nagdesisionak a saankonton ul-uliten ti mapan sadiay.

No Kasano a Naam-ammok ti Nailangitan nga Amak

Maysa nga agsapa idi 1984, idi agtawenak iti 18, immuliak iti ngato ti balaymi sa nagtugawak iti tawa a kanayon a puestok iti inaldaw. Dita a buybuyaek ti mapaspasamak iti ruar. Ngem idi kuan, bimmabaak sa napanak iti paraangan ti balaymi a kaaduanna nga awan matataona. Idi addaakon sadiay, naam-ammok ti dua a lallaki a mangaskasaba iti binalaybalay. Imbagada kaniak ti nagsayaat a masakbayan nga agbalbaliwton ti kasasaadko. Imbasada ti Isaias 33:24 ken Apocalipsis 21:3, 4. Inikkandak iti nagpintas a broshur a Tagiragsakenyo ti Biag nga Agnanayon Ditoy Daga! ken inkarida nga agsublida tapno suruandak iti ad-adu pay.

Iti maikadua nga ibibisitada, imbagada nga ikuyogdanto ti kasangsangpet a misionera nga agnagan Pauline tapno ituloyna ti nagsasaritaanmi. Simmarungkarda, ket idi naam-ammok ni Anti Pauline, nagbalinkami a nakadekdekket a kasla agina. Pinaregtanak ni Nanang a makipagadalak iti Biblia iti “baro a nanangko,” a nakaay-ayat, nakaan-anus, nakaim-imbag, ken maseknan kaniak ta kanayonnak a komkomustaen. Sinursuruannak nga agbasa. Inusarna ti publikasion a Ti Librok Dagiti Estoria ti Biblia tapno iyam-ammonak iti naayat nga Ama a tartarigagayak unay.

Naragsakanak kadagiti nasursurok iti Biblia. Maysa nga aldaw, dinamagko ken Anti Pauline no mabalin nga umatenderak iti Panagadal ti Kongregasion iti Libro a maysa a gimong dagiti Saksi ni Jehova,a a maang-angay idi iti balay ti maysa a Saksi ni Jehova iti bangir a bloke. Mabalin kano, isu nga iti simmaruno a Martes, immay ken inuraynak nga agrubbuat tapno agkaduakami a mapan makigimong. Adda nagkuna nga ibagak kano ken Anti Pauline nga ilugannak iti taxi ken bayadanna ti pletek, ngem imbagak, “Magnaak lattan nga usarek dagiti bloke a kayo.”

Idi pumanawkamin, madandanagan ni Nanang ken dagiti kaarrubami a mangbuybuya kaniak. Idi addaakon iti paraangan, impukkaw ti dadduma a kaarrubami ken Anti Pauline, “Apay a pilpilitem?”

“Jay, kayatmo kadi ti umay?” siaalumamay nga insaludsod ni Anti Pauline. Daydi ti gundawayko a mangipakita nga agtaltalekak ken Jehova. (Proverbio 3:5, 6) “Wen! Desisionko daytoy,” kinunak. Nagbaliw ti karirikna dagiti kaarrubami ken siuulimek a binuyadak bayat nga umas-asidegak iti gate. Idi nakaruarakon iti compound, nakaragragsakda nga uray la nagririawda.

Talaga a na-enjoy-ko dayta a gimong! Nabang-aranak unay! Inabrasadak ti amin. Awan ti nangtagibassit kaniak. Komportableak sadiay, isu a regularen nga immatenderak. Di nagbayag, dinamagko no mabalinak met a makigimong iti Kingdom Hall dagiti Saksi ni Jehova. Napanglawkami isu a dua laeng ti bado a pagpiliak ken maysa la a paris ti tsinelasko. Nupay kasta, masiguradok nga awatendak dagiti agserserbi iti Dios. Ket kasta a talaga ti napasamak.

Tapno makapanak idiay Kingdom Hall, masapul a “magnaak” agingga iti ungto ti kalsada sa ag-taxi a mapan iti sakaanan ti turod nga ayan ti Kingdom Hall. Kalpasanna, bagkatendak nga isang-at dagiti kakabsat agingga iti Kingdom Hall.

Gapu ta napadasak ti kinaimbag ni Jehova, kayatkon ti agkamang kenkuana. Nagdesisionak a regularakon a makigimong. (Salmo 34:8) No matutudo, masansan a sumangpetak iti Kingdom Hall a nabasbasa ken nakapitpitak, isu a masapul nga agsukatak, ngem saan a sayang dagiti sakripisiok!

Nadakamat ti kapadasak iti 1985 Yearbook of Jehovah’s Witnesses. Kalpasan a nabasa ni Josette a maysa a Saksi idiay Switzerland ti pakasaritaak, pinatulodannak iti tallo ti pilidna a wheelchair a pedalan ti ima nga adda napintas a tapaludona ken narangrang a reflector iti likudna. Gapu iti dayta, saanakon a mababain no agpasiarak. Maragragsakan dagiti ubbing ken ibagbagada a maay-ayatanda a makakitkita kaniak a nakasakay iti nagpintas a tugawko. Saankon a marikna nga awan serserbik ta saankon a kasapulan ti agkaradap. Panagriknak, kaslaak la reyna a mararaem ken saan a malalais.

Naipangatoak iti Kasta Unay

Nalakaak laeng a rimmang-ay iti naespirituan gapu ta siguden a simple ken nadalus iti moral ti panagbiagko. Nakapangasabaak gapu iti wheelchair-ko, ket idi Agosto 9, 1986, nabautisaranak. Nagbalbaliw ti biagko kalpasan ti bautismok, ket napadasak dagiti bambanag a diak pulos impagarup a mapadasak. Marikriknakon ti pudno a ragsak ken pannakapnek, mariknak nga addan serserbik, ken addan kompiansak iti bagik ta addaanakon iti Ama a mangipatpateg kaniak ken adu ti pudpudno a maseknan kaniak.

Pinanunotko ti ag-regular pioneer tapno masubadak ni Jehova, ngem saanak a sigurado no kabaelak dayta. (Salmo 116:12) Inkararagko dayta, sa nagdesisionak a padasek. Nagpayunirak idi Enero 1, 1988 ket diak nagsarsardeng agingga ita. Talaga a bendision dayta kaniak! Addaanak kadagiti naayat a kakabsat a tumultulong kaniak tapno maabutko ti binulan nga orasko, ken nakitak ti panangsuporta ni Jehova kaniak babaen ti nasantuan nga espirituna.—Salmo 89:21.

Kas payunir, aktiboak isu a kanayonak nga aggaraw, ket makatulong dayta kadagiti sakak, uray nakapsutda. Kalpasan ti sumagmamano a tiempo, napanak iti kaluklukat a clinic bareng makaawatak iti physiotherapy ken regular a panagehersisio. Ngem imbaga ti maysa a nars sadiay a saanakon nga agsubsubli ta dandaniak met kanon matay. Kasta met laeng ti imbaga ti kaduana, isu a naupayak. Idi nakaawidak, nagkararagak ken Jehova tapno malabanak ti pannakaupayko ken tapno maipaayanak iti therapy.

Ti ministerio ti maysa kadagiti kasayaatan a therapy para kaniak. Gapu iti dayta, kanayonak a mawatwat. Sumagmamano a tawen kalpasanna, limmabas iti Kingdom Hall ti maysa kadagiti nars a nangibaga nga asidegakon a matay. Nakigtot ta nakitana a sibibiagak pay laeng!

Iti laksid ti kondisionko, inkagumaak ti agtalinaed nga aktibo iti panagserbik ken Jehova. Komkomendarandak dagiti kakabsat gapu iti kinaregtak ken iti kinamanagsapsapak iti gimong. Kasta ti kanayon nga ar-aramidek tapno adda tiempok a mangkomusta kadagiti kakabsat ken maipakitak ti interesko kadakuada.

Napadasak ti kinaimbag ni Jehova ken nakitak ti nakaad-adu a bendisionna kaniak. Naragsakanak ta adda tallo a natulongak nga agpabautisar. Maysa kadakuada ket ni Amelia, a nageskuela iti maika-137 a klase ti Gilead. Namin-aduakon a nageskuela iti Pioneer Service School, a maysa a nagpintas a probision manipud ken Jehova. Pinagbalinnak ni Jehova a naragragsak, mariknak a napategak, ken addaanakon iti kompiansa. Raraemendak itan dagiti tattao. Diakon ibain ti bagik. Addaanakon kadagiti gagayyem nga agdaydayaw ken Jehova, saan laeng nga iti Freetown a paggigianak, no di pay ket iti intero a pagilian ken iti intero a lubong.

Dandani 40 a tawenen ti napalabas sipud idi naammuak ti kari ti Dios a baro a lubong a sadiay awanton dagiti pisikal a depekto. Ti kinasigurado dayta a kari ti agtultuloy a mangparparegta kaniak ken segseggaak ti pannakatungpal dayta. Siaanus nga agur-urayak, ta ammok a ti Diosko a ni Jehova ket saanto a maladaw. (Mikias 7:7) Adu dagiti bendision a naawatko gapu ta saanak a simmuko. Tinulongannak ni Jehova a mangsango iti adu a problema ken narigat a kasasaad. Kanayon a nangipaay iti tulong iti umiso a tiempo. Kanayon a nakaisemak ken nakaragragsakak ta diak pulos impagarup a maipangatoak iti kasta unay manipud iti daga a dati a pagkarkaradapak.