Kombension iti TV ken Radio

Nakallalagip ti 2020 a rehional a kombension. Dayta ti kaunaan a kombension iti intero a lubong a nairekord ken naipabuya babaen ti Internet! Ngem iti Malawi ken Mozambique, kaaduan a kakabsat ti nakakombension uray awan Internet-da. Kasano?

Inaprobaran ti Coordinators’ Committee ken Teaching Committee ti Bagi a Manarawidwid a maibrodkas ti kombension iti TV ken radio idiay Malawi ken Mozambique. Apay a kasapulan dayta? Ti Malawi ti maysa kadagiti kanginaan ti Internet-na iti intero a lubong isu a manmano a Saksi ti makain-Internet. Inlawlawag ni William Chumbi, a miembro ti Komite ti Sangay ti Malawi: “Babaen laeng iti radio ken TV a makakombension dagiti kakabsat.” Imbaga met ni Luka Sibeko, a miembro met laeng ti Komite ti Sangay ti Malawi: “No saan a naibrodkas dayta iti TV ken radio, manmano laeng koma a kakabsat iti teritoria ti sangay ti nakakombension.” Idiay met Mozambique, manmano laeng a kakabsat ti adda Internet-na ken adda gadyetna a pangbuyaanda iti kombension.

Dagiti Naaramid nga Urnos

Gapu iti COVID-19 pandemic, addan dagiti estasion ti TV ken radio a mangibrodbrodkas kadagiti gimong ti kongregasion.a Nagkiddaw dagiti kakabsat kadagitoy nga estasion iti kanayonan nga oras tapno maibrodkas uray ti kombension.

Idiay Malawi, adda problema a naipasango kadagiti kakabsat. Kaaduanna a maysa laeng nga oras ti it-ited dagitoy a broadcasting station kadagiti kostumerda. Madanagan ngamin dagitoy nga estasion a baka mauma dagiti agdengdengngeg no atiddog ti programa. Ngem inlawlawag dagiti kakabsat a ti trabahotayo ket makatulong kadagiti tattao. Uray lockdown, mangipapaaytayo latta kadagiti makaliwliwa ken naimbag a damag manipud iti Biblia a makatulong kadagiti tattao tapno agbalinda a nasaysayaat a residente ken tapno naragragsak ti pamiliada. Gapu iti dayta, pinatgan dagiti estasion ti dawdawaten dagiti kakabsat a kanayonan nga oras.

Idiay Malawi, naibrodkas ti kombensiontayo iti maysa nga estasion ti TV ken maysa nga estasion ti radio. Agpada nga agibrodbrodkas dagita nga estasion iti intero a pagilian isu a posible a mabuya ken mangngeg ti minilion a tattao. Idiay Mozambique, naibrodkas ti kombensiontayo iti maysa nga estasion ti TV ken 85 nga estasion ti radio.

Kadagita a dua a pagilian, $28,227b (nasurok a ₱1.4 a milion) ti nagastos tapno maipabuya ti kombensiontayo iti TV, ken dandani $20,000 (nasurok a ₱1 a milion) ti nagastos para iti radio. Agduduma ti presio a singsingiren dagiti estasion ti radio—manipud iti $15 (dandani ₱800) para kadagiti babbabassit nga estasion agingga iti $2,777 (dandani ₱140,000) para kadagiti estasion nga agibrodbrodkas iti intero a pagilian.

Ikagkagumaan dagiti kakabsat nga usaren dagiti naidonar a pondo iti kasayaatan a pamay-an. Kas pagarigan, idiay Malawi, makaal-alada iti discount, ket adda pay ketdi immabut iti 30% a discount. Gapu kadagita a discount, nakainut ti organisasiontayo iti $1,711 (dandani ₱86,000). Idiay Mozambique, kayat ti dadduma nga estasion ti mangted iti discount gapu ta nasayaat ti reputasiontayo, napudnotayo, ken agbaybayadtayo iti umiso a tiempo.

Dagiti Panagyaman

Naragsakan dagiti kakabsat a nagdengngeg ken nagbuya iti kombension kadagiti estasion ti radio ken TV iti lugarda. Kuna ti maysa a panglakayen nga agnagan Patrick a taga-Malawi: “Agyamankami iti Bagi a Manarawidwid gapu iti panangikabilanganda iti kasasaadmi bayat ti pandemic.” Imbaga met ni Isaac a taga-Malawi: “Awan ti gadyetmi isu nga agyamyamankami unay iti daytoy nga espesial a probision ti organisasion ni Jehova a mangngegmi ti kombension iti radio. Gapu iti dayta a probision, nagunggonaan ti intero a pamiliak. Ebidensia daytoy ti ayat ni Jehova kadagiti adipenna.”

Ti 2020 a kombension ti kaunaan a kombension a naatenderan ti maysa a kabbaro a kabsat a taga-Mozambique. Imbagana: “Daytoy nga urnos ti panagbuya iti kombension iti TV impalagipna kaniak a ni Jehova ti mannakabalin-amin a Dios. Ti pandemic saanna a nalapdan ni Jehova a mangipaay kadatayo iti naespirituan a taraon. Indasarna pay ketdi dayta iti mismo a balbalaytayo. Nakitak a talaga nga agiinnayat dagiti agserserbi ken Jehova. Kombinsidoak a daytoy ti pudno a relihion.”

Imbaga ti maysa a panglakayen nga agnagan Wyson: “Kayatko ti agyaman iti matalek nga adipen iti panangaywanna kadakami bayat ti pandemic. Nagdakkel a tulong kadakami ti pannakaibrodkas ti kombension iti radio ken TV. Uray marigrigatkami ken addakami iti napanglaw a pagilian, nabenepisiarankami latta iti programa.”

Para iti 2021 a rehional a kombension, inaprobaran manen ti Coordinators’ Committee ken Teaching Committee ti pannakaibrodkas ti kombension iti TV ken radio kadagiti napili a lugar. Kasano a masupsuportaran dagiti magastos tapno maibrodkas ti kombensiontayo iti kastoy a pamay-an? Babaen kadagiti donasiontayo para iti sangalubongan a trabaho. Kaaduan kadagita ket maipapaay iti agduduma a pamay-an a makita iti donate.jw.org. Pagyamanan unay iti kinaparaburyo.