Paset 2
Maysa a Daga nga Awan Panagsagaba
1, 2. Ania ti naiduma a panangmatmat dagiti adu?
NUPAY kasta, minilion a tao iti sangalubongan ti naan-anay a naiduma ti panangmatmatda. Maripripiripda ti maysa a nagsayaatan a masanguanan maipaay iti sangatauan. Kunada a din agbayag addanto maysa a lubong a naan-anay nga awanan iti kinadakes ken panagsagaba ditoy daga a mismo. Manginanamada nga iti mabiiten maikkatton ti dakes ket maipasdeken ti maysa nga interamente a baro a lubong. Kunada pay a maisasaaden ti pamuon daytoy a baro a lubong!
2 Patien dagitoy a tattao a ti baro a lubong awanton ti gubat, kinaranggas, krimen, panangirurumen, ken kinapanglaw. Daytantot’ maysa a lubong nga awan sakit, ladingit, lulua, ken uray ipapatay. Iti dayta a tiempo agbalinto a naan-anay dagiti tao ket agbiagdanto nga agnanayon iti kinaragsak iti maysa a naindagaan a paraiso. Ta, dagidiay a natayen agungardanto pay ket addanto gundawayda nga agbiag nga agnanayon!
3, 4. Apay a manginanama dagita a tattao iti panangmatmatda?
3 Maysa laeng aya a tagainep daytoy a panangmatmat iti masanguanan, panagar-arapaap? Saan, nikaanoman. Naibatay dayta iti natibker ti pamuonna a pammati a daytoy nga umay a Paraiso ket talaga a dumtengto. (Hebreo 11:1) Apay a patienda a dumteng? Agsipud ta daytat’ inkari ti mannakabalin-amin a Namarsua ti uniberso.
4 Maipapan iti karkari ti Dios, kuna ti Biblia: “Awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo. Isuda amin natungpalda kadakayo. Awan ti nagkurang kadakuada nga uray maysa.” “Ti Dios saan a maysa a tao tapno agtiri . . . Isu a nagkuna ket dinanto aya aramiden, ken isu a nagsao ket dinanto aya tungpalen?” “Ni Jehova dagiti buybuyot insapatana, a kunana: ‘Pudno unay a kas iti panangpanunotko, kastanto ti maaramid; ken kas iti pinanggepko, kasta ti mapasamakto.’”—Josue 23:14; Numeros 23:19; Isaias 14:24.
5. Ania dagiti saludsod a masapul a masungbatan?
5 Nupay kasta, no ti panggep ti Dios isut’ panangipasdek iti maysa a naindagaan a paraiso nga awan iti panagsagaba, apay a pinalubosanna pay laeng a mapasamak dagiti dakes a bambanag? Apay nga inurayna pay laeng ti innem a ribo a tawen agingga ita a mangkorehir iti biddut? Saan kadi nga ipamatmat dagita a panagsagaba iti adun a siglo a pudno a saan a maseknan ti Dios kadatayo, wenno awan pay ketdi?