Asidegen nga Agpatingga ti Amin a Panagsagaba!

Naminsan iti biagmo, mabalin a naisaludsodmon, ‘Apay a nakaro ti panagsagaba?’ Rinibu a tawenen nga agsagsagaba iti kasta unay dagiti tattao gapu iti gubat, kinapanglaw, didigra, krimen, kinaawan hustisia, sakit, ken ipapatay. Nakarkaro ti panagsagaba ti sangatauan iti napalabas a sangagasut a tawen. Agpatingganto ngata amin dagitoy?

Makaliwliwa a maammuan nga asidegen nga agpatingga ti panagsagaba! Kuna ti Sao ti Dios, ti Biblia: “Daydiay nadangkes awanton . . . Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” Kasano kapaut? “Dagiti nalinteg tagikuaendanto ti daga, ket agtaengdanto nga agnanayon iti dayta.”​—Salmo 37:10, 11, 29.

No ti Dios naikkatnanton ti kinadakes ken panagsagaba, agbalinton a paraiso ti daga. Iti kasta, dagiti tattao agbiagdanto nga agnanayon a naan-anay a naragsak ken nasalun-at. Impadto ti Sao ti Dios: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”​—Apocalipsis 21:4.

Iti dayta a baro a lubong, agungarto dagiti natay tapno matagiragsakda met dagita a bendision: “Addanto panagungar agpadpada dagiti nalinteg ken dagiti nakillo.” (Aramid 24:15) Dayta ti gapuna a naikuna ni Jesu-Kristo iti maysa a managdakdakes ngem nagbabawi ken namati kenkuana: “Makikaduakanto kaniak idiay Paraiso.”​—Lucas 23:43.

Apay a Timmaud ti Panagsagaba?

Tangay pinanggep ti Dios a maaddaan dagiti tattao iti kasta a nagsayaat a masakbayan, apay nga impalubosna a tumaud ti panagsagaba? Apay nga impalubosna dayta iti naunday a panawen?

Idi pinarsua ti Dios da Adan ken Eva, inaramidna ida a perpekto ti bagi ken panunotda. Insaadna ida iti paraiso a minuyongan ken inikkanna ida iti makapnek a trabaho. Kuna ti Biblia: “Nakita ti Dios ti isuamin nga inaramidna ket, adtoy! nasayaat unay dayta.” (Genesis 1:31) No nagtulnogda koma iti Dios, naaddaanda koma kadagiti perpekto nga annak, ken nagbalin koma a paraiso ti intero a daga a pagnaedan nga agnanayon dagiti tattao iti natalna ken naragsak a kasasaad.

Inikkan ti Dios da Adan ken Eva iti wayawaya nga agikeddeng. Maysa dayta a nagsayaat a sagut a naisigud iti tao. Saanda a kas kadagiti awanan panunot a robot. Nupay kasta, agtalinaedda a naragsak no umiso ti panangusarda iti wayawayada nga agikeddeng​—tungpalenda dagiti linteg ti Dios. Kas kuna ti Dios: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” (Isaias 48:17) Didigra ti iyeg ti di umiso a panangusar iti wayawaya nga agikeddeng, tangay saan a naparsua dagiti tattao nga agbiag a sibaballigi a naisina iti Dios. Kuna ti Biblia: “Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.”​—Jeremias 10:23.

Nakalkaldaang ta impagarup dagiti immuna a nagannak kadatayo a mabalinda ti sumina iti Dios ket kaskasdi nga agballigida. Ngem idi linaksidda ti turay ti Dios, napukawda ti perpekto a kasasaadda. Nagbanaganna, in-inut a limmakay ken bimmaketda agingga a natayda. Gapu ta annakdatayo, natawidtayo ti kinaimperpekto ken ipapatay.​—Roma 5:12.

Ti Kangrunaan nga Isyu—Kinasoberano

Apay a ti Dios saanna a pinatay da Adan ken Eva sa nangparsua koma manen iti sabali a lalaki ken babai? Agsipud ta kinaritda ti sapasap a kinasoberanona, kayatna a sawen, ti kalinteganna a mangituray. Ti saludsod ket, Siasino ti addaan kalintegan a mangituray, ken makinturay ti umiso? Iti sabali a pannao, Nasaysayaat kadi ti kasasaad dagiti tattao no saan ida nga iturayan ti Dios? Iti panangtedna kadakuada iti umdas a panawen a mangpadas nga agbiag a di pulos iturayan ti Dios, maipaneknek ti Dios a nasaysayaat ti kasasaadda iti sidong ti turayna. Naunday a panawen ti intedna kadagiti tattao a mangpadas iti amin a kita ti napolitikaan, sosial, ekonomiko, ken narelihiosuan a sistema a saan nga iturturong ti Dios.

Ania ti resultana? Ipakita ti rinibu a tawen a pakasaritaan ti tao a kumarkaro ti panagsagaba. Iti napalabas a siglo, napasaran ti sangatauan ti kakaruan a panagsagaba. Riniwriw ti napapatay idi Gubat Sangalubongan II. Nasurok a 100 milion ti napapatay kadagiti gubat. Agraraira ti krimen ken kinaranggas. Nasaknap ti panangabuso iti droga. Agtultuloy ti panagwaras dagiti sakit a mayakar babaen iti sekso. Kada tawen, pinullo a milion ti matmatay gapu iti bisin ken sakit. Iti uray sadino, agrakrakaya ti biag ti pamilia ken dagiti moral a pagalagadan. Awan ti gobierno ti tao a makarisut kadagitoy a parikut. Awan kadagita ti nakaparmek iti panaglakay, sakit, ken ipapatay.

Matungtungpalen ti naipadto iti Biblia a kasasaad ti sangatauan iti tiempotayo. Ipakita ti Sao ti Dios nga agbibiagtayon kadagiti “maudi nga aldaw” ti agdama a sistema ti bambanag, kabayatan “dagiti napeggad a tiempo a narigat a pakilangenan.” Ket kas kuna ti Biblia, ‘dagiti nadangkes a tattao ken dagiti agpampammarang rimmang-ayda manipud dakes nga agturong iti dakdakes pay.’​—2 Timoteo 3:1-5, 13.

Asidegen nga Agpatingga ti Panagsagaba

Ipakita ti amin a pammaneknek nga asidegen nga agpatingga ti nakalkaldaang a panangpadas ti tao nga agbiag a naisina iti Dios. Nalawag a napaneknekanen a pulos a saan nga agballigi ti tao a mangituray iti bagina a naisina iti Dios. Ti laeng turay ti Dios ti makaipaay iti talna, ragsak, naan-anay a salun-at, ken biag nga agnanayon. No kasta, dandanin agpatingga ti panangipalubos ni Jehova iti kinadakes ken panagsagaba. Iti saanen a mabayag, bumallaetto ti Dios kadagiti aramid ti tao babaen ti panangdadaelna iti intero a dakes a sistema ti bambanag.

Naipadto iti Biblia: “Iti kaaldawan dagidiay nga ar-ari [dagiti turay ti tao iti tiempotayo] mangipasdekto ti Dios ti langit iti maysa a pagarian [idiay langit] a saanto a pulos madadael. . . . Rumekennanto ken pagpatinggaenna amin dagitoy a pagarian [dagiti agdama a turay], ket dayta agtalinaedto agingga kadagiti tiempo a di nakedngan.” (Daniel 2:44) Ti pannakaalangon ti kinasoberano ni Jehova, kayatna a sawen, ti kalinteganna a mangituray, babaen ti nailangitan a Pagarianna ket isu ti kangrunaan a sursuro ti Biblia. Maipapan iti napateg a paset ti pagilasinan “dagiti maudi nga aldaw,” impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.

Inton umay ti panungpalan, siasino ti makalasat? Sumungbat ti Biblia: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga.” (Proverbio 2:21, 22) Dagiti napalungdo, wenno nalinteg, ket isu dagidiay agsursuro ken mangaramid iti pagayatan ni Jehova. Kinuna ni Jesu-Kristo: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Wen, “ti lubong aglabas . . . , ngem ti agaramid iti pagayatan ti Dios agtalinaed iti agnanayon.”​—1 Juan 2:17.

Malaksid no adda sabali a naipakita, naadaw dagiti Kasuratan iti moderno-pagsasao a Baro a Lubong a Patarus ti Nasantuan a Kasuratan.