Magunggonaantayo no Ibturantayo ti Panagsagaba
“Kunaentayo a naragsak dagidiay nakapagibtur.”—SANTIAGO 5:11.
1, 2. Ania ti mangipakita a saan a pinanggep ni Jehova nga agsagaba ti tao?
AMIN a normal ti panagpampanunotna a tao dina kayat ti agsagaba. Uray ti Namarsua kadatayo a ni Jehova a Dios, dina kayat nga agsagabatayo. Nabatad dayta no usigentayo ti naipaltiing a Saona ken ammuentayo ti napasamak kalpasan a pinarsuana ti lalaki ken babai. Umuna, ti Dios pinarsuana ti lalaki. “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag, ket ti tao nagbalin a kararua a sibibiag.” (Genesis 2:7) Perpekto ti bagi ken isip ni Adan, ken saan nga agsakit wenno matay.
2 Komusta met ngay ti kasasaad ti biag ni Adan? “Nangimula ni Jehova a Dios iti maysa a minuyongan idiay Eden, a sumango iti daya, ket inkabilna sadiay ti tao a binukelna. Ngarud ni Jehova a Dios pinagtubona iti daga ti tunggal kayo a makaay-ayo iti panagkita ti maysa ken nasayaat a pagtaraon.” (Genesis 2:8, 9) Wen, nagsayaat ti pagtaengan ni Adan. Awan panagsagaba idiay Eden.
3. Ania a masakbayan ti agur-uray idi iti immuna nga agassawa?
3 Kastoy ti mabasatayo iti Genesis 2:18: “Kinuna ni Jehova a Dios: ‘Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.’” Nangparsua ni Jehova iti perpekto nga asawa para ken Adan, tapno maaddaanda iti naragsak a pamilia. (Genesis 2:21-23) Kuna pay ti Biblia: “Binendisionan ida ti Dios ket kinuna kadakuada ti Dios: ‘Agbungakayo ken agadukayo ket punnuenyo ti daga ken parukmaenyo.’” (Genesis 1:28) Ti immuna nga agassawa ket naaddaan iti nagsayaat a pribilehio a mangpalawa iti Paraiso idiay Eden agingga nga agsaknap dayta iti intero a daga. Adda met gundawayda a maaddaan iti nararagsak nga annak, a saan a pulos nga aglak-am iti panagsagaba. Anian a nagsayaat a pangrugian!—Genesis 1:31.
Nangrugi ti Panagsagaba
4. Manipud pay idi damo, ania ti nabataden no maipapan iti kasasaad ti sangatauan?
4 Nupay kasta, ipakita ti kasasaad ti sangatauan manipud pay idi damo nga adda dakes a napasamak. Gapu iti dayta, agsagsagaba iti kasta unay ti sangatauan. Iti panaglabas dagiti siglo, napasaranen ti amin a kaputotan da Adan ken Eva ti sakit, panaglakay, ken ipapatay. Ti daga ket saan a pulos a nagbalin a paraiso a napno kadagiti naragsak a tattao. Siuumiso nga inladawan ti Roma 8:22 ti kasasaad: “Ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.”
5. Kasano a nairaman ti immuna a nagannaktayo iti panangrugi ti panagsagaba iti sangatauan?
5 Saan a ni Jehova ti makimbasol iti nabayagen a kaadda ti nakaro a panagsagaba. (2 Samuel 22:31) Ti tao ti maysa a mapabasol. “Nagtignayda iti makadadael, nagtignayda a nakarimrimon iti pannakilangenda.” (Salmo 14:1) Nagsayaat idi ti pangrugian dagiti immuna a nagannaktayo. Nagtultuloy koma dayta no la ket ta nagtulnog da Adan ken Eva iti Dios ngem tinallikudanda ti panangituray ni Jehova. Yantangay kasta ti inaramidda, napukawdan ti kinaperpektoda. In-inuten a kimmapsutda agingga a natayda. Natawidtayo dayta a kasasaad.—Genesis 3:17-19; Roma 5:12.
6. Ania ti papel ni Satanas iti itataud ti panagsagaba?
6 Ti maysa pay a mapabasol iti panangrugi ti amin a panagsagaba ket ti espiritu a parsua a nagbalin a Satanas a Diablo. Isu ket naipaayan iti wayawaya a mangngeddeng. Ngem di umiso ti panangusarna iti dayta gapu ta kayatna nga isu ti pagdayawan ti tao. Nupay kasta, ni laeng Jehova ti rumbeng a pagdayawan, saan a dagiti pinarsuana. Ni Satanas ti nangsulisog kada Adan ken Eva tapno tallikudanda ti panangituray ni Jehova, a kas man la kabaelanda ti ‘agbalin a kas iti Dios, a makaammo iti naimbag ken dakes.’—Genesis 3:5.
Ni Laeng Jehova ti Nainkalintegan nga Agturay
7. Ania ti ipakita dagiti resulta ti iyaalsa ken Jehova?
7 Ipakita dagiti dakes a resulta ti iyaalsa a ni laeng Jehova, kas ti Soberano iti Uniberso, ti kakaisuna a maikari nga agturay ket ti laeng panangiturayna ti nalinteg. Paneknekan ti napalabas a rinibu a tawen a ni Satanas, a nagbalin nga “agturay iti daytoy a lubong,” pinataudna ti dakes, nakillo, ken naranggas a turay a saan a pulos a mapangnamnamaan. (Juan 12:31) Ipakita met ti nabayagen ken makapaupay a panangituray ti tattao iti sidong ti impluensia ni Satanas a dida kabaelan ti mangituray a sililinteg. (Jeremias 10:23) Gapuna, sigurado a mapaay ti aniaman a turay a saan a turay ni Jehova. Paneknekan dayta ti napalabas a paspasamak iti intero a pakasaritaan ti tao.
8. Ania ti aramidento ni Jehova kadagiti amin a kita ti turay ti tao, ken kasanona nga ibanag dayta a panggep?
8 Rinibu a tawenen nga ipalpalubos ni Jehova a padasen ti tao ti nadumaduma a turay a saan nga agpasakup kenkuana. Gapuna, nainkalintegan laeng a pukawenna amin dagitoy a kita ti turay ken sukatanna ida iti mismo a gobiernona. Kastoy ti kuna ti maysa a padto maipapan dayta: “Iti kaaldawan dagidiay nga ar-ari [dagiti turay ti tao] mangipasdekto ti Dios ti langit iti maysa a pagarian [ti nailangitan a gobiernona nga iturayan ni Kristo] a saanto a pulos madadael. . . . Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” (Daniel 2:44) Mapukawton ti turay dagiti demonio ken tattao. Ti laeng nailangitan a Pagarian ti Dios ti agtalinaed ken agturay ditoy daga. Agarinto ni Kristo ket kaduana nga agturay ti 144,000 a matalek a tattao a napili ditoy daga.—Apocalipsis 14:1.
Ti Pagimbagan ti Panagsagaba
9, 10. Kasano a nakatulong ken Jesus dagiti banag a sinagabana?
9 Makapainteres nga usigen dagiti kualipikasion dagidiay agturayto iti nailangitan a Pagarian. Umuna, pinaneknekan ni Kristo-Jesus nga isu ti maikari a kas Ari. Iti din mabilang a tiempo a kaduana ni Jehova, inaramidna ti pagayatan ni Amana kas “nasigo a managobra.” (Proverbio 8:22-31) Idi imbaon ni Jehova ditoy daga, situtulok a nagtulnog. Idi addan ditoy daga, impamaysana ti biagna iti panangirakurak iti Pagarian ken iti kinasoberano ni Jehova. Babaen ti naan-anay a panagpasakupna iti kinasoberano ni Amana, nagserbi ni Jesus kas nagsayaat a pagtuladan kadatay amin.—Mateo 4:17; 6:9.
10 Nagsagaba ni Jesus iti pannakaidadanes, ken napapatay kamaudiananna. Kabayatan ti ministeriona, nakitana ti nakapimpiman a kasasaad ti sangatauan. Adda kadi aniaman a naitulong kenkuana ti pannakakitana iti dayta ken ti mismo a panagsagabana? Wen. Kuna ti Hebreo 5:8: “Nupay isu ket Anak [ti Dios], nasursurona ti panagtulnog manipud iti bambanag a sinagabana.” Gapu iti kapadasanna idi adda ditoy daga, nagbalin nga ad-adda a mannakaawat ken manangngaasi. Napadasna a mismo ti kasasaad ti pamilia ti tao. Gapuna ammona ti makipagrikna kadagiti agsagsagaba ken ad-adda a naawatanna ti akemna a tumulong kadakuada. Usigenyo no kasano nga intampok ni Pablo dayta iti libro ti Biblia a Hebreo: “Rebbengenna ti agbalin a kas iti ‘kakabsatna’ iti amin a bambanag, tapno isu agbalin a naasi ken matalek a nangato a padi iti bambanag maipapan iti Dios, tapno mangidaton iti pangikappia a sakripisio maipaay iti basbasol dagiti tattao. Gapu ta isu nagsagaba idi masubsubok, kabaelanna ti bumadang kadagidiay masubsubok.” “Addaantayo kas nangato a padi, saan a ti maysa a saanna a mabalin ti makipagrikna kadagiti kinakapuytayo, no di ket ti maysa a nasuboken iti amin a bambanag kas kadatayo, ngem awanan basol. Ngarud, buyogen ti wayawaya nga agsao umadanitay koma iti trono ti di kaikarian a kinamanangngaasi, tapno makagun-odtayo iti asi ken makasaraktayo iti di kaikarian a kinamanangngaasi kas tulong iti umiso a tiempo.”—Hebreo 2:17, 18; 4:14-16; Mateo 9:36; 11:28-30.
11. Kasano a dagiti kapadasan ditoy daga dagiti masanguanan nga ar-ari ken papadi ket makatulongto kadakuada kas agturay?
11 Kasta met laeng ti makunatayo kadagiti 144,000 a “nagatang” manipud daga tapno agbalin a kakadua ni Kristo Jesus nga agturay iti nailangitan a Pagarian. (Apocalipsis 14:4) Naipasngayda amin kas tattao ditoy daga, dimmakkelda iti lubong a napnuan iti panagsagaba, ken napasaranda a mismo dayta. Adu kadakuada ti naidadanes, ken dadduma ti napapatay pay ketdi gapu iti kinatarnawda ken Jehova ken kinatulokda a mangtulad ken Jesus. Ngem ‘saanda nga imbain ti pangsaksi maipapan iti Apoda, no di ket nakipasetda iti panagsagaba iti dakes maipaay iti naimbag a damag.’ (2 Timoteo 1:8) Gapu iti kapadasanda ditoy daga, maikarida unay a mangukom iti sangatauan inton agturayda idiay langit. Nasursuroda ti agbalin nga ad-adda a mannakipagrikna, naasi, ken nagagar a tumulong kadagiti tattao.—Apocalipsis 5:10; 14:2-5; 20:6.
Kinaragsak Dagidiay Addaan iti Naindagaan a Namnama
12, 13. Kadagidiay mangin-inanama nga agbiagto ditoy daga, ania ti maitulong kadakuada ti panagsagaba?
12 Adda kadi pagsayaatanna ti panagsagaba para kadagidiay mangin-inanama nga agbiagto nga agnanayon iti paraiso a daga nga awanan iti sakit, panagladingit, ken ipapatay? Siempre, awan ti mangayat nga aglak-am iti ut-ot ken saem nga iyeg ti panagsagaba. Ngem no ibturantayo ti kasta a panagsagaba, ad-adda a mapasayaattayo dagiti kababalintayo ken lallalo a rumagsaktayo.
13 Usigenyo ti kuna ti naipaltiing a Sao ti Dios maipapan iti dayta: “Uray no agsagabakayo maipagapu iti kinalinteg, naragsakkayo.” “No maum-umsikayo gapu iti nagan ni Kristo, naragsakkayo.” (1 Pedro 3:14; 4:14) “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit.” (Mateo 5:11, 12) “Naragsak ti tao nga agtultuloy nga agibtur iti pannakasuot, agsipud ta iti pannakaanamongna awatennanto ti korona ti biag.”—Santiago 1:12.
14. Nupay agsagsagaba dagiti agdaydayaw ken Jehova, apay a naragsakda latta?
14 Saan met ketdi a ti mismo a panagsagaba a mapaspasarantayo ti mangparagsak kadatayo. Naragsak ken kontentotayo gapu ta ammotayo a ti panagsagabatayo ket maigapu iti panangaramidtayo iti pagayatan ni Jehova ken panangtuladtayo iti ulidan ni Jesus. Kas pagarigan, idi umuna a siglo, naibalud ti dadduma kadagiti apostol, naisaklangda iti nangato a pangukoman dagiti Judio, ken nakondenarda gapu iti panangikasabada iti maipapan ken Jesu-Kristo. Nasapsaplitda sada nawayawayaan. Ania ti reaksionda? Sigun iti salaysay ti Biblia, “pimmanawdan iti sanguanan ti Sanhedrin, nga agragrag-oda agsipud ta naibilangda a maikari a maibabain maigapu iti naganna.” (Aramid 5:17-41) Naragsakda, saan a gapu iti pannakasapsaplit ken iti ut-ot nga imbunga dayta no di ket gapu ta naawatanda a napasaranda dayta gapu iti kinatarnawda ken Jehova ken iti panangsurotda iti addang ni Jesus.—Aramid 16:25; 2 Corinto 12:10; 1 Pedro 4:13.
15. Kasano a makagunggonanto kadatayo ti panangibturtayo ita iti panagsagaba?
15 No anusantayo ti ibubusor ken pannakaidadanes buyogen ti nasayaat a kababalin, masursurotayo ti agibtur. Tulongannatayo dayta a mangibtur iti panagsagaba a mabalin a mapasarantayo iti masanguanan. Mabasatayo: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur.” (Santiago 1:2, 3) Umasping iti dayta, kinuna ti Roma 5:3-5: “Agrag-otayo bayat nga addatayo kadagiti rigat, yantangay ammotayo a ti rigat mangpataud iti panagibtur; ti panagibtur, kalpasanna, maysa a naanamongan a kasasaad; ti naanamongan a kasasaad, kalpasanna, namnama, ket ti namnama saan a mangiturong iti pannakaupay.” Isu a no ad-adda nga ibturantayo dagiti pakasuotan gapu iti Kinakristianotayo, ad-adda a makabalantayo a mangibtur kadagiti masanguanan a pakasuotan iti daytoy dakes a sistema ti bambanag.
Manggunggona ni Jehova
16. Kasano a subadanto ni Jehova ti panagsagaba dagiti masanguanan nga ar-ari ken papadi?
16 Nupay mapukawantayo kadagiti material a sanikua gapu iti ibubusor wenno pannakaidadanes kas resulta ti panangannurottayo iti Nakristianuan a panagbiag, naragsaktayo agsipud ta ammotayo a naan-anay a gunggonaannatayo ni Jehova. Kas pagarigan, para kadagidiay addaan iti nailangitan a namnama, insurat ni apostol Pablo: “Sirarag-o nga inawatyo ti pannakasamsam dagiti sanikuayo, yantangay ammoyo nga addaankayo iti nasaysayaat ken mataginayon a sanikua” kas agtuturay iti Pagarian ti Dios. (Hebreo 10:34) Kasta met, panunotenyo ti rag-oda inton makiramanda iti panangiburay kadagiti nakaskasdaaw a bendision kadagiti agtaeng ditoy daga idiay baro a lubong iti sidong ti panangiwanwan ni Jehova ken ni Kristo. Talaga nga umiso ti kinuna ni apostol Pablo kadagiti matalek a Kristiano: “Ibilangko a dagiti panagsagaba iti agdama a panawen awan aniaman a pategda no maidilig iti dayag a maipanayagto kadatayo.”—Roma 8:18.
17. Anianto ti ipaay ni Jehova kadagidiay addaan iti naindagaan a namnama a sisusungdo nga agserserbi ita kenkuana?
17 Umasping iti dayta, aniaman ti mabalin a mapukaw wenno isakripisio ita dagidiay addaan iti naindagaan a namnama gapu iti panagserbida ken Jehova, gunggonaannanto ida iti aglaplapusanan iti masanguanan. Ipaayannanto ida iti perpekto ken agnanayon a biag iti paraiso a daga. Iti dayta a baro a lubong, ni Jehova “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) Nagsayaat ketdin a kari! No idilig iti naisangsangayan a biag nga ipaay ni Jehova kadagiti matalek nga adipenna nga agsagsagaba, awan kaimudinganna ti aniaman a mabalin a mapukaw wenno isakripisiotayo iti daytoy agdama a lubong maigapu kenkuana.
18. Ania ti makaliwliwa a kari ni Jehova kadatayo babaen ti Saona?
18 Aniaman a panagsagaba a mapasarantayo ita ket sigurado a saannanto a lapdan ti panangtagiragsaktayo iti biag nga agnanayon iti baro a lubong ti Dios. Masubadanto amin dagita iti nagsayaat a kasasaad idiay baro a lubong. Kinuna ti Isaias 65:17, 18: “Dagiti immun-una a banag saandanto a maipalagip, saandanto met a tumpuar iti puso. Ngem agragsakkayo ket agrag-okayo iti agnanayon iti daydiay parsuaek.” Maitutop ngarud ti kinuna ni Santiago, a kabsat ni Jesus iti ina: “Kunaentayo a naragsak dagidiay nakapagibtur.” (Santiago 5:11) Wen, no simamatalek nga ibturantayo dagiti agdama a sagsagabaentayo, magunggonaantayo itan ken iti masanguanan.
Ania ti Sungbatyo?
• Kasano a nangrugi ti panagsagaba dagiti tattao?
• Ania dagiti pagimbagan ti panagsagaba dagidiay masanguanan nga agturay ken agnaed ditoy daga?
• Apay a makapagrag-otayo uray no agsagsagabatayo?
[Ladawan iti panid 27]
Nagsayaat a masakbayan ti agur-uray kadagiti immuna a nagannaktayo
[Ladawan iti panid 29]
Nakatulong ken Jesus nga agbalin a nasayaat nga Ari ken Nangato a Padi ti pannakaimatangna iti panagsagaba
[Ladawan iti panid 31]
‘Nagrag-o dagiti apostol agsipud ta naibilangda a maikari a maibabain’ maigapu iti pammatida