Salsaludsod Dagiti Agbasbasa
Mataginayon kadi ti Kristiano ti nadalus a konsiensiana no awatenna ti trabaho nga agkalikagum iti panagawit iti armas?
Dagiti Saksi ni Jehova iti intero a lubong dida tagilag-anen ti impaannong ti Dios kadakuada a panangipaay ti material a kasapulan ti pamiliada. (1 Timoteo 5:8) Ngem adda dagiti trabaho a nalawag a maikaniwas kadagiti prinsipio ti Biblia ket nasken a maliklikan dagita. Karaman dita dagiti trabaho mainaig iti panagsugal, di umiso a panangusar iti dara, ken panangiparegta iti panangusar kadagiti produkto a tabako. (Isaias 65:11; Aramid 15:29; 2 Corinto 7:1; Colosas 3:5) Dadduma a kita ti trabaho, nupay saan a direkta a kondenaren ti Biblia, ket maisalungasing iti konsiensia ti maysa wenno iti konsiensia ti dadduma.
Ti iseserrek iti trabaho nga agkalikagum iti panangawit iti paltog wenno aniaman nga armas ket personal a desision. Ngem ti kasta a trabaho isarangna ti maysa iti posibilidad nga agbalin a manungsungbat iti dara no makalikaguman nga usarenna dayta nga armas. Gapuna, nasken a sikakararag nga usigen ti maysa a Kristiano no isu ket sidadaan a mangawat iti responsabilidad a mangaramid iti giddato a desision no adda biag nga agpegpeggad. Ti panangawit iti armas isarangna met ti tao iti pannakadangran wenno pannakapapatay manipud iti maysa a mangraut wenno manangibales.
Adda met epektona kadagiti dadduma ti desision nga aramiden ti maysa. Kas pagarigan, ti kangrunaan nga annongen ti Kristiano ket ikasaba ti naimbag a damag maipapan iti Pagarian ti Dios. (Mateo 24:14) Maisuronanto ngata kadagiti dadduma a ‘makikappiada iti amin a tattao,’ no ti pagsapulanna ket agkalikagum iti panangawit iti armas? (Roma 12:18) Komusta met dagiti ubbing wenno dadduma a kameng ti pamilia? Mamagpeggad kadi iti biagda ti kaadda ti paltog iti balay? Maysa pay, maitibkol kadi ti dadduma gapu iti kasta a takderna?—Filipos 1:10.
Kadagitoy ‘maudi nga al-aldaw,’ umadu nga umadu dagiti tattao a “narungsot, awanan panagayat iti kinaimbag.” (2 Timoteo 3:1, 3) Ti kadi tao a makaammo iti dayta makapagtalinaed a ‘siwayawaya iti pammabasol’ no awatenna ti trabaho a mangipasango kenkuana kadagiti kasta a tattao? (1 Timoteo 3:10) Saan. Gapuna, ti kongregasion dina matmatan dayta a tao kas maysa nga “awanan pakababalawan” no itultuloyna ti agawit iti armas kalpasan a maipaayan iti naasi a balakad manipud iti Biblia. (1 Timoteo 3:2; Tito 1:5, 6) Saan ngarud a makualipikar ti kasta a lalaki wenno babai iti aniaman a naisangsangayan a pribilehio iti kongregasion.
Impanamnama ni Jesus kadagiti adalanna a no iyun-unada iti biagda dagiti interes ti Pagarian, saan a masapul a pakaringgoranda unay dagiti kasapulanda a pagbiag. (Mateo 6:25, 33) Kinapudnona, no naan-anay nga agtalektayo ken ni Jehova, ‘isu saranayennatayto. Saannanto a pulos ipalubos nga agdiwengdiweng daydiay nalinteg.’—Salmo 55:22.