Saludsod
● Siasino ti masapul a mangtaming kadagiti anunsio iti Gimong ti Serbisio?
Ti panggep daytoy a benneg iti Gimong ti Serbisio isut’ panangipakaammo iti kongregasion kadagiti napateg a detalie iti pannakaimaton ti naituding a ministerio. Dadduma kadagiti anunsio ti nairanta a pammalagip ken agkakaasping dagitoy iti linawanlawas. Nupay kasta, amin dagiti anunsio ti maiyebkas a silalawag. Saan koma a maited a kasla gagangay wenno tratuen a kasla rutina.
Ti kasasaad iti dadduma nga anunsio ket kasapulanna a maysa a panglakayen iti mangipresenta. No daytoy ti kasapulan, responsabilidad iti mangidaulo a manangaywan ti mangurnos iti makabael a kabsat a lalaki a mangidatag iti impormasion, nupay mabalin a sabali a kabsat ti mangtaming iti dadduma a naiyiskediol a maiyanunsio.
No ti maysa a surat ket naglaon iti impormasion a maipaay iti kongregasion a saklawenna iti sabali nga impormasion nga imatonan laeng dagiti panglakayen, maysa a panglakayen ti mangipresenta iti dayta. Dadduma kadagiti sursurat manipud ti Sosiedad a naglaon iti masinnunuo a direksion nga agpaay iti kongregasion ti kasayaatan nga ibasa iti maysa a panglakayen. Dagiti kakasta a sursurat ti nalabit nga adda singgalutna iti espesial a surat maipapan ti kampania a pagimbagan dagiti kakabsat nga agsagsagaba iti pannakaidadanes. Naglaon met dagiti dadduma a sursurat iti detaliado nga impormasion maipapan iti masanguanan a teokratiko nga trabaho, kas iti bisita ti manangaywan iti sirkito, asamblea, ken kombension.
Addada tiempo a maysa a napateg nga anunsio maipapan iti pagimbagan ti kongregasion iti masapul a maaramid, ket ti impormasion masapul a maiparang a nabatad. Dagita nga anunsio ti kasayaatan a maipaay babaen dagiti panglakayen.
Aramiden man dagiti panglakayen wenno ministerial nga adipen, dagiti anunsio ti masapul a maited a buyogen iti kinalawag ken kinaababa. Ti panangsurot kadagitoy a giya isut’ mangisiguro iti umiso a pannakailawlawag dagiti instruksion iti kongregasion tapno agtignay dagiti amin nga agtultuloy iti masanguanan a sangsangkatunos.—Sal. 133:1; 1 Cor. 14:8, 9, 40.