Agalisto a Mangirugi kadagiti Panangyadal ti Biblia
1 Ti panangirugi ken panangikondukta kadagiti panangyadal ti Biblia kadagiti pagtaengan ket paset ti komisiontayo kas dagiti Saksi ni Jehova. (Mat. 28:19, 20) No kasta ngarud, agbalinkayto kadi a maysa kadagiti katrabahuan ti Dios iti panangaramid iti daytoy? (1 Cor. 3:9) Anian a pribilehio ti mangtulong kadagiti dadduma a manggun-od ti pannakaammo maipapan ti kangayedan a Persona iti uniberso!
2 Gapu ta nagadu la unay dagiti problema a naisinggalut kadagiti napardas-panagbalbaliwna a paspasamak daytoy a lubong, adu a nasingpet panagpuspusona a tattao ti agbirbiruk kadagiti sungbat no apay a dagitoy a bambanag ket mapaspasamakda. Idi ugma ni Jehova nangited sungbat kadagiti salsaludsodda. No dagiti napasnek a tattao ket masursuruanda iti Sao ti Dios, maliwliwada. Isut’ gapuna ngarud, kasapulan nga alistotayo kadagiti gundaway a mangirugi kadagiti panangyadal ti Biblia.—Prov. 3:27.
AGALISTO KADAGITI GUNDAWAY
3 Napanunotyo kadin ti mangirugi iti maysa a panangyadal ti Biblia iti maysa nga asideg a kabagian wenno pagayamyo nga awan iti kinapudno? Ti pannakaammom kadakuada ket mangtulong kenka a mangripirip no kaano a pakisaritaam kadakuada maipapan iti dayta a banag. No mariingen ti rikna ti maysa a tao, dagiti nabunga a panagsisinnarita ti masansan a sumaruno, ket ti maysa a panangyadal iti Biblia mabalin a maipasdek.
4 Kadagiti kaadduan a kaso ti nasayaat a kababalin ti maysa a Kristiano nga asawa ket nagserbi a manglukat ti dalan para ti saan a manamati nga umawat iti kinapudno. (1 Ped. 3:1, 2) Dagiti saan a manamati nga assawa ken dagiti dadduma a saan a manamati a miembro ti pamilia apresiarenda met no isudat’ bigbigen ken raemen dagiti miembro ti kongregasion. Ti panangipakita ti personal nga interes kadakuada ket dakkel maitulongna tapno magun-odan ti pannakipagayamda. Babaen ti pannakitinnulongyo iti asawa wenno miembro ti pamilia nga adda iti kinapudno, mabalin a makaipasdekkayo ti maysa a panangyadal ti Biblia.
5 Kabayatan a makipaspasettayo iti trabaho a panagbalaybalay, mabalin a mairugitayo ti maysa a panangyadal ti Biblia iti umuna a pannakisarita. Sumagmamano nga agibumbunannag ket nagballigida iti panangaramid iti kastoy idi a ti makimbalay ket nagsalsaludsod kadagiti bambanag a diretso a masungbatan manipud iti maysa a publikasion. No daydiay tao kayatna a basaen ti literatura wenno imbitarannatayo idiay uneg ti balayna, gundawayantayo ti mangitultuloy iti pannakisarita ken nalabit idemonstra ti panangyadal. Kadagiti masanguanan a panagsarungkar, mabalin nga itultuloyyo nga isarita kenkuana daydiay tema nga imbagam idi immuna a pannakisaritayo kenkuana.
KADAGITI IMPORMAL NGA OKASION
6 Agalistokayo met kadagiti okasion para iti impormal a panangasaba, ket nakasaganakayo koma babaen ti panangawityo kadagiti tracts ken dagiti magasin tapno mangnayon pay ti interes daydiay dumngeg maipapan ti kinapudno. (Ecl. 11:1) Ti impormal a panangasaba ket maysa pay a wagas a mangited kadatayo ti gundaway a mangirugi iti panangyadal ti Biblia.
7 Ti trabaho a panangaramid ti ad-adalan ket saan laeng a para kadagiti sumagmamano. Daytat’ para kadagiti isuamin iti kongregasion. Ti pananglaglagip a ti panagbalin a manangaramid iti adalan ket maysa a Nakristianuan a komision paregtaennatayo nga agalisto kadagiti gundaway a mangirugi kadagiti panangyadal ti Biblia.