Iwaragawag ti Naimbag a Damag Babaen Ti Pagwanawanan
1 Ti Pagwanawanan isut’ pudno a nagpaiduma gapu ta naglaon iti naimbag a damag. Kas panangidilig, kaaduan kadagiti nailubongan a publikasion ti naglaon iti dakes ken makapadanag a damag. Kasanotayo a maipakita iti dadduma a Ti Pagwanawanan ket naiduma, a naglaon iti makabang-ar a damag?
2 Mabalintayo nga iyawis ti asikaso iti “Ti Panggep Ti Pagwanawanan” idiay panid 2 iti magasina. Itudo a ti panggepna isut’ panangitandudo ken Jehova, panangsiput kadagiti paspasamak ti lubong a kaitungpalan iti padto ti Biblia, mangted ti makaliwliwa a damag kadagidiay a mairurumen, ken pabilgenna ti pammati iti parabor ti Dios a maipaay iti pannakaisalakantayo.
3 Ti kadi komentotayo maipapan Ti Pagwanawanan ket naglaon iti kasta a kapanunotan a buyogen ti makaallukoy a wagas? No ania ti sawentayo ket saan koma a balbalikas a mangriing iti apag-apaman laeng nga interes; adda koma sustansiana, makaawis ti talek a mangparnuay iti tarigagay a mangadal pay iti ad-adu.
4 Kasapulan ti Panagsagana: Kasapulan a basaentayo ti kada magasina a siaannad, a maanalisar iti nagduduma a panangiparang nga adda iti panunot ti teritoriatayo. Ti panangkita kadagiti naisitar a teksto ti Kasuratan isut’ mangparayray iti pannakaawattayo. Paunegenna ti panangipateg iti kinapudno ken tignayennatayo a mangiranud met iti dadduma. No ti kinapudno ket awan iti pusotayo, bassit laeng ti aneptayo nga agsao.
5 Ti interes nga iparangarang ti maysa a tao isut’ mangeddeng no ania iti itukon. No ti sungbatna ket nabaaw wenno negatibo, umdasen dagiti naisawangtayo. No adda ebkas ti napudno a panangipateg ken tarigagay a mangammo pay iti ad-adu, maitutop unay no maitukon iti suskripsion. Masansan, nasaysayaat no ti baro a suskritor ket mangrugi iti innem a bulan a suskripsion; mabalin a mapabaro no mataginayon iti interesna.
6 Ditay ammo no kasano ti kapaut ken agingga iti sadino ti pakadanonan iti maiwaragawag a naimbag a damag. Masiguradotayo, nupay kasta, a Ti Pagwanawanan ket akmenna iti napateg a papel no ania ti maibanag. Babaen ti panangusar iti daytoy a parabor, masapul a tuladentayo dagiti apostol a sireregta a “mangisuro ken mangiwaragawag . . . iti naimbag a damag ti sao ni Jehova.”—Ara. 15:35.