No Apay a Napateg Unay Ita Dagiti Tract iti Ministeriotayo
1 Idiay Enero 1, 1991, a ruar iti Ti Pagwanawanan, panid 30, adda maysa a kapadasan a napauluan iti “Nakakita ti Polieto (Tract) iti Riles.” Imbagana maipapan iti maysa a superbisor ti riles a nakasarak iti maysa a tract a nalipit iti maysa a riles. Binasana a dagus daytoy a tract ken imbagana iti manugangna: “Itan nasarakakon ti kinapudno!” Agpadpada dagitoy a tattao ti nagpedido iti ad-adu pay a literatura ken inadalda. Ita, nasurok a sangagasut kadagiti kabagianda ti aktibo iti kinapudno.
2 Panangusar Kadagiti Gundaway: Maysa nga agtutubo a Saksi ti nakadlaw a ti maestrana ket naladingit unay gapu iti ipupusay ni katuganganna a babai. Ti agtutubo a kabsat a babai ket nagsurat iti maestrana ti makaliwliwa a surat ken inlukonna iti tract nga Aniat’ Namnama kadagiti Ing-ingungoten a Natayen? Ti maestra ket nagsubalit iti nota ti panagyaman ken kalpasanna nakisao pay iti agtutubo a kabsattayo a babai. Ita daytoy a maestra ket regularen nga umawat iti magasina manipud kenkuana.
3 Dadduma nga agibumbunannag ti mangaskasaba iti lansangan nga agturong idiay sementerio ti nakakita kadagiti tattao a nangpintora kadagiti tanem. Intukon dagiti agibumbunannag kadakuada dagiti tract. Ti sumaruno nga aldaw isut’ nangina nga aldaw ket adu dagiti tattao ti bumisita iti sementerio, gapuna a dagiti agibumbunannag nagtakderda iti ruangan ti sementerio tapno itukonda dagiti tract. Nasurok a lima gasut a tract dagiti naipaima. Iti sumaruno a tawen, nagsubli dagiti agibumbunannag a nagiwaras iti nasurok a sangaribo a tract. Maysa a tao ti nangbasa iti tract ket sakbay a pimmanaw kinunana iti agibumbunannag: “Adda maysa a tao a kayatko a mabasana daytoy a damag. Mabalin kadi a mangtedka pay iti maysa?”
4 No adda impormal a pannakisao kadagiti sabsabali, sangaili wenno kasingedtayo, ikagumaantayo ti mangted iti ababa a sasao a mangiturong ti pannakalawlawag iti maysa kadagiti walo a tract nga addan kadatayo. Maaramid daytoy bayat a makisaotayo kadagiti kaaruba, bayat nga aggatang wenno aguray kadagiti katulag, wenno bayat a bisitaen dagiti kabagian.
5 No Apay nga Epektibo: Dagiti tract ket dekolor ken abbabada laeng. Dagiti bumalay ket saanda a magaburan, a kasla mariknada a maobligarda iti makataktak a panangbasa. Kaskasdi, ti damag ket impormatibo unay. Maala ti managbasa iti solido a Nainkasuratan a panangmatmat iti suheto ti tract. Kalpasan ti panangawatna iti tract a Biag iti Maysa a Natalna a Baro a Lubong, maysa nga agtutubo ti nagkuna: “Diak pay nakangngeg idi ti kasta a makaparegta a pakaammo maipapan ti kasasaad iti lubong!”
6 Nasarakan dagiti adu nga agibumbunannag dagiti tract a makatulong a mangawis iti pannakairugi ti saritaan iti panagbalaybalay a trabaho. Nawadwad a panagadal ti maidadaulon a nairugi laeng babaen iti maysa a tract. Iti panid 4 daytoy a ruar Ti Ministeriotayo iti Pagarian, adda sumagmamano a praktikal a singasing no kasano a mausar dagiti tract nga sieepektibo. Wen, babassit laeng dagiti tract ngem napategda a remienta iti ministeriotayo.